Galatia 1
1
Atsyɛ̀’te
1Yɔɔn ŋwà’ne fóo mbwo mèŋ Pɔl, ngàŋ ntúm Yěsô Kristo, mbà pʉ̀a mesoŋ zɔ̌ la tè wɔ̀ɔn tsɔ́’, tsɔ̌ nyìŋ mesoŋ zɔ̌ ké tè wɔ̀ɔn túm. Yěsô Kristo pɔ́ Ssé Tá zɔ̌ la túmo wɔ̀ɔn. Yé Tá la gÿo Yěsô zíme ná legwé. 2Pega mefɛ́ mefɛ́ pie pega pɔ̌ ee jʉ’ɔɔn pǔ ńnáa yɔɔn ŋwà’ne á mbwo mecú’tè pʉ̀a Kristo mie ée tsɛ̀ɛ ngwòŋ Galatia. 3Peg ne ńtsɔ́ɔn ngie Tá wege Ssé mbɔɔ Cʉ̀apʉ̀a Yěsô Kristo ne ńgwɔ né pi, ńne ńnéŋe sẅéte ntʉ́m pi. 4Pi ne ńzsé ngie Kristo yé máŋwɛ́ la náa twó yé nà menò tepòŋ mégè lélɔg sẅɛ’ ndòon yege, pú’u léfó mbwo yɔɔn kème njÿó gie á té poŋ ńkẅile wégè. Mɔɔn menò gwɔ́ pɔ́ pá’ Tá wege Ssé la záb. 5Pʉ̀a mesoŋ gu’te Ssé mengù’u mengù’, Ameŋ.
Nkʉ̀ mbòŋo gwɔ́ pɔ́ wémɔ’ɔ́
6Á pǔ ńkʉ’ʉ wɔ̀ɔn tɛ’ ná pá’ e Ssé ka cʉa ná Kristo, ńtóŋo gẅí, ńcÿó gʉm gí, n ka léen ńkẅɛɛ tsetsɛ̀ɛ pi, pi sele nzèm ye, tà ńcʉ́’ʉ ńjú’u pɔ́ tsɔ́ nkʉ̀ mbòŋo we ndyɛ̀’ɛ. 7N tě ńdɔgɔ ńgɔɔn ngie etsɔ́ nkʉ̀ mbòŋo gíŋe ńgwɔ́ wó wɔ́, tsɔ́ pʉ̀a zɔ̌ ssé ńne ḿbue twó gi, ńne fa’a lékúbe nkʉ̀ mbòŋo Kristo. 8Peg kéen ńdá’ ńtswi nkʉ̀ mbòŋo mbwo pi. Tà tsɔ̌ nyìŋ lɔɔn ḿbiŋ ńtó fʉ̀’ɔɔn, kà pɔ́ nyìŋ weg wɔ́, kà pɔ́ *cÿɔ́’ Ssé, éfóo tÿǒ lepwó wɔ́, ńtsẅi tsɔ́ nkʉ̀ mbòŋo we ndyɛ̀’ɛ mbwo pi, tà é té gwɔ́ pɔ́ gẅie peg ka tsẅi wɔ́, mbà á zɛ́te ngie Ssé néŋ ndòon twó ngàŋ. 9Peg ka zɔɔn ńgɔɔn né pi. Mèŋ n gee fʉ̀’ɔɔn ńgíŋe ńkímte kimtě ngie, nyìŋ lɔɔn ńtó ńtsẅi tsɔ́ nkʉ̀ mbòŋo we ndyɛ̀’ɛ mbwo pi, tà é té gwɔ́ pɔ́ gẅie peg ka tsẅǐ wɔ́, mbà á zɛ́te ngie e Ssé néŋ ndòon twó ngàŋ.
10Pi shwóŋó wɔ̀ɔn, anò gie mèŋ fóo légɔɔn lɔɔn, á nyɛɛ ngie mèŋ n ne ńtsɔ́ɔn ngie nò yɔ́ɔn poŋ pʉ̀a mesoŋ kà ngie à poŋ pɔ́ Ssé? Mèŋ n gee pá’a ńne ńtsɔ́ɔn légÿo mmó gie á ge poŋ pʉ̀a mesoŋ ka? Á gwé’e pé’è, mèŋ n ne fa’a mbɔɔ légÿo mmó gie á poŋ pʉ̀a mesoŋ, mbà mèŋ n te gíŋe ńgwɔ́ nyìŋ gẅie à kwa’ fa’a fà’a Kristo wɔ́.
Nkʉ̀ mbòŋo gẅie Pɔl tsẅii é fóo ndʉŋ ndʉŋ mbwo Kristo
11Mefɛ́ mefɛ́, tà mèŋ shwóŋó gẅí, nkʉ̀ mbòŋo gẅie pi la jú’ n tsẅi é té nkwaŋá nyìŋ mesoŋ wɔ́. 12Nyìŋ mesoŋ zɔ la zɔɔn tè cʉ́me wɛ̌ nkʉ̀ mbwo mèŋ wɔ́. Nyìŋ mesoŋ ké tè wɔ̀ɔn zí’i, Yěsô Kristo zɔ la gÿo mèŋ n zsé.
13Kwà’ pi la zɔɔn ńjú’ pá’ n dɔ̌ɔn ńgÿo pú’u, á fʉ̀’ gie n da nyé ńgu’te Ssé nà ntí ye pà Yuda. Pi ne ńzsé ntí gie n dɔ̌ɔn ńdɔgɔ sá’a tʉ̀ ńtsɔ́’ɔ kwò cú’tè pʉ̀a Ssé té poŋ ḿbiŋe fa’a lépú ḿbyág pú’u. 14Á gʉa nà legu’te Ssé nà ntí ye pà Yuda, mbà n daa mǒ tà ḿbú ńcʉa kwò nkàŋ yég púɔ pà Yuda. N dɔ̌ɔn ḿbú ḿma’a mbùm yɔ̀ɔn tɛ’ ná mà gẅie metá pég la zí’i wég, ńcʉa wɔ́b.
15Ká’a mbà n da nyé pɔ́ lepfòm, e Ssé tsɔ́’ɔ wɔ̀ɔn, ńgÿo ńcÿó gʉm yɔ́ɔn, ńtóŋo wɔ̀ɔn ngie mèŋ n cʉ́’ ńgwɔ́ pɔ́ nà mé mbwo. 16À la piŋ ńnéŋe tà ńgyá ngie à ge gÿo mèŋ n zsé Míŋ we, légwɔ́ gie mèŋ n ge gʉa tsẅi nkʉ̀ gẅie é líe Míŋ we ŋwɛ́ á mbwo pʉ̀a pie é té pà Yuda wɔ́. Mèŋ n gya míŋ we ŋwɛ́, n te gwóon ḿbíge tsɔ́ nyìŋ tsɔ́ nò wɔ́. 17N ké tè pʉʉ Yerósalem, ńgyá pʉ̀a pie é la vɔg ńgwɔ́ megàŋ ntúm Yěsô tá mèŋ n tó yɔ́ɔn mɔ́; tà ńcʉ́’ pú’u, mbà mèŋ n da gwóon ńgʉa tsɛ̀ɛ Arabia, ńgÿo ńgíŋe ḿbiŋe tÿǒsoŋ Ndamas.
18N da lá’ ńgwɔ́ pʉʉ Yerósalem légʉa ńgyá Piɛ#1.18 Me ee jʉ’ɔɔn mbɔɔ na kem 2.9,11,14 ńtóŋo ye ngie le Kéfas. peg yé zséte, mbà é cʉ̌a ngù’ tá. N kúu wó peg yé ńnéŋe lyɛ̌’ ntsɔ̀b tʉ̀a nê legém, 19é té ndà’ yé wɔ́, mbà mèŋ n da tè gíŋ ńgyá tsɔ̌ ngàŋ ntúm Yěsô we ndyɛ̀’ɛ wɔ́, n da gíŋ ńgyá pɔ́ Jâg fɛ́ Cʉ̀apʉ̀a. 20Ammó gie mèŋ n ŋwe’e shwóŋó gẅi lɔɔn, áa nénʉ́. Mèŋ n tyě pá’ɔɔn mvfò Ssé, ńgɔɔn ngie mèŋ n tě ńcÿɔ nò wɔ́.
21N da pɔ́ɔnte ńgʉa tsɛ̀ɛ melá’ ngwòŋ Siria mbɔɔ tsɛ̀ɛ me Silisia, 22ńgwɔ ne gwaa giŋe fa’a pú’u, mbà pʉ̀a Kristo pie ée Jẅidea laa zí shÿó wɔ̀ɔn gyá. 23Á la gwaa gwɔ́, mbà pɔ́ la jú’ pɔ́ pá’ mé ne ńgɔɔn ngie: Nyìŋ gẅie à laa tsɔ́ fʉ̀’ ńne ńtsɔ́’ɔ kwò yɔ́b té poŋ la, aa fʉ̀’ɔɔn ńne ńtsẅii nkʉ̀ mbòŋo, ńgɔɔn nò ná lezáb ntʉ́m ná Yěsô gẅie à laa tsɔ́ fʉ̀’ ésá’a tʉ̀ pɔ́ lépyág la. 24Á cʉa pú’u, pɔ́ ne ńgu’te Ssé ńtí wɔ̀ɔn.
Currently Selected:
Galatia 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.