Efeso 1
1
Pɔl ne ńtsyɛ’te pʉ̀a Efeso
1Yɔɔn ŋwà’ne fóo mbwo mèŋ pɔl, e Ssé la kwoŋ ngie n gwɔ́ ngàŋ ntúm Yěsô Kristo. Mèŋ n náa mbwo pi pʉ̀a Ssé pie pi ńnéŋe Efeso, mbà pi la záb ntʉ́m ná Yěso Kristo, ńké ńzsé pɔ́ ndà’ nò yé. 2Tá wege Ssé mbɔɔ Cʉ̀apʉ̀a Yěsô Kristo ne ńgwɔ́ né pi, ńne ńnéŋe sẅétè ntʉ́m pi.
Eshúm sie e Ssé la cʉa ná Kristo ńdɔg ńcÿó gʉm yégè
3!Pege nê ńgu’te Ssé Tá pà Cʉ̀apʉ̀a wege Yěsô Kristo. À la gÿo nò mbòŋo ná pege, ńná shúm mbòŋo ntsèm sie éfóo tàa tÿǒ né pege, ńná pú’u, ńcʉa ná pá’ à la lá’ ńtemte wégè lâ Kristo, 4mbà à la cʉa ná Kristo ńtsɔ́’ɔ wégè, ńdɔg ńgÿo pʉ̀a pé tà fó ńnyé pɔ́ tè nyɛte njÿó pá’ pege ge gwɔ́ mvfò yé é gwɔ́ pʉ̀a ndʉalʉ̌a, é gwɔ́ pàtèfʉa. Á la lɔg pá’ à kwoŋo wégè, 5ńzáb tà tyě sǎg tɛ’ ngie à ge cʉa ná Yěsô Kristo é gÿo pege cʉ́’ púɔ pé. Á gwɔ́ pɔ́ we lekwoŋ, ńké ḿboŋo yé tɛ’. 6À la lɔgɔ wégè ńgÿo púɔ pé le gwɔ́ gie pege ge gu’te yé ná máa nò té fʉ̀’ gẅie à la gÿo. Á la cʉa ná pá’ à la temte wégà Míŋ we gẅie à kwoŋe yé tɛ’, ńcÿó gʉm yégè, pú’u á gwɔ́ kwà’ máamaa nò tɛ’. 7Míŋ we ŋwɛ́ la lɔg metse mé ńdɔg ńcu’u wégè, pege tsẅɛ́. E Ssé lege mefʉa mégè ńnáa mbwo pege. Yɔɔn áa nò té fʉ̀’ gie e Ssé la lɔg ńcÿó gʉm yégè, 8áa fù’ gie à la náa mbwo pege tà á gyɔ́ɔn gyɔ̌ɔn, ńgwɔ náa, ńtsɔ́’ legyè ségè pege zsé nò. 9Áa yɛ̌ tá pege zsé mmó gie à la záb, mbà á la zɔɔn ńgwɔ́ pɔ́ lelyěen. Yɛ̌ mmó gwɔ́ gie à la tʉ́ njÿó, á poŋo yé poŋ, á záb ngie à ge lá’ lɔgɔ Kristo é gÿo à pumte, 10ńgwɔ́ ngie à fʉ̀’ ge lá’ gwɔ́ tà ku’, yé Ssé cú’te shúm ntsèm sie ée tÿǒ lepwó lâ sie ée ndùme ssé tsetsá’, é ná ntsèm ntsèm mbwo Kristo à ne sá’a pɔ́ gílé ye.
11Peg la zẅɛ́’ pɔ́ pá’ peg lǎ nnɛ́ ná Kristo, tá ńgẅiin yég jʉ’ tsetsɛ̀ɛ pʉ̀a pie à gÿǒ pɔ́ tsẅɛ́, á nue e Ssé la tʉ́ njÿó ńtsɔ́’ɔ wég. Á gwɔ́ pá’ a la záb. E Ssé piŋ ńgÿo kɔ̀ɔkɔ́ɔ pɔ́ pá’ à la záb ngie à ge gÿo pú’u. 12À lɔ̌ɔn ńtsɔ́’ɔ wégè pú’u, le gwɔ́ gie peg pie peg ka vɔgɔ lézáb ntʉ́m nà Kristo, peg ge gu’te yé Ssé á nue à gú’ tɛ’. 13Á gʉa ná pi gí, mbà pi ka jú’u shwóŋè gie áa ye nénʉ́, é gwɔ́ nkʉ̀ mbòŋo gẅie e Ssé ka cʉa pɔ́ mǒ tá ńgÿo pi tsẅɛ́. Pi ka jú’ pú’u, ńzáb tʉ́m gẅi ná Kristo, e Ssé cÿɔ’ɔ liŋé yé ná pi, ńdɔgɔ ńnyɛɛ ngie pi ee pʉ̀a pé. Yɛ̌ liŋé gwɔ́ Zẅìge Ndʉalʉ̌a gie à la ka’ ngie à ge náa mbwo pege. 14A Zẅìge Ndʉalʉ̌a lɔgɔ ńgwɔ́ zyè ssé nà fù’ gie e Ssé la cwoŋte ńzáb lénáa mbwo pʉ̀a pé. E Ssé lɔgɔ ńnyɛte shwóŋó wégè ngie pege ge lá’ gẅiin setsɔ́ á fʉ̀’ gie à ge lá’ pú kẅile wégè nà nò tepòŋ. Pá’ áa pú’u la, pege ne ńgu’te Ssé á nue à gú’ tɛ’.
Pɔl ne sẅíŋte Ssé nà twó pʉ̀a Kristo pie ée Efeso
15Pá’ mèŋ n ka jú’ ngie pi ne ńkẅi’i ńzába ntʉ́m gẅi ná Cʉ̀apʉ̀a Yěsô, ńgíŋe ńjú’ ngie pi ne ńkwoŋo pʉ̀a Ssé métsèm lá, 16mèŋ n gee fʉ̀’ ntsèm ńně sẅíŋte Ssé, ḿbiŋe síe yé nà twó sí. 17Mèŋ n ne sẅíŋte e Ssé Cʉ̀apʉ̀a wege Yěsô Kristo, yé Tá gẅie à gẅiin legú’, ngie à náa gẅi zsé nò, ńnáa gẅi shÿó lélɔg ńcwoŋo ńzsé yé tà shwóŋó nò. 18Mèŋ n giŋé ne sẅíŋte yé, ngie à gÿo ntʉ́m gẅi zsé kyɛ̀’ yé légwɔ́ gie pi ge cwoŋo zsé mmó gie à lɔ̌ɔn ńtóŋo gẅi ńtí yɛ̌. Mbɔɔ pá’ pi ge zsé máamaa fù’u mbòŋo gie pia petsɔ́ pʉ̀a pie à la tsɔ́’ɔ wɔ́b ge gÿo kẅé, á gwɔ́ mmó gie à la cwoŋte ńzáb né pi. 19Mèŋ n giŋé ne sẅíŋte yé ngie à gÿo pi zsé ngie metʉ̀ mé pú fáŋ ńcʉa metʉ̀ ntsèm, mbɔɔ ngie à gÿo pi zsé pá’ mɛ̌ metʉ̀ tóonte wégè pàzáb ntʉ́m ná ye pú’u. 20Mɛ̌ metʉ̀ ée mie e Ssé la lɔg ńgÿo Kristo zíme tsetsɛ̀ɛ mepfó, á lɔg ńgÿo á kwɔ́’ né tÿǒ lepwó ńnéŋe nà gwoŋó pwó yé, ye tʉ̀. 21Á gwɔ́ jʉ’ó ńdɔgɔ ḿbú ńcʉa ngwòŋ *mecÿɔ́’ Ssé pâ mefùɔ pɔ́b mbɔɔ setsɔ́ shúm sie é gẅiin metʉ̀ tÿǒ lepwó. Á cʉa mânyìŋ ntsèm tà pá’ angàŋ lɔɔn ńgwɔ́ pɔ́ wɔ̌ wɔ́ɔ, kà pɔ́ ná yɔɔn kème njÿó wɔ́ɔ, kà pɔ́ ná gie á ge lá’ tá tó wɔ́ɔ. 22E Ssé léen ńnéŋ shúm ntsèm á mbwo yé. E Ssé la gwɔ́ tà ńnéŋe kɔ̀ɔkɔ́ɔ nà mbwo mé, ńgÿo á gwɔ́ mbwo cú’tè pʉ̀a Ssé, ńgwɔ́ twó, légwɔ́ gie pʉ̀a cú’tè ge ne jú’u ncwò yé. 23Acú’tè pʉ̀a Ssé ée mbùm nnɛ́ Kristo. Áa tsɛ̀ɛ cú’tè pʉ̀a pé fʉ̀’ ntsèm, yé gẅie à pǔ ńgwɔ́ jʉ’ ntsèm tsɛ̀ɛ njÿó.
Currently Selected:
Efeso 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.