YouVersion Logo
Search Icon

3 Jâŋ 1

1
Atsyɛ̀’te
1Mèŋ nkẅè mvfò tsɛ̀ɛ cú’tè pʉ̀a Kristo, n náa yɔɔn ŋwà’ne mbwo gù Gaẅis, á shǔ wɔ̀ɔn we tʉ̀ nzẅìŋ. Mèŋ n kwoŋo gú nue pɔgɔ pǔ ńtyé nà nénʉ́. 2Ashǔ wɔ̀ɔn we tʉ̀ nzẅìŋ, mèŋ n ne ńtsɔ́ɔn ngie ɔ̀ jú’ mboŋó nà kɔ̀ɔkɔ́ɔ, esoŋ nnɛ́ gú tʉte pá’ ɔ̀ ne ńtʉte ná nò Kristo lɛ. 3Anò ka zɔɔn ḿboŋo wɔ̀ɔn tɛ’, á nue tsɔ́ mefɛ́ pege ka tǒ jʉ’ɔɔn, éshwóŋó wɔ̀ɔn ngie ɔ̀ kě ńda nnɛ́ pɔ́ nà nò nénʉ́, ḿbiŋ ńne ńgiŋe jú pɔ́ pá’ á ne ńzɛ́te. 4Awɔ̀ɔn máamáa lekág à gwɔ̌ pɔ́ lé jú’ ngie penkʉ́ pɔ́ɔn ne ńgiŋe pɔ́ pá’ nò nénʉ́ ne ńzɛ́te.
Gaïus zsě pɔ́ ndà’ nò Yěsô
5Ashǔ wɔ̀ɔn we tʉ̀ nzẅìŋ, ɔ̀ zsé jú pɔ́ ndà’ Kristo, ɔ̀ kẅéte mefɛ́ mefɛ́ tà mbɔɔ pie é gwɔ́ pɔ́ megʉ̀. 6Pɔ́ ka tyě tsɛ̀ɛ cú’tè pʉ̀a Kristo, éshwóŋ pʉ̀a pá’ ɔ̀ ka kwoŋo wɔ́b pú’u, ńnáa wɔ́b mmó gie á ge kẅéte wɔ́b mánzsè, ńzsé ngie pɔ́ ge giŋe ná ńtí gie á ne ńzɛ́te ngie pàfa’a fà’a Ssé giŋ pú’u. 7Á nue pɔ́ kéen ńcʉ́me mánzsè pɔ́ léfa’a fà’ Kristo, ḿbiŋ ńké tè ne ńzẅíŋe lékẅé mmó gie á fóo mbwo pà tè zsé Ssé wɔ́. 8Pú’u la, pege pʉ̀a Kristo gẅiin lékẅéte mefɛ́ mefɛ́ pá’ pɛ̌, légwɔ́ gie pega pɔ̌ ge lɔg púte gÿo nò nénʉ́ sa jʉ’. 9Mèŋ n ka ŋwe’e mékème ŋwà’ne, ńnáa tsɛ̀ɛ gí cú’tè pʉ̀a Kristo, tá Ndiotelɛf gẅie à kwoŋo lézá’te mvfò mânyìŋ ntsem lʉ’ʉ lé jú’u nò gie mèŋ n gɔɔn tsoló. 10Áa mmó gie á gÿo mèŋ n ge gÿo tó tà ńkúu tsetsɛ̀ɛ pi, é kem menò tepòŋ mie á gÿǒ, é gíŋe shwóŋ pʉ̀a shwóŋè tepòŋ mbɔɔ cÿɔ̌ nò gẅie à gɔɔn ná peg. À tè gÿo pɔ́ ndà’ pú’u wɔ́, à lʉ’ʉ lékúe mefɛ́ mefɛ́ pie ée megʉ̀, ńgíŋ ńtɔ’ mbɔɔ petsɔ́ pʉ̀a lékúe wɔ́b, tà fóo tsɛ̀ɛ cú’tè ńjwoŋo pʉ̀a pie é ne fa’a lékúe wɔ́b. 11Ashǔ wɔ̀ɔn we tʉ̀ nzẅìŋ, pɔ́ɔn lépí fʉ̀’ nò tepòŋ, pí pɔ́ fʉ̀’ nò mbòŋo. Nyìŋ gẅie à gÿo nò mbòŋo aa Míŋ Ssé, nyìŋ gẅie à gÿo nò tepòŋ à tè Ssé zsé, 12ńgʉa ná Ndermetelẅis, mbà wɔ̌wɔ́ɔ kíme yé pɔ́ mbòŋ. Ntí gie à ne ńdɔgɔ ńgiŋe ná mánzsè nò nénʉ́ ne ńda’te ngie mefà’ mé ée mbòŋ. Peg yég ne ńkíme yé pɔ́ mbòŋ, ɔ̀ piŋ ńne ńzsé ngie peg lɔgɔ shwóŋó nò.
Tsyɛ̀’te lɔg ńzsote
13Mèŋ n kě ńgẅiin menò tà é gyɔ́ɔn gyɔ̌ɔn mie ńgwɔ́ mèŋ shwóŋó gú, tá mèŋ n gyǎ ngie n te ŋwe’e ŋwe’e wɔ́. 14Mèŋ n ne ńkwaa létó ńgyá gú, pɔgɔ ńnéŋe ssé shwóŋó. 15E Ssé ne ńnéŋe sẅétè ntʉ́m gù. Meshǔ pege pé jʉ’ɔɔn tsyɛ’té gú. Tsyɛ’te meshǔ pege pe jʉ’ɛ pà wémɔ’ɔ́ wémɔ’ɔ́.

Currently Selected:

3 Jâŋ 1: NGBM

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy