2 Timote 1
1
Atsyɛ̀’te
1Yɔɔn ŋwà’ne fóo mbwo mèŋ Pɔl, ngàŋ ntúm Yěsô Kristo, mbà Ssé zɔ la kwoŋ ngie n gwɔ́ wɛ̌. Ayɔ́ɔn fà’ gwɔ́ légʉa ńgɔɔn nò ná le gwɔ́ gẅie e Ssé la ka’ ngie pʉ̀a mesoŋ ge gẅiin é zẅɛ́’ɛ Yěsô Kristo. 2Mèŋ n naa yɔɔn ŋwà’ne mbwo gù Timoté, gù míŋ wɔ̀ɔn, n kwoŋo gú tɛ’. N ne ńdúɔ mbwo Tá wege Ssé mbɔɔ mbwo Cʉ̀apʉ̀a wege Yěsô Kristo ngie pɔ́ ne ńgwɔ́ né gù, ńne ńtsɔ́ɔn mezìŋe mú, ńne ńnéŋe sẅétè ntʉ́m gù.
Pɔl ne ńkẅiŋte Timoté ngie à ké zsé pɔ́ ndà’ Yěsô
3Mèŋ n ne ńnáa ndǎg mbwo Ssé nà twó jú, e Ssé gie mèŋ n gu’te lê ntʉ́m mbòŋo pá’ pà mangʉa njʉ’ peg la gu’te yɔ́b. Áa fʉ̀’e zsó kà lêtsẅɛ́’ wɔ́, mèŋ n gwɔ́ sẅíŋte Ssé, n te nyé té kím lezíŋ shú wɔ́. 4N daa lege pá’ pɔgɔ la gwaa fege ɔ̀ lʉa wɔ́. N ne ńtsɔ́ɔn tɛ́’ pá’ à lɔɔn ńgwɔ́ n gíŋe ńgyá gú, anò poŋo wɔ̀ɔn. 5N daa lege ngie ɔ̀ záb ntʉ́m ná Yěsô Kristo tà shwóŋó nò wɔ́, n te lege ngie má gù we ndÿò Lowas tà mbɔɔ má gù Eunis lɔ̌ɔn ńgÿo pɔ́ pú’u wɔ́. N zsě ngie mbàa gù jú ɔ̀ giŋé ńzáb ntʉ́m ná Yěsô pɔ́ pá’ pɔ́b.
6Áa mmó gie á gÿo mèŋ n ge kẅiŋte gú ngie, ammó gie n ka záb mbwó mɔ́ɔn twó gù, e Ssé cÿó gʉm jú, ɔ̀ ku’u légÿo, tè lɔg ḿma’a kwàŋ. 7A Zẅìge gie Ssé ka zɔɔn ńná né pege á té gie á gÿo pege nẅíin nẅǐin wɔ́. Tà ńcʉ́’ pú’u, mbà Zẅìge yé néŋ pɔ́ metʉ̀ ná pege tɛ’, ńgÿo pege kwoŋ pʉ̀a mesoŋ tɛ’, ḿbiŋ ńkú’te mbùm yege mboŋó.
8Pú’u la, tè kú shʉ́ légɔɔn mmó gie ɔ̀ zsé ná Cʉ̀apʉ̀a wege. Tè kú shʉ́ mbɔɔ ná mèŋ pá’ mèŋ n gee ndá tsǎŋ ńtí yé. Zẅíŋ jú pɔ́ légyá ngɔ́’ pá’ mèŋ, ńdɔg ńgÿo Nkʉ̀ Mbòŋo sa jʉ’, ńzẅɛ́’ pɔ́ metʉ̀ mie e Ssé náa mbwo gù. 9À la gÿo pege tsẅɛ́, éfaga wégè ńdɔg ńgÿo pʉ̀a pé. À lɔ̌ɔn těen ńgÿo pú’u, éfóo pɔ́ nà mefà’ mbòŋo mie pege fǎ’ wɔ́, à la cÿó pɔ́ gʉme yégè. Pú’u, mbà njÿó la nyé pɔ́ tè gwɔ̌ wó, kwà’ yé zɔ̌ záb ngie à ge gÿo lɔgɔ Yěsô Kristo, é gÿo pú’u, ná pege. 10Áa fʉ̀’ɔɔn, mbà yɛ̌ nò mbòŋo kéen ńkẅɛɛ mángyɛ̌, á nue Yěsô Kristo gẅie à gÿo pege tsẅɛ́ɛ, à kéen ńtó. Yé zɔ ka gwoon legwé ńkẅé metʉ̀ mé. À ka tsẅi nkʉ̀ mbòŋo mbwo peg, ńnyɛɛ le gwɔ́ tèmi tà peg ne ńzsé. Á le gwɔ́ gẅie nyìŋ gẅiin à tè gíŋe ńkwé wɔ́.
11E Ssé ka nǎ fà’a létsẅi wɔɔn nkʉ̀ mbòŋo á mbwo mèŋ, pá’ mèŋ n ge gwɔ́ ngàŋ ntúm we é piŋ ne la’te mmó mbwo pʉ̀a. 12Mèŋ n gyá yɔɔn ngɔ́’ fʉ̀’ɔɔn pá’ɔɔn ńtí pɔ́ pú’u. Tá’, eshʉ́ ké tè ne ńkúu wɔ̀ɔn mǒ wɔ́, á nue mèŋ n ne ńzsé nyìŋ gẅie mèŋ n zába ntʉ́m ná yé. N cwoŋo ńne ńzsé ngie e Ssé gẅiin metʉ̀ lélɔg ńku’u lékábte nò gie à la cʉ́me mbwo mèŋ, tà lá’ kúu nà lyɛ’ɛ́ lá’ nzsònzèm.
13Timoté, ne ńkímte shwóŋè nénʉ́ gie ɔ̀ la jú’u ncwò mèŋ, ńne ḿbíi fʉ̀’ mǒ, ńzí’i pʉ̀a pú’u. Záb ntʉ́m gú pɔ́ nà Ssé, ńne ńkwoŋo yé pá’ peg pie peg la la nnɛ́ ná Yěsô Kristo peg gÿo pú’u. 14A Zẅìge Ssé gie áa ná pege kẅéte gú. Ɔ̀ le zẅíŋ nyìŋ gʉa ná nò mbòŋo gie mé la cʉ́me mbwo gù ńkúbe tsɔ́ mmó wɔ́. 15Ɔ̀ ne ńzsé jú pá’ pʉ̀a ná pàga ngwòŋ Azia kéen ḿbú ńgwá’a wɔ̀ɔn métsèm tà mbɔɔ Figele pɔ́ Hergène yɔ́b. 16Mèŋ n ké ne ńdúɔ mbwo Cʉ̀apʉ̀a ngie à gÿo nò mbòŋo ná tsìŋe ndá Onésifor, ńdúɔ pú’u, Á nue à neŋé ńnéŋ ntʉ́m wɔ̀ɔn tɛ’, à laa kú shʉ́ ná mèŋ pá’ mèŋ n gee ngàŋa tsǎŋ wɔ́. 17À la lêen ńkúu *Roma wɔɔn, ḿbáte jʉ’ gie mèŋ n gee wó tà ńdá’ ńgyá wɔ̀ɔn. 18Mèŋ n ne sẅíŋte ngie Cʉ̀apʉ̀a lá’a lyɛ’ɛ́ létsɔ́’te ntsaŋ ńgÿo nò mbòŋo ná ye. Kwà’ gù ne ńzsé pá’ n da nyé Efeso á kẅéte wɔ̀ɔn pú’u.
Currently Selected:
2 Timote 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.