1 Tesalonika 1
1
Atsyɛ̀’te.
1Mèŋ Pɔl, n ŋwe’e yɔɔn ŋwà’ne á nà lezíŋ séga Silase mbɔɔ Timoté, ńnáa mbwo pʉ̀a cú’tè kristo, pie ée Tesalonika, ńgwɔ́ pʉ̀a Ssé Tá, ńgíŋ ńgwɔ́ pʉ̀a Ndè Yěsô Kristo. E Ssé ne ńgwɔ́ né pi, ńne ńnéŋe sẅétè ntʉ́m pi.
Ntí gie pʉ̀a Tesalonika lɔg ńzáb ntʉ́m nà Ssé ḿbiŋ ńnéŋe pú’u
2Peg neŋé síe Ssé fʉ̀’ ntsèm ńtí gẅí, ḿbiŋ ńne sẅíŋte Ssé fʉ̀’e kɔ́ wɔ́, ńkwaŋte gẅi kwaŋte. 3Peg ne sẅíŋte Tá wege Ssé fʉ̀’e kɔ́ wɔ́, ńkímte pá’ pi lɔg pá’ pi záb ntʉ́m ná Yěsô éfa’ mefà’, ńkímte ntí fà’ gie pi lɔg nkwòŋe éfa’, ḿbiŋ ńkímte pá’ pi ne ńzẅí’te Cʉ̀apʉ̀a Yěso Kristo té kʉ́a.
4Mefɛ́ pég, peg ne ńzsé ngie e Ssé kwoŋo gẅí, mbà à la tsɔ́’ɔ gẅi ńdɔg ńgÿo pʉ̀a pé. 5Á nue peg ka tè lɔg pɔ́ shwóŋè ndà’ ńtsẅi nkʉ̀ mbòŋo lá’ pi wɔ́, peg ka lɔg pɔ́ metʉ̀ Zẅìge Ndʉalʉ̌a, ḿbiŋ ne ńcwoŋo ńzsé ngie Nkʉ̀ gẅie peg kɔ̌ɔn ńtsẅii kaa nénʉ́, pi ne ńzsé mmó gie peg la gÿo fʉ̀’ gie peg laa tsetsɛ̀ɛ pi, á la gwɔ́ pɔ́ lélɔg ńkẅéte gẅí. 6Pi la pí fʉ̀’ ná peg, mbɔɔ ná Cʉ̀apʉ̀a. Mé tsɛ ne ńnyɛɛ gẅi ngɔ́’ tɛ’ tá’, pi lɔgɔ lekág gẅie à fóo mbwo Zẅìge Ndʉalʉ̌a, ńzẅíŋe shwóŋè Cʉ̀apʉ̀a. 7Pú’u, pàzẅíŋe shwóŋè Ssé pie ée Makedonia mbɔɔ Akay píi fʉ̀’ ná pi.
8Ashwóŋè Cʉ̀apʉ̀a la zɔɔn fó pɔ́ tsetsɛ̀ɛ pi, ńjÿó pàga ngwòŋ Makedonia mbɔɔ ye Akay. Tá mé ké ńgwɔ́ jʉ’ ntsèm ńzsé ntí gie pi lɔg ńzáb ntʉ́m nà Ssé, tà ńgwɔ́ peg le gíŋ shwóŋó nyìŋ shwǒŋ wɔ́. 9Mé ńnéŋe shwóŋ ntí gie pi la lɔg ńkúe wég, á fʉ̀’ gie peg la tóo tsetsɛ̀ɛ pi, mbɔɔ ntí gie pi la lɔg ńtém nzèm shúm sie mé gu’te ngie ée messé, ésele nnɛ́ ńdíe Ssé ye nénʉ́, ńcʉ́’ʉ fa’a pɔ́ mbwo yé gẅie aa ntentʉ́. 10Pú’u, ńcʉ́’ʉ ńzẅí’te pɔ́ ngie Míŋ we fó tÿǒ lepwó ńtó, Míŋ we ŋwɛ́ aa Yěsô, mbà Ssé la zíme yé nà legwé. Yé zɔ ne ḿbe’e wégè nà ngʉ̀ngʉ̀ gie e ne ńtóo.
Currently Selected:
1 Tesalonika 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.