Abdías 1
1
Edom swira daukan kabia ba
1Dahra aisaia bîla kum Dawan mita Abdías ra param marikan ba, witin baha bîla ba brin.
Smalkanka bîla kum Dawan wina
wan win ba, yang nani walri;
bîla twatwilkra kum ba nisan nani ra waia taki wan
witin nani ra wiaia:
“¡Man nani bus! ¡Kaisa yawan Edom mapara
war aiklabaia waia!”#Ais 34.5-17; 63.1-6; Jir 49.7-22; Isi 25.12-14; 35.1-15; Em 1.11-12; Mal 1.2-5.
Dawan Gâd Edom ra naku wisa:
2“Man ba nisan nani tilara
yang sirpi pali mai daukaisna,
bara yang mâya pali ra mai batakaisna.
3Il walpaya tara baiwanka nani bilara
laih purara iwisma bamna,
kupiam prautka mita kunin mai munan sa, bara wisma:
¿Ya pali mita naha wina ai batakbia?
4Yakal tara pâli baku purara pali uli
slilma nani tilara wamtla mâkma kra,
sakuna baha wina yang mai batakamni.”
Dawan ba kasak aisisa:
5“Âimplikra nani tihmia ra bal
dukiam nani implikan kata sin,
dukiam nani sut pali briaia apia kan;
wain mâ dakbi uplika nani
man ra balan kan kata,
tila mâ nani kau tnawa nani ra swiaia kan.
Ban sakuna waihlam nani balan ba
lika, dukiam nani kumi sin swiras,
sut pali aihwa brin.
6¡Isau,#Isau, Edom kuntrika nina wala ba. nahki pali dukiam nani ba baku aihwa implikan!
¡Dukiam kukanka nani kata ba, titikbi implikan ba!
7Man wal uplikam nani takan ba sut, kunin mai munan;
tasbayam pali wina sin mai kangban,
uplikam pali aihwa nani ba mita sin
man mampara buan, witin nani ra luki tniwi katma ba
uplikam nani bui minam alkaika yabalkam ra mangkan.
¡Edom lika sins lâka âpu!”
8Dawan ba kasak aisisa:
“Yang Edom ra klala yabamna yua ra,
Isau ilka nani ra upla sinskira nani bâra ba,
sinska lâka ba sauhki âpu daukamna.
9Temán ra war aiklaklabra nani bâra ba
sibrin mita tatatwi kabia.
Isau ilka nani tilara upla kumi sin raya kabia apia.
Edom pâtka nani ba
10“Swiram dauki mai slingbi
mai tikan lâka ba wal man puramra bâra ban kabia,
man muihkam Jekob ra rausauhki ikram ba tâwan.#Jl 3.19.
11Waihla nani bal tawan bilara
dukia kukanka nani ba impliki kan ba ra,
suldiar nani kuntri wala wina bal
Jerusalem tawan getka ba kriki kan ba ra,
¡man muihkam tâwan aisaras tnaya ra tawram!
Diara nani witin nani brin ba lat lulki
kaiki ai mânka tilara yui brih wan,
¡bara man sin witin nani daukan ba baku daukram!
12Man muihkam sari lâka tara ra kauhan ba kaiki
baha yua ra lilia takaia apia kapram.
Juda sauhki tikan yua ba,
baha kaiki lawaska kikaia apia kapram.
Witin nani ai sarka tara bri kan yua ba
man lawaska kikaia apia kapram.#Law 137.7; Ina 4.21.
13Man ba yang tawanki ra dimaia apia kapram
pât wahwi kan ba yua ra.
Lilia briaia apia kapram
trabil bri katna piua ra,
man implikaia apia kapram yuyaka nani ba
pât bri kata yua nani ra.
14Yabal bîla wâl kilwi ba kat
bûi kaikaia apia kapram,
baha nani swakwaia plapi aula nani ra ikaia daukram ba;
baha ai pâtka tara yua ra
ai waihla nani wina plapi kan ba
waihla nani mihta ra mangkaia apia kapram.
15Upla wala nani ra dîa daukram ba,
man sin baku mai daukbia.
¡Dîa daukram ba mana kulki maikan kabia!
Israel ba kli purara bukan kabia
“Dawan ai warkka nisan nani sut mapara daukaia yua pat baila sa.
16Kâp tahpla pali ba man nani
yang ilki holikira ra diram ba,
baha tahplika kan ba baku
nisan wala nani sin dibia,
kwatbi langki witin nani dibia,
sut âpu pali takbia ba kat.
17Sakuna Saion ilka holi ra
swakwaia pliska kumi bâra kabia,
bara tila upla bahara dimi swak takbia.
Jekob kiamka nani ai tasbaya nani ba kli bribia.
18Jekob bara Josep kiamka nani ba
pauta aswan bâra lakwi ba yabia.
Bara Isau kiamka nani ba
twi lâwan baku takbia,
bara baku baha pauta aswan buki klauhi ba mita
twi lâwan nani ba angki âpu daukbia.
¡Isau kiamka wina, kumi sin swak takbia apia!
Yang, Dawan, baku aisisna.”
19Israel luhpia nani Négueb wina bal, Isau ilka tasbaya nani ba bribia; bara twi langnika tasbaya ra iwi nani ba bal filisteo nani tasbaya ba alki bribia. Israel luhpia nani Efraín tasbaya Sameria sin alki bribia; bara Benjamín lika Galaad tasbaya alki bribia. 20Israel luhpia nani priski brih wan kan ba wina kli balan nani ba bal Kenan wina Sarepta kat ai tasbaya piarkika ba ban alki bribia. Jerusalem wina priski brih wan kan nani Sefarad ra bâra ba, baha nani sin bal Négueb tawanka tara nani ba alki bribia. 21Baha nani sut pura lui buaia karnika ba wal, bal Saion ilka ra uli wabia Isau ilka nani tasbaya lâka daukaia. Bara Dawan lika baha nani kingka aimaki kabia.
Currently Selected:
Abdías 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua