2 Samuil 1
1
Debit ba Saúl pruan sturka walisa
1Saúl pruan ba ningkara,#1 Sa 31. Debit Amalec uplika nani ra aiklabi pura lui si#1 Sa 30. kli Siclag ra wan, bahara yu wâl takaskan. 2Sakuna yu yumhpa luan ra Saúl kiamka wina waitna kum balan, prâka kalwan, ai lal ra sin tasba yakaban sari tukinka baku. Witin Debit lama kat bal ai lal tasba ra bawi kulkanka yaban. 3Debit bui witin ra makabi walan:
—¿Man ani wina aulma?
Waitna ba pana win:
—Israel kiampka wina, yukuwi swakwi plapi aulna.
4Debit bui witin ra taibi muni, makabi walan:
—¡Bamna, ai wis! ¿Dîa pali takisa?
Witin pana win:
—Aiklaklabra nani ba war wina plapan, bara witin nani manis pruan. ¡Bamna Saúl ai luhpia Janatan wal sin pruan!
5—¿Man nahki tânka briram, Saúl bara ai luhpia Janatan wâlsut pruan ba? —Debit bui baku makabi walan sturka bri balan albika ra. 6Waitna ba pana win:
—Yang tâinka briras nahki, sakuna Guilboa ilka ra kapri ba ra, kaikri Saúl ai langsika purara ai tâ baiki bâra kan, bara waihla nani ba sin aras ra uli wagin nani bri pat lamara aula kan alkaia. 7Baha kat witin ai ninara tawi ai kaiki ai winan, bara yang dîa ai wibia ba kat aitani luki kapri. 8Bara makabi walan yang ba ya. Pana wîri, yang ba Amalec uplika kum sna. 9Bamna yang ra maikaban ai lamara wamna bara witin ra ikamna ai win, kan witin kau raya kan sakuna prura wirhika ba pat taiban kan. 10Baku yang lika witin ba lamara wih bara ikri, kan tânka briri witin kauhan ba wina kli lika buaia apia kan. Ningkara, lal wina kraunka ba sakri, bangkilka ba sin klahkla ra bri kan ba, baha nani man ra bri balaia dukiara, mâsiki waitna.#1 Sa 31.1-6; 1 Kr 10.1-6.
11Bamna Debit bara ai uplika nani sut, ai prâka kalkan ai kupi wirha diman ba tânka, 12bara Saúl ai luhpia Janatan wal pruan ba dukiara ini, ai kupia wirha pali brin, Israel luhpia nani, Dawan war aiklaklabrika nani ra waihla nani bui pura luan ba dukiara, bara kaiki sin plun piras ban tutni kat kan. 13Baha ningkara, Debit kli makabi walan baha wahmika bîla bri balan ba ra:
—¿Man ani wina?
Witin pana win:
—Yang na upla kiamka wala kumi sna Amalec wina.
14Debit ai bîla baikra karna saki aisin:
—Alai, ¿baku kan nahki man kupias taki, Dawan bui bâk saki mangkan kingka ba mapara mihtam bukram? 15Bara ai uplika kum winan balan bara win:
—¡Naha bri si iks!
Bara witin bui Amalec uplika ba bri si ikan piua ra, 16Debit bui witin ra win:
—Prura pâtka ba man lamla ra sa, pâtkira sma damra ba man bui param aisi sakisma, Dawan bui bâk sakan kingka ba man bui ikram bamna.
Saúl bara Janatan wal dukiara inan lawana
17Bamna Debit naha inanka lawana na aiwanan, Saúl bara ai luhpia Janatan wal pruanka ba dukiara. 18Witin sin adar win Juda uplika nani ra sin smalkaia. Naha lawana na Kasakkira Wauhkataya ra ulban sa:#Jas 10.13.
19“¡Alai, Israel,
man nani pramna ba ilkam nani tilara insauhkan!
¡Tahplukam nani nahki kauhan ba!
20Gat uplika nani ra wipara,#Miq 1.10.
Ascalón yabalka nani ra sin sturka na aisapara,
filisteo mairin nani ba lilia takbia apia dukiara,
baha idan mairin nani ba sin lilia pulbia apia mata.
21“¡Guilboa ilka nani, man puramra
diwas laya kli kauhbia apia,
lî sin auhbia apia,
pruan nani langnika takram bamna!
Bahara karnakira nani kan kahbaika nani
baha nani ai mina ra taiban.
Baha ra Saúl kan kahbaika ba siksa takan.
22“Piua kumi ra sin Saúl bara Janatan
wal ai sordka bara ai trisbaika nani ba
war aiklaklabra tahpla nani tâlia bara
batanka ra buskras kaka, balras kata.
23“Saúl bara Janatan wal latwankira pali kan,
ai rayaka ra bara ai prurika ra sin
sip dakwi takras kan.
¡Yakal wal sin kau isti plapi kan!
¡Layan wal sin kau karna kan!
24“¡Israel luhpia mairin nani,
Saúl dukiara ins, witin bui
kwala balianta talia bara
linin painkira mai dingki kan,
gul dukia nani wal pramna dauki kan ba!
25¡Nahki tahplu nani ba war aiklabi langni ra kauhan!
¡Janatan ba man ilkam nani purara pruan!
26“¡Muihki Janatan,
man dukiamra kupi wirha pali sa!
¡Latwan lâka sâtka nani ai muni kapram!
Man latwankam ba,
mairin latwanka lâka ba pura luan.
27¡Tahplu nani nahki kauhan ba!
¡Aiklabaia dukia nani ba sut sauhki tikan sa!”
Currently Selected:
2 Samuil 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua