1 Korintus 15
15
Yesus Kristus hidup ulang
1Sudara-sudara, skarang kita mo kase inga lagi Kabar Bae tentang Yesus Kristus yang kita perna kase tau pa ngoni. Ngoni so tarima deng tetap kuat percaya Kabar Bae itu. 2Kalu ngoni tetap percaya Kabar Bae yang kita so kase tau pa ngoni itu, ngoni mo dapa slamat. Tapi kalu tarada, ngoni pe percaya itu jadi parcuma.
3 #
Yes. 53:5-12; 1Kor. 11:23; Gal. 1:12 Barang, dari samua ajaran yang kita so tarima dari Tuhan Yesus, itu suda yang kita so kase tau pa ngoni, kong yang paling penting itu bagini: Yesus Kristus so mati untuk tebus torang pe dosa-dosa, iko sama deng yang so tatulis di Kitab Suci. 4#Mzm. 16:8-10; Mat. 12:40; Kis. 2:24-32 Dia so dapa kubur, kong Tuhan Allah so kase hidup ulang pa Dia di hari yang ketiga, iko sama deng yang so tatulis di Kitab Suci. 5#Mat. 28:16-17; Mrk. 16:14; Luk. 24:34, 36; Yoh. 20:19 Abis itu, Dia so kase tunju Dia pe diri pa Petrus.#15:5: Di teks asli bahasa Yunani pake, Kefas, itu Petrus pe nama laeng. Abis pa Petrus, Dia kase tunju Dia pe diri pa Dia pe murit dua blas orang. 6Abis itu lagi, ada lima ratus orang lebe yang percaya ada bakumpul, turus Dia kase tunju Dia pe diri pa dorang samua satu kali. Dari dorang samua itu, ada banya yang masi hidup sampe kita tulis surat ini, tapi ada lagi yang so mati. 7Abis itu, Dia kase tunju Dia pe diri pa Yakobus, deng pa samua utusan yang orang sebut rasul.
8 #
Kis. 9:3-6
Kong yang paling terahir, Yesus kase tunju Dia pe diri lagi pa kita. Kita tara sama deng rasul-rasul yang laeng, karna Tuhan pangge pa kita jadi rasul di waktu yang tara sangka-sangka, itu sama deng ana kacil yang lahir bolong dia pe waktu. 9#Kis. 8:3 Sebenarnya kita ini tara pantas dapa bilang rasul, barang dulu itu, so kita ini suda yang jaga siksa pa Tuhan Allah pe jemaat. Karna itu, dari samua rasul, kita ini suda yang paling tara arti. 10Tapi kita jadi rasul skarang, cuma karna Tuhan Allah pe bae pa kita. Deng Dia pe bae itu tara parcuma. Mala dari samua rasul, yang karja karas itu kita. Tapi samua karja itu kita mampo biking bukang karna kita pe kemampuan sandiri, tapi karna Tuhan Allah pe bae pa kita. 11Jadi waktu ngoni dengar Kabar Bae itu, biar itu dari kita ka, dari orang laeng ka, samua itu tara masala. Yang penting torang so ajar Kabar Bae itu pa ngoni kong ngoni jadi percaya.
Orang percaya pasti mo hidup ulang
12Torang kan so kase ajar pa orang-orang, Yesus Kristus mati tapi so hidup ulang. Masa ada dari ngoni yang bilang kata, orang yang so mati tara akan hidup ulang? 13Kalu memang orang mati tara mungkin hidup ulang, itu berarti, Yesus Kristus me tara hidup ulang. 14Deng kalu Yesus Kristus me tara hidup ulang, samua ajaran yang tong so kase tau pa orang-orang itu me parcuma, deng ngoni pe percaya pa Yesus me tarada dia pe guna. 15Lebe-lebe lagi torang so bafoya tentang Tuhan Allah, bilang kata, Dia so kase hidup ulang pa Yesus Kristus. Padahal, kalu butul orang mati tara mungkin hidup ulang, itu berarti, Tuhan Allah me tara kase hidup ulang pa Yesus Kristus. 16Karna kalu butul orang yang mati tara mo hidup ulang, Yesus Kristus me tara hidup ulang. 17Deng kalu Yesus Kristus tara hidup ulang, ngoni pe percaya pa Yesus Kristus itu tarada dia pe guna. Kong ngoni pe dosa-dosa tara dapa ampun. 18Bagitu lagi orang yang percaya pa Yesus Kristus yang so mati, dorang pe dosa me tara dapa ampun kong dorang mo dapa hukum. 19Deng torang yang masi hidup, kalu torang baharap pa Yesus Kristus la Dia mo tolong pa torang cuma sampe di dunia ini saja, torang ini suda orang-orang yang paling kasiang dari samua manusia.
20Tapi yang butul itu bagini: Yesus Kristus mati kong Tuhan Allah so kase hidup ulang pa Dia. Dia itu yang pertama hidup ulang, kong nanti orang-orang percaya yang so mati me, dorang lagi akan hidup ulang. 21Barang, gara-gara satu orang pe dosa, itu yang biking samua orang musti mati, orang itu Adam. Kong karna satu Orang lagi, itu yang biking samua orang bole hidup ulang, Orang itu Yesus Kristus. 22Samua orang musti mati, karna iko pa Adam yang berdosa. Bagitu lagi, samua orang yang so satu hati deng Yesus Kristus, akan hidup ulang.
23Tapi samua yang akan hidup ulang itu iko dia pe giliran: yang kakamuka hidup ulang itu, Yesus Kristus. Kong nanti waktu Yesus Kristus datang ulang di dunia ini, orang-orang yang percaya pa Dia me mo hidup ulang. 24Waktu itu, dunia mo kiamat. Kong Yesus Kristus mo serakan ulang Dia pe kuasa sebagai Raja pa Tuhan Allah, Dia pe Bapa, karna Dia so kase kala Dia pe musu samua: samua yang bapimpin, samua yang ada kuasa deng samua yang ada pengaru di dunia ini. 25#Mzm. 110:1 Barang, Yesus Kristus musti tetap berkuasa sebagai Raja sampe Tuhan Allah kase kala samua Dia pe musu, itu sama deng Tuhan Allah taru samua Dia pe musu di Yesus Kristus pe di bawa kaki. 26Kong Tuhan Allah pe musu yang terahir yang Dia mo kase kala itu, kuasa yang biking orang mati. 27#Mzm. 8:7 Barang, di Kitab Suci so tatulis bagini, “Tuhan Allah biking samua yang malawang pa Dia ada di bawa Kristus pe kuasa.” Deng bagitu, torang jadi mangarti, samua-samua ada di bawa Yesus Kristus pe kuasa. Cuma Tuhan Allah saja yang tarada, karna Tuhan Allah yang biking sampe samua ada di bawa Yesus Kristus pe kuasa. 28Kong kalu samua so ada di bawa Yesus Kristus pe kuasa, Yesus Kristus sandiri sebagai Anak Allah mo kase Dia pe diri di bawa Tuhan Allah pe kuasa, karna Tuhan Allah itu yang so biking samua-samua ada di bawa Yesus Kristus pe kuasa. Deng bagitu, Tuhan Allah yang berkuasa pa samua-samua yang ada.
29Kong tentang orang mati yang hidup ulang, kalu ngoni bilang kata, orang mati tara akan hidup ulang, bikiapa kong ada orang yang dapa baptis untuk orang yang so mati? Kalu orang mati tara akan hidup ulang, bikiapa kong dorang mo dapa baptis#15:29: Waktu Paulus tulis surat ini, ada orang yang dapa baptis untuk orang yang so mati. Paulus tara bilang di sini apa itu butul ka sala. Dia cuma bilang, karna dorang baptis orang untuk yang so mati, itu kase jelas, dorang percaya, orang yang so mati akan hidup ulang. untuk orang mati? 30Kong torang lagi tiap saat ambe resiko mati karna kase tau Kabar Bae. Jadi kalu orang mati tara akan hidup ulang, tara ada dia pe guna torang ambe resiko macam bagitu. 31Itu butul sudara-sudara, tiap hari kita mangada siksa itu sampe amper-amper mo mati karna kita bawa Kabar Bae ini. Tapi kita bangga pa ngoni, barang ngoni so percaya pa Kristus Yesus, torang pe Tuhan. 32#Yes. 22:13 Kong kalu orang mati tara akan hidup ulang, tarada guna lagi kita mangada siksa dari kita pe musu-musu di kota Efesus sini. Itu sama deng kita ada baku mangada deng binatang-binatang jahat. Kalu memang orang mati tara hidup ulang, lebe bae torang biking bagini suda, “Mari tong bapesta rame-rame deng mari tong makang minum saja, karna beso torang so mati kong!”
33Ngoni so tau itu sala, jadi jang iko. Sama deng yang torang jaga dengar orang bilang bagini, “Kalu ngoni batamang deng orang yang pe kalakuang tara bae, ngoni pe kalakuang me akan beruba jadi tara bae lagi.”
34Jadi, ngoni musti sadar butul-butul, kong jang biking dosa lagi. Karna ada dari ngoni yang bolong kanal pa Tuhan Allah. Kita bilang bagitu la ngoni jadi malu kong bertobat.
Orang percaya mo hidup ulang kong dapa badan yang baru
35Tapi mangkali ada yang mo tanya bagini, “Bagimana orang yang so mati kong mo hidup ulang? Kong waktu hidup ulang, dorang pe badan macam bagimana?” 36Pe bodo skali orang yang batanya bagitu! Ambe conto bagini: kalu torang tanam bibit, bibit itu tara akan batumbu kalu bolong isi dalam tana. Itu sama deng dia mati dulu baru batumbu. 37Kong bibit yang tong tanam itu bukang tanaman yang so batumbu memang, tapi yang masi biji, macam deng bibit gandum atau bibit-bibit laeng. 38Tuhan Allah akan kase batumbu bibit-bibit itu masing-masing iko dia pe bentuk. Tuhan Allah biking bagitu iko Dia pe mau.
39Bagitu lagi deng samua yang hidup di dunia, masing-masing pe badan tara sama. Manusia pe badan laeng, binatang-binatang pe badan laeng, burung-burung pe badan laeng, deng ikang-ikang pe badan me laeng. 40Bagitu lagi deng samua yang ada di langit: ada matahari, bulan, deng bintang. Yang di langit itu pe hebat tara sama deng yang di dunia ini pe hebat. 41Matahari pe hebat, laeng deng bulan pe hebat. Deng bulan pe hebat, laeng dari bintang-bintang pe hebat. Kong bintang yang satu deng bintang yang laeng pe hebat baku laeng-laeng lagi.
42Bagitu lagi yang mo jadi pa orang mati pe badan waktu mo hidup ulang. Waktu orang mati pe badan dapa kubur, badan itu mo ancor. Tapi waktu dia hidup ulang, badan itu tara akan mati lagi. 43Waktu orang mati itu dapa kubur, dia pe badan so tara bagus deng so tarada kekuatan apa-apa lagi. Tapi waktu Tuhan Allah kase hidup ulang pa dia, dia pe badan so ganti deng badan yang luar biasa deng kuat. 44Badan yang dapa kubur itu pe asal dari dunia ini. Tapi badan yang Tuhan kase nanti waktu torang hidup ulang, itu badan dari Roh Kudus yang untuk torang di sorga.
Jadi kalu ada badan yang dari dunia ini, pasti ada lagi badan yang dari Roh Kudus. 45#Kej. 2:7 Itu sama deng yang so tatulis di Kitab Suci bagini, “Tuhan Allah biking manusia pertama yang pe nama Adam, jadi hidup.” Kong Yesus Kristus yang dapa sebut, Adam terahir itu, Dia yang kase hidup pa manusia. 46Tapi torang manusia pe badan skarang ini bukang dari Roh Kudus, tapi dari dunia ini. Nanti kalu torang so hidup ulang, baru torang dapa badan yang baru yang dari Roh Kudus. 47Manusia pertama Tuhan Allah biking dari tana, dia pe asal dari dunia ini. Tapi manusia yang kedua, yang torang bilang Yesus Kristus itu, Dia pe asal dari sorga. 48Samua manusia yang pe asal dari dunia ini, pe badan macam deng manusia pertama. Tapi manusia yang nanti mo hidup di sorga, dorang pe badan nanti macam deng Dia yang pe asal dari sorga. 49Skarang torang pe badan macam deng manusia pertama yang Tuhan Allah biking dari tana. Tapi nanti kalu torang so hidup ulang, torang pe badan akan jadi macam deng Dia yang dari sorga.
50Sudara-sudara, kita pe maksut itu bagini: torang pe badan yang dari dunia ini ada daging deng dara, jadi tara bisa maso di Tuhan Allah pe tampa Berkuasa sebagai Raja. Torang tara bisa tinggal di sorga deng badan yang akan mati deng ancor ini, karna di sorga tara ada yang akan mati. 51#1Tes. 4:15-17 Jadi dengar bae-bae, kita mo kase tau rahasia satu ini: tara samua torang yang percaya akan mati, tapi torang yang masi hidup ka, mati ka, torang samua pe badan akan beruba. 52Itu akan jadi tiba-tiba waktu trompet yang terahir babunyi. Karna waktu trompet yang terahir babunyi, orang-orang yang so mati akan hidup ulang, kong dorang pe badan mo beruba jadi badan yang tara akan mati lagi. Kong torang yang masi hidup, torang pe badan akan beruba jadi baru, 53karna torang pe badan yang bisa mati deng bisa ancor ini, musti beruba jadi badan yang tara bisa mati deng tara bisa ancor. 54#Yes. 25:8 Kong pas torang pe badan beruba jadi badan yang tara mati deng tara bisa ancor lagi itu, apa yang so tatulis di Kitab Suci dulu itu so jadi. Bagini yang tatulis,
“Tuhan Allah so kase kala kuasa yang biking orang mati.
55 #
Hos. 13:14
Ee, kuasa yang biking orang mati, so kala ngana!
Mana ngana pe bisa yang bisa biking orang sampe mati?”
56Dosa itu bisa biking orang mati, itu sama deng binatang pe bisa yang bole biking orang mati. Kong torang yang biking dosa musti dapa hukum, karna torang so langgar aturan-aturan di lima kitab Musa. 57Tapi torang bilang tarimakasi banya pa Tuhan Allah karna Dia so kase bebas pa torang dari dosa-dosa, itu sama deng Dia so kase menang pa torang. Dia kase menang pa torang karna apa yang Yesus Kristus, torang pe Tuhan so biking di kayu salib.
58Jadi sudara-sudara yang kita sayang, ngoni pe percaya musti tetap kuat. Jang kase biar ada yang pengaru pa ngoni sampe ngoni ragu deng ngoni pe percaya itu. Ngoni karja turus untuk Tuhan butul-butul, karna ngoni tau, apa yang ngoni biking untuk Tuhan itu tara akan parcuma.
Currently Selected:
1 Korintus 15: PB MMU
Highlight
Share
Copy
Want to have your highlights saved across all your devices? Sign up or sign in
Perjanjian Baru Bahasa Melayu Maluku Utara @ Lembaga Alkitab Indonesia 2020
