'Ba Filipia 'Diyi 2

E’yo Kristoni i ’bazo tokori pi Munguni eri ’bazu ururi be

1Asi omiza ka ovu Kristo ma alia ci, kani asi omiza letani, kani ti ecita Orindini, kani asi ndriza ale beri, kani yikini, 2emi ma fe ayiko mani ma ga tre, emini ovule dria asi alusi, ovuzu leta alu be, asisile alu i be, egata alu be indirisi. 3#Gal 5:26; Rum 12:10Emi ma ’ye e’yo awatasi ku, kani afu onzisi ku indi, te asisile afu kokorusi emi dria alu alu ma inzi emi agyi aga emini emi ngulupi inzilerile. 4#1 Kor 10:24, 33Emi alu alu ma ega e’yo emi ngulupini a’dule ku, te emi dria alu alu ma ega e’yo ’ba azinini indi. 5Emi ma ovu asisile ndra ovupi Kristo Yesu me aliari be emi ma alia, 6#Yoh 1:1, 2; 17:5; E’do 1:27; 3:5eri’i ovupi wura Munguni beri egani ndra e’ye ini ovuzu Mungu be tro tro ovu afa ini arile bizu i ma ngulupiniruri’i ku 7#Isa 53:3; 2 Kor 8:9; Ebra 2:14, 17te eri ’ba i ngulupi ovuzu tokoru erini wura ati’boni ’duria, erini ojaria ovuzu wura ’baniri be. 8#Ebra 12:2; 5:8; Yoh 10:17Te erini wura ’ba adaniri isuria ’bo, eri ’ba i va ovuzu inzita kokoru, e’ye erizu kpere dra tia, ada drata pati ruaari’i. 9#’Yeta 2:33; Efe 1:21; Ebra 1:3, 4E’yo ’disi Mungu ’be eri uru inzizaru tu, ru ru azini ’diyi agapi driari fezu eri dri, 10#Isa 45:23; Yoh 5:23; Eceza 5:13’dini u; Yesu’irisi ’ba dria ma osi kumuti va, kani ’ba ’bua ’diyi, kani ’ba nyakua ’diyi, kani ’ba angu valerua ’diyi, 11azini andre dria ma e’da Yesu Kristoni Opi’i, diza fezu Mungu Ata dri ani.

E’dazu talale wudrikuruari

12 # 1 Pet 1:17; Zab 2:11 ’Dinile, ’ba mani lele ’diyi, ekile emini e’yo mani erile o’du driarile, kiri mani ovuria emi be indiria a’dule ku, te curu’do agapiri mani ovuria yoria, emi ma nga azi pata eminirini rutasi azini rua yaza be; 13#Yoh 15:5; 2 Kor 3:5; 1 Tes 2:13a’disiku eri’i e’yo ’yepi emi alia fepi emini e’yo onyiru erini leleri lewazini ’yezu indirini ovule Mungu’irisi.

14 # 1 Pet 4:9 Emi ma ’ye e’yo dria onota kokoru azini agata gaza kokoru, 15#Azi 32:5; Mat 5:14; 10:16; Fil 1:10; Efe 5:8; Azi 32:5; ’Yeta 2:40emi ma ovu ani e’yo kokoru, inzo kokoru, anzi Munguni ezata kokoru, ’ba ambo be yi ojapi lokiriru ’diyi ma eselia; emi e’da yi ma eselia ekile talale wudrikurua, 16#1 Tes 2:19; Gal 2:2; Isa 49:4; 65:23emini e’yo idrini eceria; mani ngazu ma enyazu ani o’du Kristoniria, mani nzule toko ku, kani mani ma ecandile azisi oye kurisi. 17#Rum 15:16; 2 Tim 4:6Te yi ka nga ari mani osu edetaru, edeta kani azi ngaza a’ita eminirini ma dria, ma ovu di ayikosi tualu emi be dria. 18#Fil 3:1; 4:4’Dinile emi ma ovu vini ayiko be ovupi ayikosi ma be tualu indi.

Timoteo pi Epafrodito be

19Te ma ega ma asia Opi Yesu ma alia, Timoteo ma ti pezu emi vu mbeleru, mani e’yo emini nizu, asi mani omizu ani beni, 20#1 Kor 16:10A’disiku ma vu ’ba azini ovupi asisile ’dinileri be, ngapi e’yo emini egapi asi adarurisiri aluni yo. 21#2 Tim 4:10, 16; Gal 4:17Te ’ba dria yi e’yo yi ma ngulupini ndru, yi ndruni e’yo Yesu Kristoni ku. 22Te emi ni e’yo onyiru erini, erini azi ngazu ma be e’yo barini kuzu ekile mvani adrile azi ngale ata berileri ra. 23E’yo ’disi ma ega ma asia eri ti pezu mbele, ma ka nga e’yo ngapi i ’yepi ma vuri ni ’bo; 24#Fil 1:25te ma ovu a’itasi Opi ma alia egazu ace were ma ngulupini nga ca emi vu ra.

25 # Fil 4:18 Te ma milia eri onyiru ma ma pe adripi mani Epafrodito ma ti emi vu, eri ’ba azi ngapi ma be ovupi asikariru ma be tualu, ’ba emini tini epele alio mani ma aza kozuri’i; 26te eri ovu avasi tu lezu emi dria ndrezu, azini eri ovu candisi tu emini erile kini eri ovu azorurisi. 27Eri ovu ndra azoru ada, ’ye dra ra. Te Mungu ’ba yiki eri vu, te eri vu a’dule ku, ma vu indi, ma kazu candi isuzu candi azini ma dria ku. 28E’yo ’disi ma pe eri ma ti emivu avasi aga ra, ’dini emi ka eri ndre ra emi ma ovu ani ayikosi, te ma’i indi, candi mani ma azi ma nze ira. 29#1 Kor 16:16; 1 Tim 5:17E’yo ’disi emi ma a’i eri Opi ma alia ayiko driasi; te emi ma inzi ’ba ’dinile ’diyi inzi, 30a’disiku erini ndra ’yele drale azi Kristoni ma e’yosi, erini idri ini adile dra dririsi, eri ma fe ani azi emini ma ma aza kozu acepi nga ’yele kurini i dezu kililiro beni.

Currently Selected:

'Ba Filipia 'Diyi 2: LB66

Highlight

Copy

Compare