Yohana 14
14
Yesuni geri muzo Ata vuri ra
1 #
Yoh 14:27; Mar 11:22 Emi asi ma oti ku; emi Mungu a’i ra, emi a’i ma indi. 2Pari ’bani ovuzu ’diyi ovu ma Ati ma loa kakau; ka’dini yo, ma ndra olu emi tia ra, ma mu pari edezu emi dri. 3#Yoh 12:26; 17:24Ma ka mu, ka pari ede emi dri, ma nga emu dika, ma nga emi a’i ma vu, ’dini emi ma ovu pari mani ovuzuria alu indi. 4Emi ni: angu mani muzuri ma geri ra. 5Toma nga ’yo tinia, Opi, ama nini mi mu ngoari ku; ama di geriniri ni ngoni ngoni ya? 6#Ebra 10:20; Mat 11:27; Yoh 11:25; Rum 5:1, 2Yesu nga ’yo tinia, Ma gerini ma’i, ma e’yo adaruni ma’i, ma idrini ma’i ’ba aluni cani Ata vu ku, pe lu kiri ma vurisi ka. 7Emi ka ndra ma ni ra, te’do emi ni ma Atini alu indi; te engazu curu’do emi ni eri ra, emi ndre vini eri ’bo indi.
8Filipo ’yo eri tia, Opi, mi ece ama dri Atani, ’diri nga dri fu ama dri. 9#Yoh 12:45; Ebra 1:3; Mat 17:17Yesu nga ’yo eri tia, Ma ovu di emi be ewu kakau ’dipi, te mi nini nga ma kiri ku ya, Filipo? ’Ba ma ndrepi ’bori, ndre Atani ’bo; mi ’yo te kini, Mi ece ama dri Atani-ri ngoni ngoni ya? 10#Yoh 12:49Mi a’ini kini ma ovu Ata alia, Ata ovu ma alia indi ’dini ku ya? E’yo mani ’yole emi tia ’diyi ma oluni ma drisi ku; te Ata ovupi ma alia ’daniri eri ’yeta ini ’yeni. 11#Yoh 14:20; Yoh 10:25, 38Emi ma a’i kini ma ovu Ata alia, azini Ata ovu ma alia indi; ka ku emi ma a’i ma ’yeta nde ’diyi ma e’yosi.
12 #
Mar 16:19, 20 Ma ’yo emi tia ndi ndi, ’ba ma a’ipiri nga ’yeta mani ’yele ’diyi ’ye indi; eri nga vini ’yeta ’diyi agapi ra ’diyi ’ye, mani mule Ata vurisi. 13#Yoh 15:7; Mar 11:24; 1 Yoh 5:14E’yo ngoni ngori emini zile ma rusiri, ma nga ’ye ra, ’dini Ata ma isu ani diza Mvi ma alia beni; 14#Yoh 16:23, 24emi ka e’yo ngoni ngori zi ma rusi ti, ma nga ’ye ra.
Orindi Alatararuri ma e’yo azizuri
15 #
Yoh 15:10; 1 Yoh 5:3 Emi ka ma le ra, emi nga azita mani ’diyi ma ta mba ra. 16#Yoh 14:26; 15:26; 16:7; 1 Yoh 2:1Azini ma nga zi Ata tia, eri nga emi dri ’Ba emi Aza Kopiri azini fe, eri ma ovu ani emi be ’dani ’dani, 17#Yoh 7:39; 16:13; Mat 10:20; Rum 8:26eri Orindi e’yo adaruniri’i, nyakuni ecole a’ile kuri, a’disiku yi ndreni eri ku, yi nini vini eri ku indi; te emi ni eri ra, erini ovule emi be ’dani, azini erini ngale ovule emi aliarisi.
18Ma ngani emi ku imvoanziru ku; ma emu emi vu ra. 19#Yoh 16:16Ace were nyaku ngani ma ndre dika ku, te emi nga ma ndre ra; mani ovule idrirurisi emi nga ovu idriru indi. 20#Yoh 17:21-23O’du nde ’darisi emi nga ni ma ovu ma Ati alia, emi ovu ma alia, azini ma ovu vini emi alia indi. 21#2 Kor 3:18; 1 Yoh 5:3’Ba ovupi azita mani ’diyi be, yi ma ta mbapiri, eri ’ba ma lepiri’i; ’ba ma lepiri, ma Atini nga eri le ra, ma vini nga eri le indi, ma nga ma a ngulupi ece eri dri. 22#’Yeta 10:41Yudasi (ovupi Isikariote kuri’i) ’yo eri tia, opi, a’di e’yo ’ye ini, mini mi ngulupi ecezu ama dri te nyaku dri ku ya? 23#Yoh 13:34; 14:21; O’be 8:17; Mat 18:20; 28:20; Efe 3:17; 2 Kor 6:16Yesu nga e’yo omvi, ’yo eri tia, ’Ba ka ma le ra, eri nga e’yo mani ma ta mba ra; ma Atini nga Jeri le ra, ama nga emu eri vu, ama ga pari amani ovuzuri ede eri vu. 24#Yoh 7:16; 1 Yoh 2:5’Ba ma lepi kuri mbani e’yo mani ’diyi ma ta ku; e’yo emini erileri eri mani yo, te eri Ata ma ti epepirini.
25E’yo ’diyi ma ’yo emi tia ’bo, mani nga ovuria emi beria. 26#Yoh 14:16; Mat 10:19Te ’Ba ’ba Aza Kopiri, Orindi Alatararu, Atani ngale tini epele ma rusiri’i, eri nga emi imba e’yo driasi, eri nga fe emi ma ega e’yo dria mani ’yole emi tia ’diyi ra. 27#Yoh 1:16, 33; Fil 4:7Ma ku asi anzuru emi vu; ma fe emi dri asi anzuru maniri; te ma feni emi dri nyakuni felerile ku. Emi asi ma oti ku, emi ma ovu urisi ku indi. 28#Yoh 14:3, 6, 18; Luk 24:52Emi eri e’yo mani ’yole emi tiari kini, Ma mu ra, te ma emvi emi vu ra. Emi ka te ma le ra, emi te ovu ayikosi, mani mule Ata vurisi; a’disiku Ata aga ma ra. 29#Yoh 13:19Curu’do ma olu emi tia ’bo de nga e’yo nderi ’yeni i ku, ’dini eri ka nga i ’ye ra, emi ma a’i ani. 30#Yoh 12:31; Efe 2:2Ma ngani asi e’yo ’yo emi be kakau ku, opi nyaku ’dirinirini emulerisi. E’yo erini ma alia aluni yo; 31#Yoh 10:18; Mat 26:46; Mar 14:42te nyaku ma ni ani ma le Atani ra, ma adri ’ye ekile Atani e’yo azile ma tiarile. Emi nga, ama mu ’doarisi ra.
Currently Selected:
Yohana 14: LB66
Highlight
Share
Copy
Want to have your highlights saved across all your devices? Sign up or sign in
Bible in Lugbara © United Bible Societies, 1966.