Efuza 36

1 # Efu 28:3; 31:6; 35:10, 35; Yob 32:8; Isa 28:26; O’be 2:6; Efu 25:8; Lev 4:6; 19:30; Kal 18:5; 30:8; 1 Opi 6:16; Zab 96:6; 134:2; Isa 63:18; Eze 5:11; Dan 8:13, 14; Ebra 9:1, 2 Bezaleli pi Oholiaba pie, ’ba ondua be asia, Yehovani ondua ’bale yi ma asia e’yo vaza be, nizu azi ndu ndu pari alatararurini ’yezu ’diyi pie dria, yi ma nga azi e’yo dria Yehovani azilerile.

Musani ’ba ogazu afa ejizu dika kuri

2 # Efu 35:2, 26; 1 Sur 29:5 Musa nga di Bezaleli pi omve, Oholiaba be, azini ’ba dria alu alu ondua be yi asia ’diyi, Yehovani ondua ’bale yi asia ’diyi, yi ’ba dria alu alu yi ma asini yi engale emuzu azi nderi ngazu ’diyi; 3#Efu 35:27yi a’i Musa ma dria afa feza awa’diforu dria anzi Israelini diyini ejile azi pari alatararurini ’yezuri. Yi eji afa feza fele avasiri ’dani o’biti vusi o’biti vusi. 4’Ba onduou azi ndu ndu dria pari alatararuria ’diyi ’yepi ’diyi, dria alu; alu nga azi yini ’yeleri ku, 5#2 Kor 8:2, 3emu ’yo Musa tia kini, ’Ba yi eji afa aga azi Yehovani azileri ’yezuri ra. 6Te Musa fe azita, yi oji e’yoni pari yini hema asozuri ma eselia dria, ’yozu kini, Agupi kani oku ma fe afa azini awa’diforu pari alatararuniri di ku. ’Dini oga di ’ba nde dri afa azini eji kokorusi; 7a’disiku afa ovupi yi vu indi ’diyi ovu fudri azi nde dezu dria, aga vini tu.

E’yo ’bani Bere edezuri

8 # Efu 26:1; Yob 32:8; O’be 10:8; 15:14; 21:1; E’do 3:24; 1 Opi 6:23; 2 Sur 3:10; Eze 1:5-28; 10:1 ’Ba ondua be yi asia ’ba azi ngapi ’diyi eselia ’diyi, ede bere, bongo ’ileri be mudri; bongo mile be nyiriaruri pisi, biururi pie, okalakokalari pie, ekaruri pie, kerubi ma wura be sozaru ruaania, onduou ma dri pamvu. 9Bongo ’ileri alu alu ma zoza ovu wuale kali iri drini aro, azini bongo alu alu ma wala ovu wuale su; bongo ’ile ’diyi ma o’biza ovu dria tro tro.

10Eri eci bongo towi tualu yini yi ti isuzu yi agyi be, azini eri eci bongo towi azini ’diyi tualu yini yi ti isuzu yi agyi be. 11Eri tra bongo bluru anzirikule, eri eci yi bongo towi ’diyi ma bongo kalaari ma tia; eri ’ye ’dinile bongo towi azini ’diyi ma bongo kalaari ma tia indi; 12#Efu 26:5eri eci bongo traza anzirikule kali towi bongo aluri tia, azini bongo traza anzirikule kali towi bongo aziniri ma tia; bongo traza anzirikule ’diyi oti yi agyi be agyi be kilili. 13Azini eri ede afa eciza kali towi melesi bongo ti ecizu, eri eci bongo ma ti tualu afa eciza nde ’diyisi; bere ovu di ani alu.

14 # Efu 26:7 Eri ede bongo ndripodosi ’izu bere ma dria hemale; eri ede yi mudri drini alu. 15Bongo alu alu nde ’diyi ma zoza ovu wuale kali na kali na, azini bongo alu alu ma wala wuale su; bongo mudri drini alu ’diyi ma o’biza ovu dria tro tro. 16Eri eci bongo towi ’diyi tualu, azini bongo azia ’diyi tualu. 17Eri eci bongo traza anzirikule kali towi bongo towi ’diyi ma bongo kalaari ma tia, azini eri eci bongo traza anzirikule kali towi bongo azini azia ’diyi ma bongo kalaari ma tia. 18Azini eri ede afa eciza kali towi molasi hemani ecizu tualu, erini ovuzu ani alu beni. 19#Efu 26:14Eri ede afa hema a’buzuri kabiloago ma enyi ojale ekaru ’diyisi, azini drinia uru eri a’bu eri yianya ma enyirikosi.

20 # Efu 26:15; 25:5, 10; Kal 25:1; Azi 10:3; Yos 2:1 Bereni eri ede bau asarau patisi edrezaru. 21Bau alu ma oconi wuale mudri, bau alu ma walani wuale alu ali be. 22Bau ’diyi alu alu ovu sidrile be iri iri, yini yi ecizu tualu yi agyi be; eri ede bau bereni dria ’dinile. 23Eri ede bau bereni: kali iri kala uruleruria; 24eri ede ’bile dahaburu bau ma sidrile suzu ’diyi kali su, bau kali iri ’diyi ma etia, ’bile ’diyi iri bau alu etia, sini suzu iri tro alenia, azini ’bile ’diyi iri bau azini etia, sini suzu iri tro alenia. 25Azini eri ede bau kali iri bere ma kala iriri andraleruria 26’bile dahaburu yini kali su be, ’bile ’diyi iri bau alu etia, azini ’bile ’diyi iri bau azini etia. 27Eri ede bau azia ’bazu bere ma kala ngukualeru etuni ’dezurialeruria. 28Azini eri ede bau iri ’bazu bere ma kala ngukualeru, pari tinini yi ecizuria. 29#Efu 26:24; Zab 133:1; ’Yeta 2:46; 1 Kor 1:10Etinia yi ovu iri iri, te eri eci yi tualu uruleru emve aluri ma tia; eri ede yi iri tro ’dinile tinini yi ecizuria. 30Bau ovu aro, ’bile dahaburu yini be mudri drinia azia; ’bile iri ovu bau alu alu ma etia. 31#Efu 26:26Eri ede asarau pati rwe rwe, eri ede yi towi bau bere ma eje aluria ’diyi bizu, 32azini pati rwe rwe towi bau bere ma eje aziniria ’diyi bizu, azini pati rwe rwe towi bau bere ma nguku etuni ’derialeruria ’diyi bizu. 33Azini eri ede pati rwe rwe agaduari ma fi bau ma ruaasi aliasi engazu tini aluria cazu kpere tini aziria. 34Eri a’bu bau ma rua dria dria melesi, eri ede emveni melesi indi, pari pati rwe rwe ’diyini ovuzu aleniariru, eri a’bu pati rwe rwe ’diyi ma rua dria dria melesi indi.

35 # Efu 26:31; Mat 27:51; Ebra 6:19; 10:20 Eri ede bongo jo ale alizuri blururi pisi, okalakokalari pie, ekaruri pie, bongo mile be nyiriaruri pie; eri ede eri wura kerubinisi, onduou ma dri pamvu. 36Eri ede bongo nde dri asarau pati su ’bani ruani a’bule dria dria melesi, pati agoferu ’diyi; iwu yini ovu meleni, eri ede ’bile yini su dahabu rapi acisirisi. 37#Efu 26:36Eri ede bongo ’ile hema tiliari, bongo blururi pisi, okalakokalari pie, ekaruri pie, bongo mile be nyiriaruri pie, wura onduouni soleri be yi ma ruaa; 38#1 Opi 7:16; 2 Sur 4:12; Yer 52:22eri ede eri dri pati agoferu towi, iwu yini ’diyi be. Eri a’bu dri yini azini kali yini alazaru ’diyi ma rua dria dria melesi, azini ’bile yini towi ’diyi ovu molani.

Currently Selected:

Efuza 36: LB66

Highlight

Copy

Compare