2 कुरुन्थियों 2

1इधेरे तांइ मैं ए ठाणी लित्तेया थिया कि तुसा जो फिरी दुख दैणे तांइ ना आं। 2किजोकी जे मैं तुसा जो दुखी करी देयां तां तुसा रे अलावा मेरे जो खुसी दैणे वाला कोई नी रैह्णा। 3अते ए ही गल्ल जे मैं तुसा जो लिख्खी ताकि कुथकी इय्यां ना हो कि जां मैं तुसा का आं, तां जिन्हा लोक्कां का मेरे जो खुसी मिलणी चाएदी, तिन्हा का मेरे जो दुख मिल्लो। किजोकी जां तुसा खुस हुंदे, तां तिस कने मेरे जो खुसी मिलदी। 4किजोकी तुसा जो मैं दुखी मन का अते तकलीफ बिच रोई-रोई करी ए चीठ्ठी लिख्खी पर तुसा जो दुखी करणे तांइ नी, बल्कि इधेरे तांइ कि तुसा उस प्यार जो जाणी सको, जे खास कर तुसा रे तांइ है।

पापी जो माफी

5पर जे अगर कुसकी ने दुख दित्ते रा है तां तिसने सिर्फ मेरे जो ही नी, पर थोड़ा-मता ता तुसा सारेयां जो भी दित्ते रा है। मैं तिस मणू री गलती रे बारे बिच इसका जादा किच्‍छ भी नी बोलणा चाह्‍ंदा। 6इदेय जणे तांइ जे विश्वासी भाईयां ने दित्ते री है, से ही सही है। 7इसेरे उलट तुसा तिसजो माफ करी दो अते तिसजो तसल्ली देयो, कुदखी इय्यां ना हो कि से मसीह बिच विश्वास करणे का पीच्छे हटी जाए। 8इधेरे तांइ मेरी तुसा रे कने बिनती है कि तुसा तिन्हा सामणे ए ज़ाहिर करो कि तुसा तिन्हा कने प्यार करदे। 9किजोकी मैं तुसा जो इस मकसद कने चीठ्ठी लिख्खी कि तुसा जो परखी लेयां कि तुसा मेरी सारी गल्लां जो मनणे तांइ तैयार हिन की नी। 10पर जिस कुसकी जो तुसा कुसकी गल्ल तांइ माफ करदे तिसजो मैं भी माफ करदा। किजोकी जे किच्‍छ मैं माफ करदा (जे माफ कित्तेया है) से मसीह यीशु रे मिल्ले रे हक कने तुसा रे फायदे तांइ ही करदा। 11ताकि शैतान असा रा कोई फायदा नी उठाई सको किजोकी असी तिसेरी चाल्लां जो जाणदे।

मकिदुनिया तांइ सफर

12जां मैं मसीह यीशु रा सुब बसेख सुनाणे त्रोआस सहर बिच आया, तां प्रभु ने मेरे जो सुब बसेख सुनाणे रा बड्डा मौक्का दित्तेया। 13पर जां अपणे विश्वासी भ्याल तीतुस जो तित्ते नी दिख्खेया तां मेरा मन बड़ा बेचैन होई गेया, ते तिसजो तोपणे तांइ मैं त्रोआस सहर रे विश्वासियां का बिदा लेई करी आई गेया, ते मकिदुनिया प्रदेश जो हटी गेया।

मसीह बिच जीत की खुसी

14परमेश्वर रा शुकर हो, मसीह कने असा रा रिस्ता होणे री वजह कने से असा जो मसीह कने हमेसा लेई करी चलदे ते असा जो जीत दुआंदे। ते परमेश्वर अपणे मसीह जो जानणे री खुशबू जो इक्क महक सांई असा रे जरिये हर जगाह् फैलांदे। 15किजोकी असा री जिन्दगी परमेश्वर रे सामणे छुटकारा पाणे वाले ते नास होणे वाले लोक्कां तांइ मसीह री इक्क महक सांई हिन। 16पर तिन्हा लोक्कां तांइ जे बर्बादी पास्से बदेया करदे हिन, ए मौत री इदेइ गंदी मुस्क है, जे मौत रे पास्से लेई जांदी। पर तिन्हा लोक्कां तांइ जे छुटकारा रे रस्ते बिच बदेया करदे हिन, ए जिन्दगी री इदेयी महक है, जे हमेसा री जिन्दगी रे पास्से लेई चलदी। इन्हा गल्लां जो कोई अपणी काबलियत कने नी करी सकदा। 17असी उन्हा केई मणूआं सांई नी हिन, जे पैसे रे लालच बिच परमेश्वर रे वचन बिच हेराफेरी करदे हिन, पर असी ए जाणदे होए कि परमेश्वर असा जो भेज्जे रा है, ते से असा जो दिख्खेया करदे हिन, ते असी मसीह रे हक कने हमेसा सच्चाई कने शिक्षा दिंदे।

Currently Selected:

2 कुरुन्थियों 2: CDHNT

Highlight

Copy

Compare