जेरमयाह 34
34
जेरमयाह दैनअ राज़ै सिदकिया लै समाद
1 #
2 राज़. 25:1-11; 2 इति. 36:17-21 बाबेल देशो राज़अ नबूकदनेसर अर तेऊए सारी सैना त राज़धानी एरुशलेम अर ओर्ही-पोर्ही सोभी नगरी जुध छ़ेल़अ द। ज़हा-ज़हा देशा अर नगरी नबूकदनेसर राज़ैओ राज़ थिअ, तिंयां सोभ तै तेऊओ साथ दैंदै लागै दै। तिन्नां ई धैल़ै पुजअ मुंह सेटा बिधातो समाद। बिधाता बोलअ मुल्है इहअ, “जेरमयाह, 2हुंह आसा बिधाता, इज़राईलो परमेशर। तूह डेऊ यहूदा मुल्खे राज़ै सिदकिया सेटा लै, तेऊ का खोज़ै इहअ कि हुंह बिधाता बोला इहअ, ‘मंऐं लाई अह एरुशलेम नगरी बाबेल देशे राज़ेए बशै करी, तेऊ चैल़णीं एथ सारै दी आग। 3तूह निं तेऊ का छ़ुटी सकदअ, तूह बी ढाकणअ संघा सभाल़णअ तेऊए हाथै। ताह भाल़णअ बाबेल देशो राज़अ आपणीं आछी अर तेऊ करनी तेरै मुंहां सम्हनै ताह संघै गल्ला। तेखअ निंणअ तूह बाबेल देशा लै।
4“‘सिदकिया, तूह आसा यहूदा मुल्खो राज़अ, तूह शुण धैन दैई कि हुंह बिधाता तेरै बारै किज़ै बोला! मंऐं डाहअ ताल्है बोली कि तूह निं जुधा दी कोही मारनअ। 5तूह मरनअ आपणीं अमरा शांती दी। ज़िहै तेरै दाद-बाब ज़ुंण ताखा पैहलै राज़ै थिऐ, खुशबूदार च़िज़ा अर धूप ज़ाल़ी इज़ती संघै डाहै दाबी, तिहै ई हणैं तेरै क्रिया-कर्म बी इज़ती करै। लोगा मनाऊंणअ तिहअ ई ताल्है बी शोग अर तिन्नां बोल़णअ ताल्है बी लेरा लाई, “हे म्हारै मालका! आझ़ केस्सी डेऊअ तूह,” अह गल्ल डाही मंऐं बिधाता बोली।’”
6तेखअ खोज़ी मंऐं जेरमयाह गूरै यहूदा मुल्खे राज़धानी एरुशलेम ईंयां सोभै गल्ला राज़ै सिदकिया का तधू, 7ज़धू बाबेल देशे राज़ै नबूकदनेसरे सैना राज़धानी एरुशलेम, लकीश, अज़ेका नगरी संघै जुध त छ़ेल़अ द। यहूदा मुल्खै थिई गहल़ा आल़ी नगरी मांझ़ै ईंयां ई दूई ज़ेथ अज़ी बाबेल देशे सैनो कबज़अ निं हुअ त।
गलामा संघै किअ बूरअ बभार
8ईंयां गल्ला किई बिधाता मुंह जेरमयाह सेटा तिन्नां धैल़ै ज़धू राज़ै सिदकिया एरुशलेम बस्सी दी परज़ा संघै एही करार किई कि ज़ेतरै बी इब्रानी मणछ गलाम आसा तिंयां करनै सोभ आज़ाद। 9राज़ै किअ सारी परज़ा लै इहअ हुकम कि ज़सरै घअरै बी इब्रानी बेटल़ी या मर्ध गलाम आसा, तिन्नां दैआ आज़ाद हई डेऊणैं। आझ़ा का बाद निं कोहै आपणैं इज़राईली भाई-बंधा मांझ़ै गलाम बणाईं। 10यहूदी सैणैं, कार-करिंदै अर सोभ यहूदी मणछ हुऐ राज़ेए ऐहा करारा संघै सैहमत कि तिन्नां करनै तिंयां सोभ मर्ध-बेटल़ी गलामी का आज़ाद ज़ुंण तिन्नें आपणैं इब्रानी भाई-बंधा मांझ़ै थिऐ बणाऐं दै अर आजू बी निं तिन्नां कधि तिंयां गलाम बणाणैं। 11पर बादा का हुधूऐ तिंयां अर तिन्नैं शादै तिंयां मर्ध-बेटल़ी बापस ज़ुंण तिन्नैं आज़ाद किऐ तै! संघा बणाऐं भिई गलाम।
12तेखअ पुजअ बिधातो इहअ समाद मुंह जेरमयाह सेटा, 13इज़राईले परमेशर बिधाता बोलअ मुल्है कि तूह खोज़ लोगा का इहअ, “मंऐं किई ती थारै दादा-बाबा संघै करार ज़धू मंऐं तिंयां मिसर देशे गलामी का आज़ाद करी छ़ड़ैऊई आणै तै। मंऐं त तधू तिन्नां का खोज़ी डाहअ द, 14‘ज़ै थारै कुंण आपणैं ई इब्रानी भाई-बंध मर्ध होए च़ाऐ बेटल़ी, तिंयां ज़ै छ़हा साला तैणीं थारी च़ाकरी करे, तिन्नां करै हर सातुई साला मुक्कदी आज़ाद।’ पर थारै दाद-बाब निं मेरी गल्ला दी धैन ई दैनअ कि मंऐं तिन्नां लै किज़ै आसा बोल्दअ द।#लुआ. 21:2; बधा. 15:1,12 15तम्हैं बी गऐ तै थोल़ै धैल़ै आजी पाप करनै का पिछ़ू हटी, तम्हैं हेरअ त तिहअ करी ज़ुंण मुखा भलअ शुझिआ अर तम्हैं सोभी हेरै तै आपणैं इब्रानी भाई-बंध गलामी का आज़ाद करी। एते करार किई ती तम्हैं मुंह सम्हनै तेऊ भबनै ज़ुंण मेरै नाओंऐं आसा। 16पर ऐबै गऐ तम्हैं हेरा-हेरी हुधूई! ऐबै गऐ तम्हैं भिई कबाता पेठी अर तम्हैं समझ़अ हुंह बी नकदरअ! तम्हैं निंयैं तिंयां सोभ इब्रानी गलाम बापस ज़ुंण तम्हैं दिला का आज़ाद हेरै तै करी, तम्हैं डाहै तिंयां ज़बरी भिई गलाम बणाईं!
17“‘ऐबै बोला हुंह बिधाता तम्हां लै इहअ, “तम्हैं निं ज़िहअ मंऐं हुकम किअ त तेऊ साबै आपणैं इब्रानी भाई-बंध आपणीं गलामी का आज़ाद किऐ भाल़ी! ऐबै करनै मुंह तम्हैं ई ज़ाथी पठ आज़ाद, तम्हैं मरनै जुधा दी तलबारा अर नकाल़ करै भुखै। ज़ुंण मुंह तम्हां लै करनअ, तेता करै पल़णीं संसारै हर देशे लोगा डअर। 18-19यहूदा मुल्ख अर राज़धानी एरुशलेम नगरीए कार-करिंदै, राज़ दरबारे कार-करिंदै, प्रोहतै किई मुंह सम्हनै करार। तम्हैं किअ बाछ़ू बल़ीदान संघा डाहै तेते दूई भाग करी ओर्ही-पोर्ही अर तेता बिच़ी बाती पोर्ही हांढी किई तम्हैं सह करार पाक्की। ऐबै ज़ुंणीं-ज़ुंणीं तम्हैं मेरी करार नांईं मनी, तिन्नां लै दैणीं मुंह सज़ा। तिन्नें करनै मुंह ऐबै तिहै ई काटी दूई भाग। 20तिंयां दैणैं मुंह तिन्नें दुशमणा का ढाकणैं ज़ुंणीं तिंयां मारी आसा लाऐ दै। तिन्नें खेचै साल-फसल तिन्नें ल्हासा खाणीं च़ेल्लू-पखीरू अर बणें शकारी ज़ीबा।”
21“‘यहूदा मुल्खो राज़अ सिदकिया अर तेऊए कार-करिंदै बी दैणैं मुंह तिन्नें दुशमणे हाथै ज़ुंण तिन्नां मारदै पिछ़ू आसा पल़ै दै। तिंयां दैणैं मुंह बाबेल देशे सैना का कैद करनै ज़ुंण एभै तम्हां सेटा का पिछ़ू आसा हटै दै। 22तिन्नां लै करनअ मुंह हुकम अर तिंयां आणनैं मुंह ऐहा नगरी लै बापस फरेऊई। तिन्नां छ़ेल़णअ तम्हां संघै जुध संघा करनअ एथ सारै दी कबज़अ अर तेखअ चैल़णीं तिन्नां एथ आग। यहूदा मुल्खे सोभ नगरी करनी मुंह एही उज़र ज़ेथ कोह निं बस्सदअ। अह गल्ल डाही मंऐं बिधाता बोली।’”
Currently Selected:
जेरमयाह 34: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
