जेरमयाह 33
33
आजू होर आशा
1हुंह त अज़ी बी पहरीए मैहले खुडी कैद डाहअ द करी, बिधाता दैनअ मुल्है तिधी दुजी बारी समाद, 2“जेरमयाह, पृथूई आसा मंऐं बणाईं दी, एते आथरी आसा मंऐं पाई दी संघा आसा एकी ज़ैगा डाही दी टकैल़ी। मुंह नाअं आसा बिधाता। 3तूह कर मुंह सेटा अरज़ अर मुंह हेरनअ तेरी गल्लो ज़बाब दैई। मुंह खोज़णीं ताखा एही कठण अर महान गल्ला ज़ेते बारै ताखा किछ़ बी थोघ निं आथी। 4हुंह इज़राईलो परमेशर बिधाता बोला इहअ कि राज़धानी एरुशलेम आसा फेरा फेर गोटी दी, एऊ जुधो नतिज़अ हणअ इहअ कि नगरीए सोभ घअर अर यहूदा मुल्खे राज़ेए मैहलै पाणै ढोल़ी। 5थारै शूरबीर एछणैं बाबेल देशे सैना संघै मकाबलै करदै, पर मुंह डाहणैं तिन्नें घअर तिन्नें ई ल्हासा करै भरी ज़ुंण मंऐं रोश्शै मारी आसा लाऐ दै। मंऐं आसा ऐहा नगरी बाखा ऐबै पिठ डाही दी फरेऊई किल्हैकि ऐहा नगरी बस्सै दै मणछै किअ खास्सअ पाप।
6“पर तेखअ करनीं मुंह ऐहा एरुशलेम नगरीए लाज़-पुआई संघा करनै एथ बस्सै दै मणछ नरोगै। तेखअ दैणअ मुंह तिन्नां राज्ज़ी-राम्बल़ै अर निहंचै बस्सणै। 7मुंह बढेरनै यहूदा अर इज़राईल तैहा ई ज़ैगा पजैल़ी खास्सै, तिंयां करनै मुंह तिहै ई ज़िहै पैहलै थिऐ। 8ज़ुंण इनै कदुष्ट काम अर पाप किऐ, तेता का करनै मुंह ईंयां शुचै। ज़ुंण तिन्नैं मुल्है पाप अर द्रोह किअ, तेता लै छ़ाडणीं मुंह इना लै माफी। 9तेखअ हणीं अह नगरी खुशीए मूल़ अर ऐहा नगरी बस्सै दै लोगा करनी मेरी स्तोती अर मेरअ अदर। संसारे सोभी देशा बी शुणनअ तिन्नां भली गल्ले बारै ज़ुंण मंऐं ऐहा नगरी लै किई। तिन्नां भाल़णअ आपणीं आछी कि मंऐं दैनी इना लै शांती अर ईंयां मंऐं किहै सफल किऐ। तेखअ रहणअ तिन्नां बी मेरी डरा हेठै।”
10बिधाता बोला इहअ, “अह ज़ैगा ज़ेते बारै तम्हैं इहअ बोला, ‘एथ नां कुंण मणछ रहंदअ अर नां किज़ै ज़ीब आथी!’ बोला, तिंयां ठीक, किल्हैकि यहूदा मुल्खे सोभ नगरी अर राज़धानी एरुशलेम नगरीए सोभ बाता आसा उज़र अर शुन्नीं हुई दी, तेथ निं मणछ नां ज़ीब आथी रहै दै। पर ऐहा ज़ैगा शुण्हनी तम्हां का भिई खुशीए गल्ला। 11#1 इति. 16:34; 2 इति. 5:13; 7:3; एज्रा 3:11; भज. 100:5; 106:1; 107:1; 118:1; 136:1तेथ हणैं भिई नाच़-खेल्ह नंद करदै लागै दै अर बैहे गिहा बोल्दै लागै दै। मेरअ शूकर करना लै बल़ीदान करनै आल़ै बी शुण्हनै एही गिहा बोल्दै,
‘स्वर्गे सारी सैने मालक बिधातो करा शूकर,
किल्हैकि सह आसा भलअ,
तेऊए झ़ूरी आसा हाम्हां लै अटल़।’
“अह ज़ैगा करनीं मुंह भिई तेही ई फल़दी-फुलदी ज़ेही अह पैहलै थिई। अह गल्ल डाही मंऐं बिधाता बोली।”
12स्वर्गे सारी सैनो मालक बिधाता बोला इहअ, “अह नगरी ज़ुंण एते सोभी गराऊंआं संघी उज़र अर शुन्नीं आसा पल़ी दी, ऐहा ज़ैगा ज़ेथ कोह मणछ अर ज़ीब निं आथी रहअ द, अह हणीं भिई हरी-भरी अर फुआल हणैं एथ आपणीं भेडा-बाकरीए हेल़्ही च़राऊंदै बेठै दै। 13हेल़्ही रहणीं भिई निऊल़ अर सराज़ा लै हांढदी लागी। तिंयां डेऊणी उझै धारा बाखे मुल्खै, सऊंऐं मुल्खै, यहूदा दखण रेगीस्तानै, बिन्यामीन मुल्खै एरुशलेम नगरी ओरी-पोरी देशै गराऊंऐं अर यहूदा मुल्खे होरी सोभी नगरी। फुआल हणैं एथ भिई आपणीं भेडा गणदै अर च़राऊंदै लागै दै। अह गल्ल डाही मंऐं बिधाता बोली।”
14 #
जेर. 23:5,6 बिधाता बोला इहअ, “आजू एछणैं इहै धैल़ै कि मुंह करनी आपणीं सह करार पूरी ज़ुंण मंऐं यहूदा अर इज़राईले परज़ा संघै आसा किई दी। 15तिन्नां धैल़ै करनअ मुंह इहअ कि मुंह छ़ांटणअ दाबेदे खिंबा का आजू एक धर्मीं राज़अ। तेऊ करनअ सारै देशै धर्म अर नसाफ।#ईशा. 11:1-5 16तिन्नां धैल़ै बच़ाऊंणी यहूदा अर राज़धानी एरुशलेम नगरीए परज़ा अर तिंयां रहणैं निहंचै बस्सी। नगरी लै बोल़णअ लोगा, ‘बिधाता ज़ुंणीं हाम्हैं आप्पू संघै धर्मीं बणाऐं।’
17 #
2 शमू. 17:12-16; 1 राज़. 2:4; 1 इति. 17:11-14 “अह आसा मंऐं बिधाता बोली डाहअ द कि राज़ै दाबेदे खिंबा का हणअ सदा इज़राईलो राज़अ अर 18लेबी गोत्रा का हणअ सदा मेरी च़ाकरी करना लै मेरअ प्रोहत ज़हा मुल्है हूम बल़ीदान, नाज़ अर होर बल़ीदान करनै।”#गण. 3:5-10
19बिधाता बोलअ मुल्है भिई इहअ, “जेरमयाह, 20मंऐं आसा धैल़ी अर राची संघै करार हुई दी ताकि तिंयां आपणैं-आपणैं बगतै होए। मेरी अह करार निं कधि चुटदी। 21तेही ई आसा मंऐं आपणैं दास राज़ै दाबेदा संघै करार किई दी कि तेऊए ई खिंबा का रहणअ सदा राज़अ। लेबी गोत्रा संघै बी आसा मेरी करार कि तिन्नां ई मांझ़ै हणअ मेरी च़ाकरी करदअ प्रोहत अर मेरी ईंयां करारा बी निं कधि खतम हणीं। 22मेरै दास दाबेद अर लेबीए आद-लुआद बढेरनीं मुंह एही खास्सी कि तिंयां हणैं सरगे तारै अर समुंदरे रेता ज़िहै खास्सै ज़ेता कुंण गणी निं सकदअ।”
23बिधाता बोलअ तेखअ मुल्है इहअ, “जेरमयाह, 24तंऐं धैन दैनअ कि मंऐं इज़राईल अर यहूदा मांझ़ै केतरै मणछ छ़ाडै? तिन्नां मांझ़ै आसा मंऐं दूई खिंब छ़ांटै दै अर तिंयां हेरै मंऐं छ़ाडी किल्हैकि तिंयां समझ़ा मेरी परज़ा बृथा अर तिंयां निं तिन्नां देश ई समझ़दै। 25हुंह आसा सह बिधाता ज़ुंणीं धैल़ी अर राची संघै करार आसा किई दी, अर ज़ुंणीं सह बधान आसा बणाअं द ज़ेता करै सारअ भ्रमंड मेरै काबू दी आसा। 26ज़िहै अटल़ काम मंऐं ईंयां काम आसा किऐ दै, तेही अटल़ आसा मेरी राज़ै दाबेद अर तेऊए आद-लुआदा लै किई दी करार। मुंह काढणअ दाबेदे आद-लुआदा मांझ़ै एक राज़अ, तेऊ करनअ आबराम, इसहाक अर याकबा प्रैंदै राज़। मुंह करनी आपणीं परज़ा लै झींण अर तिंयां बढेरनै मुंह तिन्नें आपणैं देशै भिई उझै।”
Currently Selected:
जेरमयाह 33: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
