जेरमयाह 31
31
इज़राईली फिरनैं घअरा लै बापस
1बिधाता बोला इहअ, “आजू एछणैं इहै धैल़े, तिन्नां धैल़ै हणअ हुंह इज़राईले सोभी गोत्रो परमेशर अर तिंयां हणैं मेरी परज़ा। 2ज़ुंण आजू तलबारा#31:2 तलबारा मौत अर बरैबादी का ज़िऊंदै बच़े, तिन्नां लै दैणअ मुंह बंज़र रेगीस्तानै जश। मुंह एछणअ इज़राईला लै बशैघ अर शांती दैंदै।”
3खास्सी साला पैहलै बोलअ त बिधाता इज़राईला लै, “हुंह झ़ूरा तम्हां लै सदा। मेरअ तम्हां लै झ़ूरनअ आसा अटल़ अर मुंह लागा कबल्ली थारी झींण। 4इज़राईल आसा मुल्है कुंआरी शोहरी ज़िहअ! तूह निखल़णीं भिई हार-शंगार करी डफली बाज़दी बागै नाटी नाच़दी-खेल्हदी। 5ताह लाणैं सामरी धारा भिई दाखे बाग। ज़ुंण कृषाण तिन्नां बागा लाए, तिन्नां भेटणअ तेता का फल़ बी खाणां लै। 6आजू एछणैं इहै धैल़ै कि तिन्नां बागे पहरी बोल़णअ एप्रैम धारा का हाक्का लाई इहअ, ‘उझै च़ाल्ला सियोन धारा लै ज़िधी म्हारअ परमेशर बिधाता आसा।’”
7बिधाता बोला इहअ,
“याकबे आद-लुआदे तैणीं करा ज़ै-ज़ैकार,
ज़ुंण सोभी देशा मांझ़ै बडै आसा।
ज़ोरै-ज़ोरै बोला ज़ै-ज़ैकारे एही गिहा,
‘बिधाता हेरी आपणीं परज़ा बच़ाऊई,
ज़ुंण इज़राईली मांझ़ै ज़िऊंदै थिऐ रहै दै, तिंयां बच़ाऊऐ तेऊ सोभ।’
8तिंयां आणनैं मुंह उतर देशा#31:8 उतर देशा बाबेल का अर
तिंयां आणनैं मुंह पृथूईए एकी पुंझ़ा का दुजै पुंझ़ा ओर्ही झाल़ी।
तिन्नां संघै एछणैं कांणै अर लाट्टै मणछ बी,
सुंदी बेटल़ी अर सूई दी बेटल़ी बी एछणी तिन्नां संघै।
तिन्नें एछणी एक बडी टोली फिरी।
9घअरा लै बापस फिरदी छ़ुटणैं मेरी परज़े आछी का खुशी दी आशू,
तिन्नां घअरा बाखा बापस आणदी हणैं तिंयां अरज़ करदै लागै दै।
तिंयां आणनैं मुंह गाडे बाढा बाती अर
तिंयां नढैऊणैं मुंह सरली बाता बाती ताकि तिन्नां ठोहल़ नां लागे।
किल्हैकि हुंह आसा इज़राईलीओ बाब अर
एप्रैम आसा मेरअ सोभी का ज़ेठअ शोहरू।”#1 करि. 6:18
10बिधाता बोला इहअ,
“तम्हैं देशा-देशे लोग शूणां मेरअ समाद,
एता खोज़ा दूर देशै समुंदरे टापू दी पुजी,
मंऐं छिंगै इज़राईली देशै-देशै, पर मुंह झाल़णैं तिंयां एकी ज़ैगा लै,
मुंह करनीं तिन्नें एही हेर-सभाल़ ज़िहअ फुआल
आपणीं भेडा-बाकरीए हेल़्हीए फाज़त करा।
11मंऐं हेरी याकबे आद-लुआद आज़ाद करी अर
तिंयां हेरै मंऐं तिन्नां देशा का छ़ड़ैऊई ज़ुंण तिन्नां का बलबान आसा।
12तैही पुजणैं इज़राईली परज़ा सियोन फिरी अर तिधी करनीं तिन्नां ज़ै-ज़ैकार,
ज़ुंण मंऐं तिन्नां लै दैनअ तेता लै हणीं तिन्नां खास्सी खुशी।
तिन्नां लै दैनअ मुंह नाज़, जैतूनो तेल अर साज़रअ दाखो रस।
तिन्नें डागै-चैणें हेल़्ही दी दैणैं भेडा-बाकरी अर गाऊई खास्सै सो।
इज़राईल हणअ पाणीं आल़ै इहै बागा ज़िहअ ज़ेथ राम्बल़ी बाच हआ।
तिन्नां निं किछ़ू गल्ले निऊल़ पल़णीं।
13तिन्नें कुंआरी शोहरी हणीं खुश अर नाटी नाच़दी-खेल्हदी
अर खारकै अर प्रोढै मणछ बी हणैं तिहै ई खुश।
तिन्नों शोग बदल़णअ मुंह खुशी दी अर
तिन्नें दुखे बदल़ै दैणीं मुंह तिन्नां लै नंद।
14सोभी प्रोहता लै बी दैणअ मुंह खाणां-पिणां लै बधिया-बधिया,
आपणीं परज़ा दैणीं मुंह मेरी भली च़िज़ा करै रज़ैऊई।
अह गल्ल डाही मंऐं बिधाता बोली।”
बिधाते इज़राईला लै झींण
15 #
मूल. 35:16-19; मोत्त. 2:18 बिधाता बोला इहअ,
“रामाह#31:15 रामाह अह नगरी ती बिन्यामीन मुल्खै इज़राईल अर यहूदा मुल्खे सिऊंआं दी बस्सी दी एरुशलेम नगरी का उतरा बाखा कोई पांज़ मील दूर। नगरी शुण्हिंआं मखाण पल़अ द,
तिंयां आसा हिंह करै लेरा लांदै लागै दै।
राहेल आसा आपणैं लान्हैं लै लेरा लांदी लागी दी,
सह निस्सी केही च़ुफूई! किल्हैकि
तिंयां निं ऐबै रहै आथी।”
16बिधाता बोला तैहा लै इहअ,
“ऐबै निं लेरा लांदी लागै,
आपणीं आछी का टुश आशू पोर्ही।
ज़ुंण मैन्थ तंऐं आपणैं लान्हैं लै किई, सह निं बृथा डेऊणी।
तिंयां एछणैं दुशमणे देशा का फिरी।#प्रका. 21:4; होश. 1:11
17खिरी हणअ तिहअ ई ज़ेही ताह आशा आसा,
तेरी आद-लुआद एछणी घअरा लै बापस फिरी, अह गल्ल डाही मंऐं बिधाता बोली।
18मंऐं शूणअ एप्रैम दाह-दुखा दी इहअ बोल्दअ,
‘तंऐं नैरअ हुंह हल़ा का ठुर्है दै बाछ़ू ज़िहअ ज़ुंण शूरै दी डाहअ लाई,
ऐबै गअ हुंह शिखल़ी अर ऐबै निंऊं मुंह आप्पू सेटा लै बापस,
मुंह एछणअ बापस, किल्हैकि तूह परमेशर बिधाता आसा मेरअ मालक।
19हुंह डेऊअ ताखा कबाता पर तेखअ पछ़ताअ हुंह खास्सअ,
ज़ांऊं तंऐं मुल्है सज़ा दैनी, तेखअ लागअ हुंह आपणीं हिक्का पटाक्कदअ,
तेखअ हुअ हुंह पठी शर्मिंदअ अर बेइज़त ज़ांऊं मुंह
आद फिरी कि मंऐं आपणीं ज़ुआनी दी किहै पाप किऐ।’
20एप्रैम! तूह आसा आझ़ बी मेरअ पैरअ शोहरू ज़हा लै हुंह खास्सअ झ़ूरा!
ज़ेभै बी हुंह ताल्है सज़ा दैणें गल्ल सोठा,
तेभै फिरा मुंह आद कि हुंह झ़ूरा ताल्है।
मेरै भर्हिया तेभै गअल़-घुघल़ै, मुंह करनीं ताल्है झींण।
अह गल्ल डाही मंऐं बिधाता बोली।”
21गूर बोला इहअ,
“इज़राईलीओ! ज़हा खुल्ही सल़का बाती तम्हैं डेऊऐ,
तैहा बाता डाहा ओडै अर फ्रहरै खल़ै करी,
तेखअ एछै ऐहा ई बाता लोल़ी करै बापस फिरी ज़ुंण तम्हैं छ़ाडी।
आपणीं तिन्नां नगरी एछा फिरी ज़ेता छ़ाडी तम्हैं डेऊऐ।
22तम्हां मेरी विश्वास घाती परज़ा कधू तैणीं रहणअ इहै ठुल़्दै लागी?
मुंह करनी ऐबै पृथूई दी नऊंईं अर नुआहरी गल्ला।
एही नुआहरी कि बेटल़ी करनी आपणैं मर्धे फाज़त।”
23इज़राईलो परमेशर, स्वर्गे सारी सैनो मालक बिधाता बोला इहअ, “ज़ांऊं मुंह यहूदी गलामी का तिन्नें ज़ैगा पजैल़ी बापस बसाऊंणै, तेखअ बोल़णीं यहूदा मुल्खे सारी नगरी दी लोगा एही गल्ला,
‘बिधाता लोल़ी दी पबित्र धार एरुशलेम नगरी लै खास्सी बर्गत दैनी
ज़हा पबित्र ज़ैगा तेऊओ बसेरअ आसा।’
24“यहूदा अर तेते सोभी नगरी दी लागणै रहंदै बस्सदै। तिंयां रहणैं सोभ मिल़ी-ज़ुल़ी, तेथ हणैं कृषाण बी अर तिन्नां संघै फुआल बी बस्सणै आपणीं हेल़्ही संघी कठा। 25मुंह दैणअ तिन्नां लै बशैघ ज़ुंण थकै दै होए। ज़हा भुखै तराण निं रहे, तिंयां दैणैं मुंह रज़ैऊई।#मोत्त. 11:28; लूक. 6:21
26“तेखअ शुण्हनै लोग इहअ बोल्दै, ‘मुंह आई एही बधिया नींज, अर निंजा का उझ़ुई हुअ हुंह नरोगअ।’
27“हुंह बिधाता बोला इहअ कि आजू एछणैं इहै धैल़ै कि मुंह दैणीं इज़राईल अर यहूदा मुल्खे ज़ैगा मणछ अर डागै-चैणैं करै भरी। 28ज़िहै मंऐं इज़राईल अर यहूदा भाल़ी-हेरी करै गोधी का पेच़ै तै, मंऐं ज़िहै तिंयां ढोल़ै, ज़िहै मंऐं तिंयां दूर शोटै अर ज़ेही मंऐं तिन्नां लै आफ़त दैनी पल़णै, तिहै डाहणैं मुंह तिंयां भाल़ी-हेरी राम्बल़ै करै रोही संघा दैणअ मुंह तिन्नां खास्सै बझ़णै।
29“ज़ेभै ईंयां इहै धैल़ै हणैं, तिन्नां धैल़ै बाद निं तेखअ लोगा कधि इहअ बोल़णअ,
‘ईजै-बाबै डाही एही मिल्ली दाख खाई,
सह कल़ुअ सुआद आसा तिन्नें आजू लान्हें खाखा बी।’#एज. 18:2
30“किल्हैकि सोभ मणछ मरनै आपणैं पापा ई पिछ़ू। ज़ुंण मिल्ली दाख खाआ, तेतो थोघ लागा तेऊ ई का कि तेऊ केही कल़ुई उझ़िआ।”
31बिधाता बोला इहअ, “आजू एछणैं इहै धैल़ै कि मुंह करनीं इज़राईल अर यहूदा संघै नऊंईं करार।#मोत्त. 26:28; मार्क. 14:24; लूक. 22:20; 1 करि. 11:25; 2 करि. 3:6; इब्रा. 8:8-12 32सह करार निं तेता ज़ेही हणीं ज़ुंण मंऐं तिन्नें दादा-बाबा संघै तधू किई ती ज़धू मंऐं तिंयां मिसर देशा का काढी आणै। हुंह त तिन्नां लै मर्धा ज़िहअ अर तिंयां निं मुल्है शुचै-पाक्कै रहै।
33“मुंह बिधाता ज़ुंण नऊंईं करार आपणीं परज़ा इज़राईली संघै करनी सह हणीं एही:
‘मुंह पाणअ आपणअ बधान तिन्नें मन्नैं,
अर सह डाहणअ मुंह तिन्नें दिलै लिखी।
हुंह हणअ तिन्नों परमेशर अर तिंयां हणैं मेरी परज़ा।#2 करि. 3:3; इब्रा. 8:10,11; 10:16; रोम. 11:26,27
34“‘तेखअ निं तिन्नां साथी-संघी अर भाई बंधा का खोज़णअ पल़णअ कि बिधातो अदर करा। किल्हैकि तिन्नां सोभी का हणअ मेरअ थोघ च़ाऐ तिंयां आम मणछ होए या राज़ करनै आल़ै मशूर मणछ होए। मुंह करनै तिन्नें पाप माफ अर तेखअ निं मुंह तिन्नें गलती आद डाहणीं। अह गल्ल डाही मंऐं बिधाता बोली।’#1 थिस. 4:9; शधा. 10:43; इब्रा. 10:17
35मंऐं आसा धैल़ी प्रैश्शअ करना लै सुरज़ डाहअ द,
राची लै आसा मंऐं ज़ोथ अर तारै डाहै दै।
हुंह च़का समुंदरे छ़ाल्ली उझै उछ़टी संघा दैआ समुंदरा बडी-बडी क्रुंगा लाणैं,
मुंह नाअं आसा बिधाता हुंह आसा स्वर्गे सारी सैनो मालक।
36हाँ, ज़ै इहअ होए कि ज़ुंण मंऐं बणाअं द आसा,
सह तिहअ नां रही मेरी आछी सम्हनै का लुक्के!
तै निं इज़राईल बी एक देश रहणअ।
37ज़हा धैल़ी कुंण प्रैंदा का सरग नापी सके अर
खण्हीं करै पृथूईए आथरी लोल़ी हेरे,
तै शोटणै मुंह इज़राईली तिन्नें पापा पिछ़ू दूर।
अह गल्ल डाही मंऐं बिधाता बोली।”
38बिधाता बोला इहअ, “आजू एछणैं इहै धैल़ै कि अह एरुशलेम नगरी च़िणनी भिई मेरै नाओंऐं, सह च़िणनी हनानेल पुंडरी पोर्ही पुंझ़े प्रऊल़ी तैणीं। 39तिधा आजू डेऊणीं नापणे राश्शी गारेब धारा पछ़मा तैणीं तिधा का फिरनी गोआह फेर। 40ज़ेऊ खागै मुल्दै दाबा अर छ़ार शोटा, किद्रोन गाडा उझै ज़ेतरै खेच आसा अर तिधा का पुर्बा बाखा घोल़े प्रऊल़ी तैणीं हणीं सारी ज़ैगा मुल्है पबित्र। तेखअ निं कधि अह नगरी ढोल़णीं अर बरैबाद करनी।”#लूक. 22:20; 1 करि. 11:25; 2 करि. 3:6; इब्रा. 13:20
Currently Selected:
जेरमयाह 31: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
