बधान 20
20
जुधा लै डेऊणेओ बधान
1मोसा बोलअ इज़राईली लै इहअ, “ज़ेभै तम्हैं जुधा लै डेओए, थारी सैना का सका दुशमणे सैना खास्सी हई अर तिन्नां का सका खास्सै घोल़ै अर रथ हई। पर तम्हैं निं डरी आथी! थारै ज़ुंणी परमेशर बिधाता तम्हैं मिसर देशा का छ़ड़ैऊई आणै, सह हणअ जुधा लै तम्हां बाखा। 2जुधा लै डेऊणैं का आजी लऐ प्रोहत सारी सैना सम्हनै डेऊई इहअ बोली, 3‘इज़राईली जोधैओ, शूणां! आझ़ च़ाल्लै तम्हैं जुधा लै डेऊई, तम्हैं निं दुशमणा का डरी आथी अर ज़ेभै दुशमण थारै सम्हनै होए, तेभै निं तम्हैं फिकर करी नां हैअ चोल़ी। 4थारअ परमेशर बिधाता हणअ जुधा लै तम्हां बाखा अर तम्हैं जाणैं दुशमणा का ज़िती।’
5“तेखअ बोलै सैनापति सारी सैना लै, ‘तम्हां मांझ़ै ज़ै कुंण इहअ आसा होए, ज़ुंणी आपणअ नऊंअ घअर बणाअं पर तेते घरासणी आसा अज़ी एही, सह सका आपणैं घअरा लै फिरी डेऊई। अह गल्ल निं तेऊ लै ठीक हणीं कि सह जुधा करदी मरे अर तेऊए नऊंऐं घअरै कुंण होर बस्से। 6ज़ै तम्हां मांझ़ै कुंण इहअ आसा होए ज़ुंणी आपणैं खेचै दाखो बाग ता लाअ पर तेते फल़ निं अज़ी खाऐ, सह बी सका आपणैं घअरा लै डेऊई। तेऊ लै बी निं अह गल्ल ठीक हणीं कि सह जुधा करदी मरे अर तेऊए फल़ कुंण होर खाए। 7ज़ै तम्हां मांझ़ै कुंण इहअ आसा, ज़सरी एभै पै कहा शोहरी संघै बरनीं होए लाई दी, सह बी सका घअरै डेऊई तैहा संघै बैह करी। अह गल्ल बी निं ठीक हणीं कि सह जुधा करदी मरे अर तेऊ संघै लाई-बरी दी शोहरीओ बैह कहा होरी संघै होए।’
8“खिरी बोलै सह सैनापति इहअ, ‘तम्हां मांझ़ै इहै केतरै आसा ज़ुंण जुधा लै डरै दै आसा? तिंयां बी सका आपणैं घअरा लै डेऊई। हाम्हैं निं इहअ च़ाहंदै कि तम्हां करै होरी जोधैओ बी हैअ चुटे।’
9“ज़ांऊं सैनापति आपणीं गल्ला करी मुक्के, तिंयां छ़ांटै सैने हर दला लै दलपति ज़ुंण तिन्नां लै हुकम करे।
10-15“ज़ुंण देश थारी ज़ैगा का खास्सै दूर होए, तिन्नां संघै जुध छ़ेल़णै का आजी लऐ तिधी बस्सै दै लोगा सेटा दूत छ़ाडी मेल़-ज़ोल़ करनैओ समाद दैई। ज़ै तिंयां मने अर तम्हां लै आपणीं नगरीए प्रऊल़ी घुआल़े, तेखअ हणैं तिंयां थारै गलाम। पर ज़ै तिंयां तम्हां संघै मेल़-ज़ोल़ करनै का हुधिए अर तम्हां संघै जुधा लै मकाबलै करदै फिरे, तै दैऐ तिन्नें नगरी फेरा-फेर गोट, संघा करै जुध। बिधाता करनी थारी तिन्नां का ज़ितणा लै मज़त, तम्हैं पाऐ तिन्नें सोभी मर्धा मारी अर तिन्नें बेटल़ी-माठै बणाऐं आपणैं गलाम अर तिन्नें डागै-चैणैं, घोल़ै-गाधे हेल़्ही अर सारी किम्मती ज़ैदात डाहै आप्पू लै।
16“पर ज़ुंण ज़ैगा बिधाता तम्हां लै आसा लाई दी दैई, ज़ै तैहा ज़ैगा तम्हैं कहा नगरी ज़िते, तेथ पाऐ तम्हैं डागै-चैणैं अर बेटल़ी-माठै संघी सोभी मारी। 17बिधाता आसा तम्हां लै इहअ हुकम किअ द कि हित्ती, अमोरी, कनानी, परिजी, हिब्बी अर जबेशी ज़ातीए लोगा करै पठी खतम। 18ज़ै तम्हैं तिन्नां मांझ़ै धख बी ज़िऊंदै छ़ाडे, इहअ निं हआ कि ज़हा देअ-देबते पूज़ा तिंयां करा, तिन्नां रिती-रबाज़ा तम्हां जैंदरी राल़ी तम्हां कबाता पाए! सह हणअ थारै भलै आपणैं बिधाता लै घोर पाप।
19“इहअ बी डाहै धैन कि ज़ेभै तम्हैं कहा नगरी संघै जुध छ़ेल़े, तेते फल़ा दैणैं आल़ै डाल़ा-बूटा लै निं किछ़ै नकसान करी, च़ाऐ तम्हैं खास्सै धैल़ै तैणीं किल्है निं होए तैहा नगरी फेर गोट दैनअ द। तिंयां डाल़-बूट निं थारै दुशमण आथी, तिन्नां दी लागा खाणां लै फल़, तिंयां एछणैं थारै बी खाणें कामैं, तम्हैं निं तिन्नां काटी आथी। 20हाँ, ज़ै तम्हां तैहा नगरी संघै जुधा लै किछ़ू बी साज़-समान बणाणां लै काठे ज़रुरत पल़े, तेता लै सका तम्हैं तिन्नां डाल़ा बूटा मांझ़ै इहै डाल़ बूट काटी ज़ेथ फल़ निं लागदै।”
Currently Selected:
बधान 20: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
