बधान 16
16
ऊवार्णैओ थैर अर आखरै रोट लुच़ीओ थैर
(लुआह 12:1-20; लेबी बधान 23:4-8)
1मोसा बोलअ इज़राईली लै इहअ, “इज़राईलीओ, च़ैत्रै#16:1 च़ैत्रै इब्रानी बोली दी बोला “अबीब” भिन्नअ “निसान” बी बोला एता लै मनाऊंऐं तम्हैं ज़रूर ऊवार्णैओ थैर। किल्हैकि च़ैत्रै आसा तम्हैं थारै परमेशर बिधाता साज़ै धैल़ै मिसर देशे गलामी का आणै दै छ़ड़ैऊई।#लुआ. 12:1-20; लेब. 23:5-8; गण. 28:16-25 2ऊवार्णे थैरा लै करै डागै-चैणें हेल़्ही मांझ़ा का बाछ़ू, गाभू या छ़ेल्हू मांझ़ै ई बिधाते तैहा पबित्र ज़ैगा बल़ीदान ज़ुंण बिधाता होए छ़ांटी दी। 3-4ऊवार्णे थैरे बल़ीदाने शिखा खाऐ पठी तैहा ई राची। पर सज़ेल़ी रोटी निं तेऊ भोज़ा संघै खाई। तेता खाऐ तेही ई आखरी लुच़ी संघै ज़ेही तम्हैं छ़ेक्कै-छ़ेक्कै मिसर देशै तधू बणाईं ती ज़धू तम्हैं मिसर देशै गलाम थिऐ अर तम्हां त तिधा का निखल़णेंओ छ़ेक्कअ लागअ द। एता करै तम्हैं सारी अमरा इहअ ई, इहअ करै रहणीं तम्हां सह धैल़ी आद, ज़धू तम्हैं मिसर देशा का निखल़ै तै।
“साता धैल़ै तैणीं निं तम्हैं सज़ेल़ी रोटी खाई आथी, तम्हां मांझ़ै निं कोहै आपणैं घअरै इना धैल़ै सज़ेल़अ डाही।
5“तम्हैं निं मुंह बिधाता लै ऊवार्णैओ बल़ीदान तिन्नां नगरी दी करी ज़िधी तम्हैं आप्पू बस्सणै आल़ै आसा। 6ऊवार्णैओ बल़ीदान करै तिधी, ज़हा ज़ैगा बिधाता आप्पू लै पबित्र छ़ांटे। ऊवार्णे थैरो चैणअ बी काटै धैल़अ उडी करै सान्हां तैहा ई बेला ज़धू तम्हैं मिसर देशा का निखल़ै तै। 7तेखअ खाऐ तेता तिधी पबित्र ज़ैगा भुज़ी करै अर दुजै धैल़ै दोत्ती एछै तम्हैं सोभै आपणैं डेरै लै फिरी।
8“छ़हा धैल़ी तैणीं खाऐ तम्हैं आखरै रोट-लुच़ी अर सातुई धैल़ी करै बशैघ अर तैहा धैल़ी निं किछ़ै काम-काज़ करी। पर तैहा धैल़ी करै बिधाता सेटा एछी बडअ पबित्र झाल़अ।
नऊंईं साल-फसलो थैर
(लुआह 34:22; लेबी बधान 23:15-21)
9“ज़ेभै तम्हैं खेचै दाची लाई लऊंणीं शुरू करे, तैहा धैल़ी पोर्ही गणै तम्हैं सात बशैघे धैल़ै।#लेब. 23:15-21; गण. 28:26-31 10-11तेखअ डेओऐ बिधाते पबित्र ज़ैगा, संघा मनाऊंऐं तैहा पज़ाहुई धैल़ी आपणैं परमेशर बिधातो अदर करना लै सलहरीओ थैर। तम्हैं आणै तेऊ साबै आपणीं खुशी दी बिधाता लै भैंट, ज़ेऊ साबै थारी साल-फसला लै बर्गत हुई। तेऊ थैरा मनाऊंदै लोल़ी तम्हैं थारै शोहरू-शोहरी अर नोकर-च़ाकरा संघी आऐ। लेबी गोत्रे लोगा लऐ तेऊ भोज़ा खांदै ज़रूर शादी अर गरीब, परदेसी, छ़ुटै-मुक्कै दै अर बिधबा बेटल़ी शादणैं बी निं बिस्सरी आथी। 12बिधाते इना बधाना अर बिधी मनणैओ डाहै तम्हैं हर बगत खैल अर ऐहा गल्ला बी निं बिस्सरी कि तम्हैं थिऐ मिसर देशै गलाम।
छ़ानींओ थैर
(लेबी बधान 23:33-43; गणांई 29:12-38)
13-15“शऊजै ज़ांऊं तम्हैं आपणैं खहल़ा का नाज़ अर दाखो रस खुडी झाल़ी मुक्के, तेखअ डेओऐ तम्हैं आपणैं शोहरू-शोहरी, नोकर-च़ाकर अर सारै टबरा संघी बिधाते पबित्र ज़ैगा लै। संघा मनाऊंऐं तिधी साता धैल़ी तैणीं छ़ानींओ थैर। तेभै बी लऐ लेबी गोत्रे लोगा तेऊ थैरा लै ज़रूर शादी अर गरीब, परदेसी, छ़ुटै-मुक्कै दै अर बिधबा बेटल़ी शादणैं बी निं बिस्सरी आथी।#लेब. 23:33-36,39-43; गण. 29:12-38
“बिधाता दैणीं तम्हां लै खास्सी साल-फसल अर तेऊ दैणीं थारै सोभी कामां लै बर्गत अर तम्हैं रहणैं राज्ज़ी-मौज़ी। तैही मनाऊंऐं एऊ थैरा आपणैं परमेशर बिधातो अदर अर शूकर करना लै।
साले चअन खास थैर
(लुआह 23:14-17)
16“तम्हैं मनाऊंऐं बिधाता सेटा पबित्र ज़ैगा लै डेऊई हर साल चअन थैर। च़ैत्रै मनाऊंऐं आखरी रोटीओ थैर, ज़ेभै थारअ नाज़ लऊंणा लै होए, तेभै मनाऊंऐं सलहरीओ थैर अर ज़ेभै तम्हैं मुक्कदी साला आपणीं साल-फसल खुडी झाल़ी मुक्के, तेभै मनाऊंऐं छ़ानींओ थैर। ऐहा गल्लो बी डाहै खैल कि तम्हैं सोभी लोल़ी तेभै बिधाता लै भैंट ज़रूर आणी। 17ज़ेही-ज़ेही बिधाता तम्हां लै बर्गत दैनी, थारी भैंट बी लोल़ी तेही ई खास्सी हुई।
लोगे फैंसलै करदै पांच़
18-19“ज़ेभै तम्हैं सोभै आपणैं-आपणैं गोत्रे साबै तेऊ देशे नगरी-नगरी बस्सी जाए ज़ुंण तम्हां लै बिधाता दैणीं, तिन्नां सोभी नगरी दी डाहै लोगे फैंसलै करनै आल़ै पांच़ अर सैणैं छ़ांटी। ज़ुंण लोगे पांच़ बणें तिन्नें मन्नैं निं लोल़ी तेभै धख ज़िहअ भेदभाब बी हुअ ज़ेभै तिंयां लोगे मकदमैंओ फैंसलअ करे, च़ाऐ तेथ कुंण खास आदमी किल्है निं होए। नां पांच़ी लै ढब्बै-धेल्लै ढाकी किल्हैकि इहअ करै निं तेऊ पांच़ा का पाप-धर्म शुझदअ अर सह बणाआं मानदार मणछा बी झ़ुठै।#लुआ. 23:6-8; लेब. 19:15
20“नसाफ करना लै रहै तम्हैं शुचै, तै रहणैं तम्हैं तैहा ज़ैगे मालक बणी ज़ुंण तम्हां लै थारै परमेशर बिधाता दैणीं, तै हणीं थारी अमर तेऊ देशै खास्सी।
ओडै बान्नै पूज़दै निं लागी
21“ज़ेभै तम्हैं बिधाता लै बल़ीदान करने बेदी बणांए, तेथ निं तम्हैं तिहअ काठो डौंड खल़अ करी, ज़िहै पराई ज़ातीए लोग अशेरा देबीए पूज़ा करना लै करा।#लुआ. 34:13 22अर नां पात्थरे ओडै लाई पूज़णा लै! इना एही च़िज़ा का करा बिधाता नफरत।”#लेब. 26:1
Currently Selected:
बधान 16: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
