बधान 14
14
होरी लोगा ज़िहअ निं शोग बी करी
1मोसा बोलअ इज़राईली लै इहअ, “इज़राईलीओ, तम्हैं आसा थारै परमेशर बिधाते शोहरू-शोहरी। ज़ेभै तम्हैं मणछ मरी करै शोग करे, तेभै निं तम्हैं पराई ज़ातीए लोगा ज़िहअ आपणीं देही दी च़िरअ या आपणीं भृहुंईए शराल़ छाम्बी।#लेब. 19:28; 21:5 2किल्हैकि तम्हैं आसा बिधाते अर तेऊ आसा तम्हैं धरतीए सोभी देशे लोगा मांझ़ै आपणीं पबित्र परज़ा हणां लै छ़ांटै दै।#लुआ. 19:5,6; बधा. 4:20; 7:6; 26:18; तित. 2:14; 1 पत. 2:9
शुचै अर छ़ोतलै पशू
(लेबी बधान 11:1-47)
3“तिन्नां पशूओ मास्स निं खाई ज़ेता लै बिधाता इहअ बोलअ कि ईंयां आसा छ़ोतलै। 4-5तम्हैं सका गाऊई-बल्द, घरेलू भेडा-बाकरी, बणें भेडा-बाकरी, नील गाऊई, सोभी रंगे हरन अर घोर्हल़े शिखा खाई। 6तम्हैं सका पृथूईए तिन्नां ज़ीबो मास्स खाई, ज़सरै छ़ल़ू अर गोछ़ै दी च़िरअ हआ अर जगैल़ बी करा। 7पर इना मांझ़ै निं तम्हैं ऊँट, बणें मुश्शै अर खरगोशे शिखा खाई किल्हैकि ईंयां जगैल़ ता करा पर इने गोछ़ै अर छ़ल़ू निं च़िरअ हंदअ। तैही आसा ईंयां छ़ोतलै। 8नां तम्हैं सुंगरे शिखा खाई किल्हैकि सुंगरे गोछ़ै च़िरअ ता हआ पर अह निं जगैल़ करदअ। इना ज़ीबे नां ता तम्हैं शिखा खाई अर नां इना मरी करै छ़ुंहीं एता करै लागणीं तम्हां छ़ोत।
9“ज़ेतरै ज़ीब नदी अर समुंदरै पाणीं जैंदरी रहा, तेता मांझ़ै सका तम्हैं तिन्नां ज़ीबा खाई ज़ेथ फैंख अर पिंझ़ै हआ। 10एता का लाऊआ ज़ुंण ज़ीब पाणीं जैंदरी रहा तिन्नें शिखा निं खाई, तिन्नां निं मरी करै छ़ुंहीं बी आथी। तिंयां आसा तम्हां लै छ़ोतलै अर तेता करै लागणीं तम्हां छ़ोत।
11“ज़ेतरै बी च़ेल्लू-पखीरू शुचै आसा, तेते शिखा बी सका तम्हैं खाई। 12-18पर इना च़ेल्लू-पखीरू मांझ़ै निं तम्हैं गरली, मुक्षरलै, सोभी रंगे बाज़, सोभी रंगे काअ, शुतर मुर्गै, च़ोस्सअ, पाणींए काअ, सोभी रंगे हुहल़ू, हांसा ज़िहअ बडअ बतख, हांस, सारस, बगुल्लअ, हिफलअ अर च़मिंधरे शिखा खाई। 19ज़ुंण किल़ै धरनीं माट्टै दी लरुगी करै रिंगा तिन्नां ज़ीबे शिखा निं तम्हैं खाई किल्हैकि तिंयां आसा छ़ोतलै। 20हाँ, ज़ुंण किल़ै फैंखा आल़ै अर च़ऊ ज़ांघा हांढणै आल़ै शुचै आसा, तिन्नां सका तम्हैं खाई।
21“तम्हैं आसा थारै परमेशर बिधाता लै पबित्र, ज़ै तम्हां कुंण पशू मूंअ द भेटे, तेते शिखा निं तम्हैं खाई। हाँ, तम्हैं सका तेता तिन्नां परदेसी लै दैई ज़ुंण थारी नगरी आसा बस्सै दै या तिन्नां परदेसी मणछा का बेच़ी ज़ुंण थारी नगरी आसा आऐ दै।#लुआ. 23:19; 34:26
“छ़ेल्हूए शिखा निं तम्हैं बाकरीए दुधा जैंदरी सटेऊई।
आपणीं पज़ैआ का दैऐ दसुअ निसब बिधाता लै
22“इज़राईलीओ, हर साल डाहै तम्हैं आपणैं खेचे पज़ैआ मांझ़ै नाज़ो दसुअ निसब बिधाता लै ज़ुदअ।#लेब. 27:30-33; गण. 18:21 23दाखे रस, जैतूने तेला मांझ़ै बी डाहै दसुअ निसब ज़ुदअ। डागै-चैणें हेल़्ही मांझ़ै पैहलै सोए नर पशू बी डाहै बिधाता लै ज़ुदै। तेखअ निंयैं इना तैहा पबित्र ज़ैगा लै ज़ुंण बिधाता आप्पू लै आसा छ़ांटी दी। संघा खाऐ तेता तिधी बिधाता नदरी। इहअ करै एता लै कि तम्हैं सदा आपणैं परमेशर बिधातो अदर करे।
24“ज़ै इहअ होए कि तम्हैं आसा तैहा बिधाते पबित्र ज़ैगा का इहै खास्सै दूर कि तम्हैं निं आपणीं पज़ैआ मांझ़ै दसुअ निसब तिधी पजैल़ी बगारी सकदै, 25तै पाऐ तम्हैं तेता कहा का बेच़ी, तेखअ लोल़ी तम्हैं नढैऊऐ तिन्नां ढब्बै लई बिधाते पबित्र ज़ैगा लै आऐ। 26ज़ेभै तम्हैं आपणैं टबरा संघी तिधी पुजी जाए, तेखअ दैऐ तिन्नां ढब्बै करै बडअ भोज़। तिधी लऐ तम्हैं तिन्नां ई ढब्बै करै हेल़्ही का डागै-चैणैं, दाखो रस अर ज़िहअ-ज़िहअ तेरअ दिल बोले तिन्नां च़िज़ा मोलै। 27तिधी डाहै तम्हैं हेरे ऐहा गल्लो धैन, लेबी गोत्रा मांझ़ा का लऐ भोज़ा लै ज़रूर शादी, किल्हैकि तिन्नां लै निं तम्हां संघै ज़िम्मीं दी किछ़ै हेस्सअ आथी दैनअ द।
28“हर बारी ज़ेभै चिऊथी साला मुक्कणीं, तेभै करै तम्हैं आपणीं सारी पज़ैआ मांझ़ै दसुअ निसब नगरीए भढारै कठा, 29तेखअ दैऐ भढारा का लेबी गोत्रा लै किल्हैकि तिन्नां निं तम्हां संघै ज़िम्मीं दी हेस्सअ आथी भेटअ द। थारी नगरी ज़ुंण गरीब, छ़ुटअ-मुक्कअ द, बिधबा अर कुंण परदेसी होए, तिन्नां लै बी दैऐ तेऊ ई भढारा का खाणां लै ताकि तिंयां बी भुखै निं रहे। इहअ करै हणअ थारअ परमेशर बिधाता तम्हां करै खुश अर तेऊ दैणीं थारै सोभी कामां दी बर्गत।”
Currently Selected:
बधान 14: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
