1 राज़ै 4
4
राज़ै सुलैमाने कार-करिंदै
1सुलैमान त सोभी इज़राईली प्रैंदै राज़अ, 2तेऊए खास कार-करिंदै थिऐ ईंयां:
सदोको शोहरू अजर्याह त प्रोहत,
3दरबारै काईथ आसा तै: शेशे शोहरू एलीहोरेप अर आहिजा।
इतिहास लिखणैं आल़अ त आहीलूदो शोहरू जहोशापात।
4जहोयादो शोहरू बेनियाह थिअ सैनापति अर सदोक अर अबतार तै प्रोहत।
5नातानो एक शोहरू अजर्याह त सोभी दरोगैओ प्रधान अर दुजअ शोहरू जाबूद प्रोहत त राज़ैओ सलाहकार।
6आहीशार त राज़े मैहलै सोभी दासा प्रैंदै सैणअ।
सोभी बेठू प्रैंदै सैणअ थिअ अबदो शोहरू अदोनीराम।
7राज़ै सुलैमाने तै इज़राईले बारा गहल़ा दी बारा दरोगै। तिंयां करै तै तिन्नें गहल़ा का राज़े मैहला लै ज़िणसो इंतज़ाम। तिन्नां लै तै भिन्नैं बांडै दै हर साल एछा त तिन्नां मांझ़ै हरेकी लै एक भिन्नअ अर तेभै हआ ती तेऊए ज़िम्मैंबारी। 8बारा गहल़ै ज़ुंण बारा दरोगै थिऐ, तिंयां आसा ईंयां:
बेनहूर थिअ एप्रैम गोत्रे सारै धारा बाखे मुल्खै दरोगअ।
9बेनेदकेर थिअ मकास, शालबीम, बेथ-शमेश अर एलोन-बेथ-हनान नगरी लै दरोगअ।
10बेनहेसद थिअ अरूबोत, सोको नगरी अर हेपेर नगरीए सारै मुल्खा लै दरोगअ।
11बेन-अबीनादाब ज़ुंणीं राज़ै सुलैमाने शोहरी तपाता संघै त बैह किअ द, सह थिअ नापात-दोर सारै मुल्खा लै दरोगअ।
12आहीलूदे शोहरू बाना का थिअ तनाक, मगिदो नगरी अर बेथ-शान सारअ मुल्ख सभाल़अ द ज़ुंण सारतान नगरी नेल़ अर जज्रेल दखणा बाखा बेथ-शान पोर्ही अबेल-मेहोला जोकमीम नगरी पोर्ही तैणीं आसा।
13बेनगेबर थिअ गलाद रामोत नगरी अर तिन्नां सोभी गरांओ दरोगअ ज़ेथ मनिश्शे गोत्रे याईर टोली थिई बस्सी दी। होर थिऐ तेऊ का बाशान देशे अर्गोब सारअ मुल्ख सभाल़अ द। तेथ थिई शाठ नगरी अर तेता फेर-फिरदै थिऐ गहल़ अर तेते प्रऊल़ी दी थिऐ कांस्से द्रींड लागै दै।
14ईदूओ शोहरू आहीनदाब त माहानीम गहल़ो दरोगअ।
15आहीमासै त सुलैमाने बासमत नाओंए शोहरी संघै बैह किअ द, अर सह थिअ नप्ताली मुल्खो दरोगअ।
16हूशाईओ शोहरू बाना थिअ आशेर गोत्रे बालोत नगरीए सारै मुल्खो दरोगअ।
17इस्साकार गोत्रे मुल्खै थिअ पारुहो शोहरू जहोशापात दरोगअ।
18बिन्यामीन गोत्रे मुल्खै ईलो शोहरू शिमी।
19ऊरीओ शोहरू गेबर थिअ गलाद मुल्खा लै दरोगअ। तेऊ मुल्खै करा तै कधू अमोरी राज़अ सिहोन अर बाशान देशो राज़अ ओग राज़।
इना बारा गहल़े दरोगै का लाऊआ थिअ सारी यहूदा मुल्खै प्रैंदै एक बडअ दरोगअ बी।
राज़ै सुलैमाने राज़ा दी सिअं
20यहूदा अर इज़राईल देशे लोग तै समुंदरे बाढै रेता ज़िहै खास्सै गऐ दै हई। तिंयां रहा तै खाई-पिई मौज़ी। 21राज़अ सुलैमान करा त फरात दरैऊआ ओर्ही पलिश्ती देश अर मिसर देशे सिऊंआं तैणीं सोभी देशा प्रैंदै राज़। तिंयां दैआ तै सोभ तेऊ लै सारी ज़िन्दगी कारअ।#मूल. 15:18; 2 इति. 9:26
22राज़ै सुलैमाने दरबारे रसोई दी एकी धैल़ीए ज़िणस एछा ती तिह गाधै लादी मैदअ, शाठ गाधै लादी पिठअ, 23दस खुंढी धाचै दै पशू, बिह बणैं च़रनै आल़ै पशू, शौ भेडा-बाकरी अर एता का लाऊआ ती हेल़्ही दी हरन-हरनी, घोर्हल़ अर घअरै धाचै दै बणें मुर्गै।
24फरात दरैऊए पछ़मा दी सारै देशै अर तिपसा ओर्ही पछ़मा बाखा गाज़ा तैणीं ज़ेतरै बी राज़ै थिऐ, तिन्नां सोभी प्रैंदै थिअ राज़ै सुलैमानो राज़। आप्पू फेर होरी देशा संघै बी डाहा त सह मेल़-ज़ोल़। 25सुलैमाने ज़िऊंदी ज़िता रहै यहूदा अर इज़राईल बस्सै दै सोभ उतरा बाखा दान नगरी उंधै दखण बेर्शेबा तैणीं राज्ज़ी-राम्बल़ै अर हर इज़राईलीए थिऐ आपणैं-आपणैं घअर अर फेडू अर दाखे बाग अर तिन्नां निं किछ़ै डअर हंदी ती।
26राज़ै सुलैमानै तै आपणैं जुधे घोल़ै लै च़ार हज़ार खुढ बणाऐं दै। घोल़े शुंआरी करनै आल़ै शूरबीर थिऐ तेऊ का बारा हज़ार।#1 राज़. 10:26; 2 इति. 1:14; 9:25 27तेऊए बारा दरोगै आणा तै आपणैं-आपणैं भिन्नें बारी दी राज़ै सुलैमाना अर राज़े दरबारै खाणैं आल़ै लै ज़िणस। ज़ेही-ज़ेही ज़रुरत हआ ती, तिंयां करा तै तेही-तेही च़िज़ो इंतज़ाम। 28हर दरोगअ आणा त आपणीं बारी दी बगार ढोणै आल़ै पशू, घोल़ै अर बागरी ज़िहै छ़ेक्कै ठुर्हनै आल़ै घोल़ै लै ज़ौ अर ज़ेही ज़रुरत हुई तिहअ घाह हर भिन्नैं।
सुलैमाने अक्ल#भज. 89
29परमेशरै दैनी राज़ै सुलैमाना लै खास्सी अक्ल अर खास्सी समझ़। तेऊ लै दैनअ परमेशरै इहअ खास्सअ ज्ञैन कि तेता निं कुंण नापी सकदअ। 30राज़अ सुलैमान त पुर्बा बाखा देशे सोभी लोगा अर मिसर देशे लोगा का खास्सअ अक्ली आल़अ। तेऊ सान अक्ल निं कोही आथी ती। 31एतान, एज्रेही, हमान, मेहोले शोहरू कलकोल अर दारदा का बी थिई तेऊ खास्सी अक्ल। सह हुअ ओर्ही-पोर्ही होरी देशे मणछा जैंदरी बी मशूर। 32तेऊ आसा चअन हज़ार सैणीं गल्ला अर एक हज़ारा का ज़ादी गिहा खोज़ी लिखी डाही दी।#सैणीं. 1:1; 10:1; 25:1 33तेऊ आसा लाबानोन धारे केल़ुई, बडै-बडै बूट, ज़ुफा होछ़ी-होछ़ी डाल़ी, डागै, हांढणै-फिरनैं आल़ै ज़ीब, म्हाछ़ली अर च़ेल्लू-पखीरूए बारै बी खोज़अ द। 34राज़ै सुलैमाने अक्लीए गल्ला शूणीं देशा-देशे राज़ै संघा छ़ाडै लोग तेऊए सैणीं गल्ला शुणदै।
Currently Selected:
1 राज़ै 4: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
