1 राज़ै 3
3
राज़ै सुलैमानै मांगी बिधाता का अक्ल
(2 इतिहास 1:3-12)
1राज़ै सुलैमानै किअ मिसर देशे माहा राज़ै संघै ज़ोल़-मेल़ संघा किअ तेऊए शोहरी संघै बैह। तेऊ पजैल़ी सह दाबेदपूर संघा डाही तेभै तैणीं तिधी ज़ेभै तैणीं सह आप्पू लै मैहल, बिधाता लै भबन अर एरुशलेम नगरी फेर-फिरदै गहल़ा च़िणीं निं मुक्कअ। 2बिधाता लै भबन निं अज़ी बणाअं आथी त अर लोग करा तै ज़ैगै-ज़ैगै धारा बेदी बणाईं बिधाता लै बल़ीदान। 3सुलैमान झ़ूरा त बिधाता लै खास्सअ अर सह रहअ तिहअ ई करदअ लागी ज़िहअ तेऊए बाब राज़ै दाबेदै तेऊ का खोज़ी-बोली त डाहअ द। पर सह करा त सह उझै धारा डेऊई बी धूप ज़ाल़ी अर बल़ीदान दैई।
4एकी बारी डेऊअ सुलैमान राज़अ गबोन नगरीए धारा बिधाता लै बल़ीदान करदअ, किल्हैकि तिधी थिई सोभी का मशूर बेदी अर तेथ हेरै तै तेऊ कोई एक हज़ारा का बी खास्सै हूम बल़ीदान करी। 5तैहा बैल़ी आअ बिधाता सुलैमाने सुपनै संघा पुछ़अ तेऊ का इहअ, “तूह मांग मुखा, ताह किज़ै बरदान लोल़ी? ज़िहअ तूह च़ाहा, तूह मांग मुखा तिहअ, ताह मुखा किज़ै लोल़ी?”
6सुलैमानै बोलअ, “मेरअ बाब दाबेद तेरअ दास त ताल्है शुचअ-पाक्कअ अर तेऊ किअ ज़िहअ तंऐं हुकम किअ तिहअ ई। तूह झ़ूरअ मेरै बाब राज़ै दाबेदा लै सदा, तेरी हुणाकार हुई एही कि तंऐं बणाअं मेरै बाबे ज़ैगा आजू हुंह राज़अ। 7हे परमेशर बिधाता, हुंह आसा तेरअ दास अर तंऐं बणाअं मेरै बाबे ज़ैगा हुंह राज़अ। पर हुंह आसा अज़ी लान्हअ अर मुखा निं अज़ी थोघै कि राज़ किहअ करै लागा करनअ। 8हुंह आसा इधी तेरी छ़ांटी दी परज़ा जैंदरी, तिंयां आसा इहै खास्सै कि तिन्नां निं कुंण गणी सकदअ। 9तूह दै मुल्है एही अक्ल कि हुंह तेरी परज़ा प्रैंदै राज़ करी सकूं अर तिन्नां लै नसाफ दैई सकूं अर मंऐं लोल़ी भलअ अर बूरअ परखी ज़ाणअ। नांईं ताह हुंह निं तेरी एतरी खास्सी परज़ो नसाफ करी सकदअ।”
10मालक बिधाता हुअ सुलैमाना लै खुश कि तेऊ मांगअ इहअ बरदान। 11बिधाता बोलअ तेऊ लै इहअ, “लाम्मी अमर, धन-माया अर दुशमणो बनाश छ़ाडी मांगी तंऐं मुखा आप्पू लै अक्ल ताकि तूह परज़ा लै नसाफ दैई सके, 12ज़िहअ बरदान तंऐं मांगअ, मुंह करनअ ताल्है तिहअ ई। मुंह दैणीं ताल्है अक्ल अर एही समझ़ कि ताह ज़िहअ अक्ली आल़अ नां आझ़ तैणीं कुंण हुअ अर नां आजू कुंण हणअ। 13ज़ुंण तंऐं मुखा नांईं बी मांगअ सह बी दैणअ मुंह ताल्है भरपूर। तूह हणअ सारी ज़िन्दगी सेठ अर सोभी करनअ तेरअ अदर अर तूह हणअ सोभी राज़ै का महान। 14ज़िहअ हुंह बोले ज़ै तूह तिहअ ई करे अर आपणैं बाब दाबेदा ज़िहै मेरअ बधान अर तेते सोभी बिधी मने, तै दैणीं मुंह ताल्है खास्सी अमर।”
15तेखअ उझ़ुअ सुलैमान निंजा का खल़अ अर तेऊ का गअ ज़ाण्हुंई कि मालक बिधाता किई तेऊ संघै सुपनै गल्ला। तेखअ डेऊअ सह एरुशलेम नगरी संघा डेऊअ बिधाते करारे मणशू सेटा अर तिधी किऐ तेऊ बिधाता लै हूम अर मेल़-ज़ोल़े बल़ीदान संघा दैनी आपणैं सोभी कार-करिंदै लै धाम।
सुलैमानै किअ कठण मकदमैंओ नसाफ
16एकी धैल़ै हुअ इहअ कि राज़ै सुलैमाना सेटा आई दूई कंज़री बेटल़ी। 17तिन्नां मांझ़ै बोलअ एकी, “म्हारै मालक, हाम्हैं दुहै रहा एकी घअरै अर थोल़ै धैल़ै आजी सूई हुंह अर मेरै हुअ शोहरू अर अह बी थिई मुंह संघै तिधी। 18मेरै शोहरू हणें दूई धैल़ै बाद सूई अह बी अर एसो बी हुअ शोहरू। घअरै ती हाम्हैं दूई ई ज़ण्हीं होर निं कोहै आथी त। 19एकी बैल़ी हुअ इहअ कि हाम्हैं ती सुत्ती दी अर अह रही निंजा प्रैंदै आपणैं शोहरू प्रैंदै बधल़ूई अर एसो शोहरू मूंअ क्सोफूई करै। 20मुंह बी ती राची नींज आई दी, अह उझ़ुई राची खल़ी संघा च़कअ मेरी कुछी सेटा का मेरअ शोहरू संघा डाहअ आपणैं च़ैन्नै सताऊई अर आपणअ मूंअ द शोहरू डाहअ मेरी काछ़ा सताऊई! 21दुजै धैल़ै दोत्ती ज़ांऊं मेरी नींज डेऊई, हुंह लागी आपणैं शोहरू का च़ूई पणैंऊंदी अर मंऐं भाल़अ कि सह आसा मूंअ द! ज़ांऊं मंऐं राम्बल़ै करै भाल़अ तेखअ लागअ मुखा थोघ कि अह ता मेरअ शोहरू आथी ई निं।”
22पर तैहा दुजी बेटल़ी बोलअ, “नांईं, सह ज़िऊंदअ आसा मेरअ शोहरू अर सह मूंअ तेरअ शोहरू!”
पैहली बेटल़ी दैनअ ज़बाब, “नांई, मूंअ तेरअ शोहरू अर मेरअ शोहरू आसा ज़िऊंदअ!”
इहअ करै लागी तिंयां राज़ै नदरी तिधी हठल़दी।
23तेखअ बोलअ राज़ै सुलैमानै इहअ, “तम्हैं एक बी बोला कि ज़िऊंदअ शोहरू आसा मेरअ अर दुजी बी बोला कि ज़िऊंदअ शोहरू आसा मेरअ अर मूंऐं दै शोहरू लै बोला दुहै कि अह आसा एसो!” 24तेखअ बोलअ राज़ै सुलैमानै, “ओर्ही आणा तलबार।” सपाही आणी राज़ै सेटा एक तलबार। 25तेखअ बोलअ राज़ै सुलैमानै, “एऊ ज़िऊंदै शोहरू काटा दूई बाखा लै संघा दैआ इना दुही लै आधअ-आधअ बांडी।”
26ज़ुंण तेऊ शोहरूए असली ईज थिई, तैहा फिरी आपणैं तेऊ शोहरू लै खास्सी झींण अर तैहा बोलअ राज़ै लै, “मेरै मालक, ज़ीबाण, एऊ शोहरू निं मारी, एऊ दैआ ऐहा ई लै!”
पर तैहा दुजी बेटल़ी बोलअ, “अह नां मेरअ लोल़ी हुअ नां तेरअ, एऊए करा दूई ठोर।”
27तेखअ बोलअ राज़ै सुलैमानै, “एऊ शोहरू निं मारा! एऊ दैआ ऐहा पैहली बेटल़ी लै अह आसा एऊए असली ईज।”
28ज़ांऊं इज़राईली परज़ा शूणअ कि राज़ै सुलैमानै किअ इहअ नसाफ! तिंयां लागै तेखअ राज़े कदर करदै किल्हैकि तिन्नां का गअ ज़ाण्हुंई कि परमेशरै दैनी तेऊ लै नसाफ करना लै अक्ल।
Currently Selected:
1 राज़ै 3: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
