1 राज़ै 1
1
राज़अ दाबेद हुअ खास्सअ प्रोढअ
1राज़अ दाबेद गअ त खास्सअ प्रोढअ हई, तेऊए दास डाहा तै तेऊ खास्सै नैत्तै झिकल़ै जैंदरी पर सह निं केही जाम्हदअ आथी त। 2खिरी दैनी राज़ै दाबेदे कार-करिंदै तेऊ लै एही सलाह, “म्हारै मालक, हाम्हैं आणमै ताल्है एक कुंआरी शोहरी लोल़ी कि सह ताह संघै रही तेरी च़ाकरी करे। सह सुत्तणी तेरी काछ़ा ताकि ताल्है नैत्तअ होए।” 3तिंयां रहै इज़राईला दी सारै शोहरी लोल़ै लागी, खिरी भेटी तिन्नां शूनेम नगरी अबीशेग नाओंए एक कुंआरी शोहरी अर तिन्नैं आणी सह राज़ै दाबेदा सेटा। 4सह शोहरी ती हेरनी सोभी का बित्ती, सह लागी तेखअ राज़ै दाबेदे च़ाकरी करदी। पर राज़अ दाबेद निं तैहा ज़ुआन शोहरी संघै सुत्ती बी जाम्हअ।
5-6 #
2 शमू. 3:4
अदोनियाह त राज़ै दाबेद अर हागीता का हुअ द शोहरू, सह थिअ अबशलोमा कान्हअ। ऐबै त दाबेदे शोहरू मांझ़ै सह ज़ेठअ। हेरनअ बी थिअ सह बेघै बित्तअ। राज़ै दाबेदै निं सह होछ़ी उझै नैरअ बी आथी त! तेऊ का निं सह कधू इहअ बी पुछ़दअ आथी त, “तंऐं इहअ किल्है किअ?” एकी धैल़ै लागअ सह करेर्हुई करै इहअ बोल्दअ, “ऐबै बणनअ मुंह राज़अ!” तेऊ आणै आप्पू लै रथ अर घोल़ै अर आप्पू आजू हांढणा लै पज़ाह सपाही। 7अदोनियाह डेऊअ सरूयाहे शोहरू जोआब अर अबतार प्रोहता सेटा कि राज़ै बणना लै तेऊओ साथ दैए। तिंयां दुहै हुऐ तेऊए साथ दैणा लै तैर। 8पर सदोक प्रोहत, जहोयादो शोहरू बेनियाह, नातान गूर, शिमी, रेई अर दाबेदे फाज़त करनै आल़ै शूरबीरै निं अदोनियाहो साथ दैनअ।
9एकी धैल़ै किऐ अदोनियाह राज़ै अनरोगल़ कुहै नेल़ जेहलेत नाओंए टोल्हा सेटा हेल़्ही का छ़ांटी करै भेड़, बल्द अर धाचै दै बाछ़ू बल़ीदान। संघा शादै तेऊ आपणैं सोभ भाई अर यहूदा का दाबेदे सोभ कार-करिंदै धामा खांदै। 10पर तेऊ निं आपणीं काकी माए शोहरू सुलैमान, नातान गूर, बेनियाह अर दाबेदे फाज़त करनै आल़ै शूरबीरा मांझ़ै कोही लै छ़ांदअ किअ।
सुलैमान बणाअं राज़अ
11इहअ शूणीं डेऊअ नातान गूर सुलैमाने ईज बेतशेबा सेटा संघा लागअ पुछ़दअ, “ताखा बी लागअ थोघ कि हागीतो शोहरू अदोनियाह आसा गअ द ऐबै आप्पू ई राज़अ बणी? राज़ै दाबेदा का निं ऐहा गल्लो थोघ बी आथी!#2 शमू. 12:24 12ज़ै तूह आपणीं अर आपणैं शोहरूए ज़िन्दगी बच़ाऊंणी च़ाहा, तै आसा ताल्है मेरी एही सलाह कि 13तूह लअ एकी बारी राज़ै दाबेदा सेटा लै डेऊई संघा पुछ़ तेऊ, ‘मालक, तंऐं मुल्है इहै कऊंलै बच़न निं आथी दैनै दै कि ताह बणाणअं मेरअ शोहरू सुलैमान आप्पू बाद राज़अ? तेतो ऐबै कै हुअ? तै किल्है गअ अदोनियाह राज़अ बणी?’ 14ज़ेतरी तूह राज़ै का इना गल्ला करदी हणीं लागी दी, तेतरी जाणअ तिधी हुंह पुजी संघा खोज़ूं आजू हुंह आप्पै कि हाँ इहअ ई हुअ।”
15बेतशेबा डेऊई राज़े पांडा राज़ै दाबेदा भाल़ी। दाबेद त खास्सअ प्रोढअ गअ द हई, अर तेऊए च़ाकरी करा ती शूनेम नगरी का आणी दी सह कुंआरी शोहरी अबीशेग। 16बेतशेबा टेक्कअ राज़ै दाबेदा सेटा माथअ अर राज़ै पुछ़ी सह, “ताह किज़ै लोल़ी?”
17बेतशेबा दैनअ ज़बाब, “मेरै मालक, तंऐं आसा मुल्है बिधाते सोह खाई कऊंलै बच़न दैनै दै, ‘मुंह बाद बेशणअ मेरी राज़गाद्दी दी तेरअ शोहरू सुलैमान राज़अ।’ 18मालक, पर ऐबै हेरअ अदोनियाह राज़अ बणाईं अर मेरै मालक! ताखा निं ऐहा गल्लो थोघ ई आथी! 19माहा राज़अ, हेल़्ही का छ़ांटी करै हेरै तेऊ भेड़, बल्द अर धाचै दै बाछ़ू बल़ीदान करी! तेरअ सैनापति जोआब अर अबतार प्रोहत आसा धामा खांदै शादै दै, पर तेरअ शोहरू सुलैमान निं तेऊ शादअ! 20मेरै मालक, सोभ इज़राईली आसा ऐबै ताह बाखा भाल़ै लागै दै कि तूह खोज़ आप्पै कि ताह बाद तेरी राज़गाद्दी दी राज़अ कुंण बेशणअ? 21मेरै मालक, ज़ै तूह इहअ नांईं करे, तिंयां सका इहअ बोली कि सुलैमान अर मंऐं किअ द्रोह! तिन्नां न्हैल़णअ तूह मरदअ संघा पाणै हाम्हैं दुहै मारी!”
22बेतशेबा ती राज़ै दाबेदा संघा गल्ला करदी ई लागी दी कि तेतरी गअ नातान गूर राज़े मैहलै पुजी। 23राज़ै का हेरअ कुंणी खोज़ी कि नातान गूर आअ। नातान डेऊअ कोहरअ राज़ै दाबेदा सेटा संघा किअ राज़ैओ अदर करना लै जान्हूंए बलै बेशी उटअ मूंड। 24तेखअ बोलअ नातान गूरै, “मेरै मालक, तंऐं इहअ हुकम हेरअ ज़ारी करी, ‘अदोनियाह हणअ मुंह बाद राज़अ अर मेरी गाद्दी दी बेशणअ सह?’ 25आझ़ दोत्ती पै किऐ तेऊ खास्सै बल्द बल़ीदान अर धाचै दै बाछ़ू बी अर भेडा बल़ीदान। तेऊ आसा तेरै सोभी शोहरू, तेरै सैनापति अर अबतार प्रोहता लै छ़ांदअ किअ द। तिंयां आसा धामा खांदै अर एही ज़ै-ज़ैकार करदै लागै दै, ‘राज़अ अदोनियाह लोल़ी सदा ज़िऊंदअ रहअ।’ 26पर माहा राज़अ, तेऊ नां हुंह तेरअ दास शादअ, नां सदोक प्रोहत, नां जहोयादो शोहरू बेनियाह अर नां तेरअ शोहरू सुलैमान शादअ! 27मालक, इहअ करना लै कै तंऐं आप्पै दैनी ज़ाज़त? तंऐं निं हाम्हां का खोज़णें ज़रुरत बी समझ़ी! तंऐं हाम्हां का किल्है निं खोज़अ कि ताह बाद तेरी गाद्दी दी राज़अ कुंण बेशणअ?”
28राज़ै दाबेदै बोलअ, “बेतशेबा शादा भिई ओर्ही मुंह सेटा लै।” बेतशेबा आई संघा खल़्हुई राज़ै सेटा। 29तेखअ बोलअ राज़ै दाबेदै, “इज़राईले परमेशर बिधाता ज़ुंणीं हुंह आझ़ तैणीं राज्ज़ी-राम्बल़अ डाहअ, 30तेऊए नाओंऐं करा हुंह ताल्है दैनै दै तिन्नां कऊंलै बच़ना पूरै कि मुंह बाद बेशणअ तेरअ शोहरू सुलैमान मेरी गाद्दी दी राज़अ!”
31बेतशेबा टेक्कअ राज़ै सेटा धरनीं उटअ पल़ी माथअ संघा बोलअ इहअ, “मेरअ मालक राज़अ दाबेद लोल़ी जुगै-जुगै तैणीं ज़िऊअ!”
32तेखअ बोलअ राज़ै दाबेदै, “सदोक प्रोहत, नातान गूर अर जहोयादे शोहरू बेनियाह शादा ओर्ही मुंह सेटा लै।” ज़ांऊं तिंयां राज़ै सेटा लै आऐ, 33राज़ै बोलअ तिन्नां लै इहअ, “मेरै दरबारे कार-करिंदै निंयां आप्पू संघै अर मेरै शोहरू सुलैमाना निंयां मेरी खच़रा प्रैंदै बशैल़ी संघा डेओआ गीहोन कुहै सेटा। 34तिधी करै नातान गूर अर सदोक प्रोहत तेऊओ अभिषेक संघा बोलै नर्शिंगै बाज़ी करै ज़ोरै-ज़ोरै, ‘इज़राईलो राज़अ सुलैमान लोल़ी जुगै-जुगै ज़िऊअ!’ 35तेखअ आणै तेऊ तिधा का आप्पू संघै मेरै मैहला लै अर तेखअ बशैल़ै इधी मेरी गाद्दी प्रैंदै। सुलैमान ई छ़ांटअ मंऐं इज़राईल अर यहूदा मुल्खो राज़अ।”
36जहोयादे शोहरू बेनियाह बोलअ राज़ै लै, “मेरै मालक, हाम्हां करनअ ज़िहअ तंऐं बोलअ तिहअ ई, बिधाता बी लोल़ी त इहअ ई दैनअ हणैं। एवमस्तू 37मेरै मालक, बिधाता रहअ सदा ताह संघै, हुंह करा तेऊ बिधाता का अरज़ कि सुलैमाना संघै बी लोल़ी सह तिहअ ई रहअ अर सह लोल़ी तेऊ ताखा बी महान राज़अ बणाअं।”
38तेखअ डेऊऐ सदोक प्रोहत, नातान गूर अर जहोयादो शोहरू बेनियाह राज़ दरबारे सपाही संघा निंईं उंधै। तिन्नैं निंयं सुलैमान राज़ै दाबेदे खच़रा दी बशैल़ी गीहोन कुहै सेटा लै। 39सदोक प्रोहतै निंईं बिधाते खिम्भा भितरी पबित्र ज़ैगा का तेलो शींग भरी संघा किअ सुलैमानो अभिषेक। तेखअ बाज़अ तिन्नैं नर्शिंगअ अर सोभी लोगै बोलअ ज़ोरै-ज़ोरै, “राज़अ सुलैमान लोल़ी जुगै-जुगै ज़िऊअ!” 40तेखअ आऐ तिंयां सोभै सुलैमाना संघै बशूरी बाज़दी अर राज़े ज़ै-ज़ैकार करदी। तिन्नों हाल्लअ त इहअ कि ज़ाणनअ धरती दी हुई ज़ाज़री।
41अदोनियाह अर तेऊए सारै प्राहुणैं मुक्कै खाई-पिई अर तिन्नैं बी शूणअ ज़ोरै-ज़ोरै ज़ै-ज़ैकार करनैओ हाल्लअ। ज़ांऊं जोआबै नर्शिंगअ शूणअ, तेऊ बोलअ इहअ, “नगरी दी अह एतरअ हाल्लअ किज़ू पल़अ होए?” 42ज़ेतरी सह बोली निं मुक्कअ, तेतरी गअ अबतार प्रोहतो शोहरू जोनातान तिधी पुजी। अदोनियाह बोलअ तेऊ लै, “ओर्ही एछ छ़ेक्कै भितरा लै, तूह आसा भलअ मणछ अर तंऐं आणी हणीं किज़ै खुशीए खबर।”
43जोनातानै बोलअ अदोनियाह लै, “ताल्है निं मुखा एही खबर आथी! एभै पै मुक्कअ म्हारअ राज़अ दाबेद सुलैमाना राज़अ बणाईं। 44तेऊ छ़ाडै सदोक प्रोहत, नातान गूर अर जहोयादो शोहरू बेनियाह आपणैं राज़ दरबारे सपाही तेऊ संघै, तिन्नैं बशैल़अ सह राज़े खच़रा प्रैंदै, 45सदोक प्रोहत अर नातान गूरै किअ तेऊओ गीहोन कुहै सेटा अभिषेक। तेखअ डेऊऐ तिंयां ज़ोरै-ज़ोरै ज़ै-ज़ैकार करदी नगरी लै फिरी अर नगरी आसा सोभ खुशी-खुशी नाच़दै-खेल्हदै लागै दै। अह आसा तेतो हाल्लअ ज़ुंण तम्हैं एभै शूणैं आसा लागै दै। 46ऐबै डेऊणअ सुलैमान राज़े मैहला लै संघा बेशणअ राज़े गाद्दी दी। 47होर हुअ इहअ कि, राज़े कार-करिंदै डेऊऐ आपणैं माहा राज़अ दाबेदा सेटा लै शूकर करदै तिन्नैं बोलअ इहअ, ‘बिधाता लोल़ी त सुलैमान ताखा बी महान राज़अ बणाअं।’ राज़ै दाबेदै टेक्कअ आपणैं च़ैन्नै ई बिधाता सेटा माथअ संघा बोलअ इहअ, 48‘हे इज़राईले परमेशर बिधाता, तेरी लोल़ी सदा ज़ै-ज़ैकार हुई, तंऐं बशैल़अ मेरी राज़गाद्दी प्रैंदै मेरी ई लुआदा मांझ़ै मुंह बाद राज़अ अर तंऐं डाहअ हुंह ज़िऊंदअ कि हुंह इहअ हंदअ आपणीं आछी भाल़े!’”
49तेखअ ज़ुंण तिधी अदोनियाह सेटा प्राहुणैं तै आऐ दै, तिन्नां छ़ुटअ डरै दर्छ़णअ, संघा लागै तिधा का आपणीं-आपणीं बाता हांढदै। 50अदोनियाह बी पल़ी दिलै सुलैमाने डअर। सह डेऊअ बिधाते पबित्र ज़ैगा खिम्भा भितरी संघा डाहै बेदीए शींग ढाकी।
51राज़ै सुलैमाना का हेरअ कुंणी खोज़ी कि अदोनियाह आसा तेऊ का इहअ खास्सअ डरअ द कि तेऊ आसा डाहै दै बेदीए शींग ढाकी, संघा बोला सह इहअ, “हुंह च़ाहा इहअ कि राज़अ सुलैमान काढे सोह कि तेऊ निं हुंह मारनअ आथी।” 52सुलैमानै बोलअ इहअ, ज़ै तेऊओ दिल शुचअ होए, तै निं हुंह तेऊए मुंडो एक शराल़ बी ज़ांऐं दैंदअ हणैं, पर ज़ै तेऊए दिलै खोट होए, तै निं हुंह तेऊ मारनै का छ़ाडी गअ। 53राज़ै सुलैमानै छ़ाडै आदमी कि अदोनियाह आणा बेदी सेटा का ओर्ही काढी। राज़ै सुलैमाना सेटा पुजी टेक्कअ अदोनियाह धरनीं उटअ पल़ी माथअ, राज़ै सुलैमानै बोलअ तेऊ लै इहअ, “तूह लाग आपणैं घअरा लै डेऊंदअ।”
Currently Selected:
1 राज़ै 1: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
