गिणती 33
33
मिस्रो ते मोआबो तक सफर
1जदुए ते इस्राएली मूसा ओर हारूणो री अगुवाईया ते दल बणाई की मिस्र देशो ते निकल़े, तदुओ ते तिना रे ये पड़ाव ऊए जेती सेयो आपणे सफरो रे रूकी रे थे। 2मूसे यहोवे ते आज्ञा पाई कि तिना रा चलणा तिना रे पड़ाव रे मुताबिक लिखी ता ओर से ईंयाँ ए। 3सालो रे पईले मीन्ने रे पन्द्रुए दिने इस्राएली लोक रामसेस नाओं रे मिस्र शईरो ते चले; से फसह रा दूजा दिन था जेबे सेयो सबी मिस्री लोका रे देखदे बड़ी कामयाबिया साथे निकल़ी गे, 4तेस बखते मिस्री लोक आपणे सबी जेठेया बच्चेया खे माट्टी देणे लगी रे थे जो यहोवे काई राखे थे कऊँकि तिने तिना रे देवतेया खे बी सजा दित्ती। 5इस्राएली लोके रामसेसो ते निकल़ी की सुक्कोत नाओं री जगा रे जाई की डेरे खड़े कित्ते। 6तिने सुक्कोतो ते निकल़ी की एताम नाओं री जगा रे डेरे लगाए जो मिस्र देश ओर सुनसाण जगा रे कनारे पाँदे ए। 7फेर सेयो एतामो ते निकल़ी की पीहहीरोतो खे मुड़ी गे, जो बालसपोनो रे सामणे ए ओर मिग्दोल जगा रे नेड़े आपणे डेरे खड़े कित्ते। 8फेर सेयो पीहहीरोतो रे सामणे ते निकल़ी की समुद्रो खे टपी की सुनसाण जगा रे गए ओर तिने एताम नाओं री सुनसाण जगा रिये तिऊँ दिना री बाटा रिये चली की मारा#33:8 मारा मारा रा मतलब ए “कड़ुआ” एती कड़ुआ पाणी मीठा कित्तेया था रे डेरे पाए। 9फेर मारा ते निकल़ी की सेयो एलीमो खे गए ओर एलीमो रे पाणिए री बारा सूबल़ा ओर 70 खजूरो रे डाल़ मिले, ओर तिने तेती डेरे खड़े कित्ते। 10तेबे तिने एलीमो ते निकल़ी की लाल समुद्रो रे कनारे पाँदे डेरे खड़े कित्ते। 11ओर लाल समुद्रो ते निकल़ी की सीन नाओं री सुनसाण जगा रे तिने डेरे खड़े कित्ते। 12फेर तिने सीन नाओं री सुनसाण जगा ते निकल़ी की दोपका नाओं री जगा रे डेरा लगाया। 13फेर तिने दोपका ते निकल़ी की आलूशो रे डेरा लगाया। 14तिने आलूशो ते निकल़ी की रपीदीम नाओं री जगा रे डेरा लगाया ओर तेती तिना लोका खे पीणे रा पाणी नि मिलेया। 15फेर तिने रपीदीम नाओं री जगा ते निकल़ी की सीनै रे सुनसाण जगा रे डेरे लगाए। 16फेर तिने सीनै रे सुनसाण जगा ते निकल़ी की किब्रोतहत्तावा नाओं री जगा रे डेरा पाया। 17ओर किब्रोतहत्तावा ते निकल़ी की हसेरोतो रे डेरे पाए। 18ओर हसेरोत नाओं री जगा ते निकल़ी की रित्मा रे डेरे पाए। 19फेर तिने रित्मा नाओं री जगा ते निकल़ी की रिम्मोनपेरेसो रे डेरे खड़े कित्ते। 20तिने रिम्मोनपेरेसो री जगा ते निकल़ी की लिब्ना रे डेरे खड़े कित्ते। 21फेर तिने लिब्ना नाओं री जगा ते निकल़ी की रिस्सा नाओं री जगा रे डेरे खड़े कित्ते। 22फेर तिने रिस्सा नाओं री जगा ते निकल़ी की कहेलाता नाओं री जगा रे डेरा लगाया। 23फेर तिने कहेलाता नाओं री जगा ते निकल़ी की शेपेर पाह्ड़ो पाँदे डेरा लगाया। 24फेर तिने शेपेर पाह्ड़ो ते निकल़ी की हरादा रे डेरा लगाया। 25ओर हरादा नाओं री जगा ते निकल़ी की मखेलोत नाओं री जगा रे डेरा कित्तेया। 26ओर मखेलोत नाओं री जगा ते निकल़ी की तहतो रे डेरा लगाया। 27ओर तहत जगा ते निकल़ी की तेरह रे डेरे पाए। 28ओर तेरह जगा ते निकल़ी की मित्का रे डेरे पाए। 29फेर मित्का जगा ते निकल़ी की तिने हशमोना रे डेरे पाए। 30ओर हशमोन जगा ते निकल़ी की मोसेरोतो रे डेरे खड़े कित्ते। 31ओर मोसेरोतो ते निकल़ी की याकानिया बीचे डेरा कित्तेया। 32ओर याकानियो री ल्वादा बीचा ते निकल़ी की होर्हग्गिदगादो रे डेरा कित्तेया। 33ओर होर्हग्गिदगादो री जगा ते निकल़ी की योतबाता रे डेरा कित्तेया। 34ओर योतबाता जगा ते निकल़ी की अब्रोना रे डेरे खड़े कित्ते। 35ओर अब्रोना जगा ते निकल़ी की एस्योनगेबेरो रे डेरे खड़े कित्ते। 36ओर तिने एस्योनगेबेरो ते निकल़ी की सीन नाओं रे सुनसाण जगा रे कादेश नाओं रे देशो रे डेरे खड़े कित्ते। 37फेर कादेश देशो ते निकल़ी की होर पाह्ड़ो गे, जो एदोम देशो रे बन्ने पाँदे ए, तेती डेरे पाए। 38तेथा ते इस्राएलिया रे मिस्र देशो ते निकल़ने रे चाल़िए सालो रे पाँजुए मीन्ने रे पईले दिने हारूण पुरोईतो खे यहोवे री आज्ञा आई थी की से होर पाह्ड़ो पाँदे चढ़ो कि से तेती मरी जाओ ओर से तिंयाँ तेती मरीगा। 39जेबे हारूण होर पाह्ड़ो पाँदे मरीगा तेबे से 123 साला रा था।
40ओर अराद शईरो रा कनानी राजा, जो कनान देशो रे दक्खणी इस्से रे नेगेव देशो रे रओ था, तिने इस्राएली लोका रे आऊणे रा संदेशा पाया। 41तेबे इस्राएलिए होर पाह्ड़ो पाँदा ते निकल़ी की सलमोना देशो रे डेरे पाए। 42ओर सलमोना देशो ते निकल़ी की पूनोनो रे डेरे पाए। 43ओर पूनोनो देशो ते निकल़ी की ओबोतो रे डेरे पाए। 44ओर ओबोत देशो ते निकल़ी की अबीराम नाओं रे डीहों रे जो मोआबो रे बन्ने पाँदे ए, तेती डेरे पाए। 45तेबे तिना डीहों नाओं री जगा ते निकल़ी की तिने दीबोन गादो रे डेरा कित्तेया। 46ओर दीबोन गाद जगा ते निकल़ी की तिने अल्मोनदिबलातैम रे डेरा कित्तेया। 47ओर तिने अल्मोनदिबलातैमो जगा ते निकल़ी की नबो रे सामणे रे अबीराम नाओं रे पाह्ड़ो रे डेरा कित्तेया। 48ओर अबीराम पाह्ड़ो पाँदा ते निकल़ी की मोआबो रे मैदानो रे, यरदन नदिया रे कनारे पाँदे यरीहो शईरो रे नेड़े डेरा खड़ा कित्तेया। 49ओर तिने मोआब देशो रे मैदानो रे बेत्यशीमोतो ते कई किलोमीटरो ते लई की आबेलशित्तीमो तक यरदन नदिया रे कनारे-कनारे पाँदे डेरे पाए।
कनानो पाँदे अमला करने खे बोलणा
50फेर मोआब देशो रे मैदानो रे, यरदन नदिया रे कनारे पाँदे यरीहो शईरो रे नेड़े यहोवे मूसे खे बोलेया, 51“इस्राएली लोका खे समजयाई की बोल, जेबे तुसे यरदन नदिया ते पार ऊई की कनान देशो रे पऊँचो 52तेबे तेते देशो रे रणे वाल़ेया जिना लोका खे तुसे देखोए तिना रे देशो ते जबरदस्ती निकयाल़ी देया ओर तिना री सब कड़ी री पात्थरा री मूर्तिया खे ओर तिना री टाल़ी की बणाई री मूर्तिया खे नाश करी देओ ओर तिना री सब पूजा री ऊच्चिया जगा खे टाल़ी देओ। 53ओर तेस देशो खे आपणे अक्को रे लई की तिदे रएओ, कऊँकि मैं से देश तुसा खे देई राखेया कि तुसे तिजी रे अक्कदार ओ। 54ओर तुसे तेस देशो खे चिट्ठी पाई की आपणे गोत्रो रे कुलो रे मुताबिक बांडी लएओ; मतलब जेते कुलो रे ज्यादा लोक ए तिना खे ज्यादा जमीना रा इस्सा देणा ओर जेते कुलो रे थोड़े लोक ए तिना खे थोड़ा जमीना रा इस्सा देणा; जेते कुलो री चिट्ठी जेते जगा खे निकल़ो सेई तेसरा इस्सा ठईरो; आपणे पितरा रे गोत्रा रे मुताबिक आपणा-आपणा इस्सा लणा। 55पर जे तुसे तेस देशो रे रणे वाल़ेया खे आपणी जगा बीचा ते नि निकयाल़ोगे, तो तिना बीचा ते जिना खे तुसे रणे देओगे सेयो तुसा री आखी रे कांडे ओर तुसा री आड्डिया रे परेगा जेड़े ठईरने ओर सेयो तेस देशो रे जेती तुसे रणे तिना तुसे मुसीबता रे पाणे। 56ओर मैं तिना ते जेड़ा बर्ताव करने री इच्छा करी राखी तेड़ी ई मां तुसा ते करनी।”
Currently Selected:
गिणती 33: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
