लेवी बिधान 24
24
पवित्र दिऊए सजाणा
1यहोवे मूसे खे बोलेया, 2“इस्राएलिया खे ये आज्ञा दे कि मांगे प्रयासा देणे खे कूटी की निकयाल़े रा जैतूनो रा साफ तेल ली आऊणा, ताकि मिलणे वाल़े तम्बूए रे दिऊआ सदा बल़दा रओ। 3हारूण दिऊएया खे मिलणे वाल़े तम्बूए रे, गवाईया खे टकणे वाल़े बीचले पड़दे ते बारे यहोवे रे सामणे हर रोज साँजा ते प्यागा तक बाल़ी की राखो; ये तुसा री पीढ़िया-पीढ़िया खे सदा री रवाज ठईरो। 4से सूईने री दिऊए राखणे री पवित्र तख़्तिया पाँदे दिऊए खे यहोवे री मौजुदगिया रे हर रोज सजाया करो।”
पेंटा रिया रोटिया
5तैं 24 किलो मैदा लई की बारा रोटिया पकवाणियां, हर रोटी दो किलो मैदे री बणाई जाओ। 6तेबे तिना रिया दो पाल़िया करनिया, एकी-एकी पाल़िया रे छे-छे रोटिया, साफ सूईने रे मेजो पाँदे यहोवे री मौजुदगिया रे राखणियां। 7ओर एकी-एकी पाल़िया पाँदे शुद्ध लोबान राखणा कि से रोटी याद दलाणे वाल़ी चीज यहोवे खे आगी रे चढ़ाई री बलि ओ। 8एसा रोटिया खे हर रामो रे दिने रोज यहोवे री मौजुदगिया रे पाल़िया रे राखेया करो, ये सदा री वाचा री रीति इस्राएलिया रिया तरफा ते ऊणी चाईयो। 9ओर से हारूण ओर तेसरे पाऊआ री ऊणी ओर सेयो तिजी खे पवित्र जगा रे खाओ, कऊँकि से यहोवे खे आगी रे चढ़ाई री बलिया बीचा ते सदा री बिदिया रे मुताबिक हारूणो खे परम पवित्र चीज ठईरी री।
परमेशरो री निन्दा करने री सजा
10एकी दिने केसी इस्राएली जवाणसा रा माठा, जेसरा बाओ मिस्री था, से इस्राएलिया बीचे चलीगा; ओर से इस्राएली जवाणसा रा माठा ओर एक इस्राएली मर्द डेरे रे आपू बीचे कुठणे लगे, 11ओर से इस्राएली जवाणसा रा माठा यहोवे रे नाओं री निन्दा करी की स्राप देणे लगेया। ये सुणी की कुछ लोक तेसखे मूसे गे लईगे। तेसरी माया रा नाओं शलोमीत था, जो दानो रे गोत्रो रे दिब्रीए री बेटी थी। 12तेबे तिने से जेला रे बन्द करिता, जदुओ तक एते गल्ला पाँदे की यहोवे री इच्छा रा साफ पता नि चली सको कि यहोवा तिना साथे क्या करना चाओआ।
13तेबे यहोवे मूसे खे बोलेया, 14“तुसे लोक तेस स्राप देणे वाल़े खे डेरे ते बारे लई जाओ; ओर जितणेया ये निन्दा सुणी राखी सेयो सब आपणा-आपणा आथ तेसरे सिरो पाँदे राखो, तेबे सारी मण्डल़िया रे लोक तेस पाँदे पात्थर बाओ। 15ओर तूँ इस्राएलिया खे बोल कि जो कोई आपणे परमेशरो खे स्राप देओगा, से आपणे पापो री सजा रा जिम्मेबार आपू ई ऊणा। 16यहोवे रे नाओं री निन्दा करने वाल़ा पक्का काई देणा चाईयो; सारी मण्डल़िया रे लोक जरूर तेस पाँदे पात्थर बाओ; चाए से आपणे प्रदेशो रा ओ, चाए परदेशी, जो कोई यहोवे रे नाओं री निन्दा करो तो से काई देणा।”
17फेर जो कोई केसी माणूंए खे प्राणो ते मारो, से पक्का काया जाओ।#24:17 मत्ती 5:21 18ओर जो कोई करेलू डांगरो खे प्राणो ते मारो, से तेसरी कीमत परी देओ, मतलब डांगरो रे बदले जिऊँदा डांगर देओ।
19फेर जे कोई केसी दूजे माणूंए खे चोट पऊँचाओ, तो जेड़ा तिने करी राखेया तेड़ा ई तेस साथे बी करेया जाओ, 20मतलब अंग-भंग करने रे बदले अंग-भंग करेया जाओ, आखी रे बदले आख, दाँदो रे बदले दाँद, जेड़ी चोट जिने केसी माणूंए खे पऊँचाई राखी ओ, तेड़ी ई तेसखे बी पऊँचाई जाओ।#24:20 मत्ती 5:38 21जो कोई केसी दूजे रे डांगरो खे काई देओ तो से तिजी रा बदला तेसखे जिऊँदा डांगर देई की परी देओ, पर माणूंए खे काणे वाल़ा, काया जाओ। 22तुसा रा नियम एक ई ओ, जेड़ा आपणे प्रदेशो रे माणूंए खे, तेड़ा ई परदेशिए खे बी ओ; आऊँ तुसा रा परमेशर यहोवा ए। 23तेबे मूसे इस्राएलिया खे ये समजयाया; तेबे तिने से स्राप देणे वाल़ा डेरे ते बारे लई जाई की तेस पाँदे पात्थर बाए। ओर इस्राएलिये तेड़ा ई कित्तेया जेड़ी यहोवे मूसे खे आज्ञा दित्ती थी।
Currently Selected:
लेवी बिधान 24: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
