लेवी बिधान 23
23
त्योआरो रिया बिदिया
1यहोवे मूसे खे बोलेया, 2“इस्राएलिया खे बोल कि यहोवे रे त्योआर, जिना रा तुसा खे पवित्र सभा कट्ठी करी की ठराए रे बखतो पाँदे प्रचार करना ओगा, मेरे सेयो त्योआर ये ए।”
राम
3तुसा खे छे दिन काम काज करने खे ए, पर सातुआ दिन परम रामो रा ओर पवित्र सभा रा दिन ए; तिदे कोई बी काम नि करना; इजी री खातर तुसे जेती बी रओ, आपणे कअरे तेस दिने केसी बी किस्मा रा काम-काज नि करना; से यहोवे रा रामो रा दिन मानणा चाईयो।
फसह ओर बिना सजेड़े री रोटी
4ये यहोवे खे ठराए रे त्योआरो रिया तँईं ठीक बखतो रे तुसा खे पवित्र सभा करने खे प्रचार करना ओगा सेयो यो ए। 5पईले मीन्ने रे चौदुए दिने साँजके बखते यहोवे रा फसह रे त्योआरो री शुरूआत ओया करो। 6ओर तेस ई मीन्ने रे पंद्रुए दिने यहोवे खे बिना सजेड़े री रोटिया रा त्योआर ओया करो; तिदे तुसे साता दिना तक बिना सजेड़े री रोटी खाणी। 7तेस त्योआरो रे पईले दिने तुसा री पवित्र सभा ओ ओर तेस दिने मईणती रा कोई काम नि करना। 8तिना सातो दिने तुसे यहोवे खे आगी बीचे नज्जो री बलि चढ़ाया करनी ओर सातुए दिने पवित्र सभा करनी; तेस दिने मईणता रा कोई काम नि करना।
पईली फसला रा त्योआर
9यहोवे मूसे खे बोलेया, 10“इस्राएलिया खे बोल कि जेबे तुसे कनान प्रदेशो रे पऊँचो, जेते खे आँऊ यहोवा तुसा खे देणे लगी रा ओर तेथो रे डोरूआ री फसल बाडो, तेबे आपणे-आपणे पाक्के रे डोरूआ री पईली फसला रा पूल़ा पुरोईतो गे ल्याया करना। 11ओर से तेस पूल़े खे यहोवे रे सामणे ईलाओ कि से तुसा रिया तँईं ग्रहण कित्तेया जाओ; पुरोईत तिजी खे रामो रे दूजे दिने ईलाओ। 12ओर जेस दिने तुसे पूल़े खे ईलाओ तेस ई दिने एकी सालो रा बिना नुक्शो रा पेडा रा बच्चा यहोवे खे होमबलि चढ़ाणा। 13ओर तिजी साथली नज्जो री बलि तेलो साथे मिले रे दो किलो मैदे री यहोवे खे सुख देणे वाल़ी खुशबू आगी रे चढ़ाई री बलि ओ; ओर तिजी साथला अर्घ एक लीटर अंगूरा रा रस ओ। 14ओर जदुए तक तुसे एस चढ़ावे खे आपणे परमेशरो गे नि लई जाओगे, तेस दिनो तक नये डोरूए री फसला बीचा ते ना तो रोटी खाणी ओर ना तिजी रा पूनेया रा नज्ज ओर ना ई अरे सिल्ले खाणे; ये तुसा री पीढ़िया-पीढ़िया रे तुसा रे सारे करानेया रे सदा री रवाज ठईरो।”
बडाईया रा त्योआर
15फेर तुसे तेस रामो रे दूजे दिनो ते, मतलब जेस दिने तुसे ईलाई जाणे वाल़ी पेंटा रे पूल़े खे ल्यायो, तेस दिनो ते पूरे सात रामो रे दिन गिणी लणे; 16तेस दिनो ते लई की सातुए रामो रे दिनो रे आगले दिनो तक 50 दिन गिणने, फेर तेस 50 वे दिने यहोवे खे नई नज्जो री बलि चढ़ाणी। 17तुसे आपणे कअरो ते दो किलो मैदे रिया दो रोटिया ईलाणे रिया पेंटा खे ली आऊणियां; सेयो सजेड़े रे पकाणियां ओर ये यहोवे खे पईली फसला री पेंट ठईरो। 18ओर तेसा रोटिया साथे एकी-एकी सालो रे सात बिना नुक्शो रे पेडा रे बच्चे, ओर एक बाच्छू ओर दो खाडू चढ़ाणे; सेयो आपणी नज्जो री बलिया साथे ओर अर्घो समेत यहोवे खे होमबलिया जेड़े चढ़ाणे, मतलब से यहोवे खे सुख देणे वाल़ी खुशबू आगी रे चढ़ाई री बलि ठईरो। 19तेबे पापबलिया खे बाकरा ओर मेलबलिया खे एकी-एकी सालो रे दो पेडा रे बच्चे चढ़ाणे। 20तेबे पुरोईत तिना दुँईं पेडा रे बच्चेया खे पईली फसला री रोटिया समेत यहोवे रे सामणे ईलाणे रिया पेंटा खे ईलाओ; सेयो यहोवे खे पवित्र पेंट ओर पुरोईतो रा इस्सा ठईरो। 21ओर तुसे तेस दिने ये प्रचार करना कि आज म्हारी एक पवित्र सभा ऊणी ओर मईणता रा कोई काम नि करना; ये तुसा रे सारे करानेया रे तुसा री पीढ़िया-पीढ़िया रे सदा री रवाज ठईरो।#23:21 प्रेरित 2:1, 1 कुरिन्थ 16:8
22जेबे तुसे आपणे जगा रे डोरूआ री फसला री बडाई करो, तेबे आपणे डोरूआ रे कूणे पूरी तरअ ते नि बाडणे ओर डोरूआ रे छूटे रे सिल्ले कट्ठे नि करने; सेयो गरीब ओर परदेशिया खे छाडी देणे जो तुसा बीचे रई की आपणी जिन्दगी कटणे लगी रे; आऊँ तुसा रा परमेशर यहोवा ए।
नये सालो रा त्योआर
23यहोवे मूसे खे बोलेया, 24“तूँ इस्राएली लोका खे बोल कि सातुए मीन्ने रा पईला दिन तुसा खे परम रामो रा दिन ओ, तेस दिनो खे याद दलाणे खे एक पवित्र सभा कट्ठी करी की रड़सिंगा बजाया जाओ। 25तेस दिने तुसे मईणता रा कोई काम नि करना ओर यहोवे खे एक आगी रे नज्जो री बलि चढ़ाणी।”
प्राश्चितो रा दिन
26फेर यहोवे मूसे खे बोलेया, 27“सातुए मीन्ने रा दसुआ दिन प्राश्चितो रा दिन मानेया जाओ; तेस दिने तुसे पवित्र सभा करनी ओर तेस दिने तुसे बरत करना ओर यहोवे खे आगी रे नज्जो री बलि चढ़ाणी। 28तेस दिने तुसे कोई काम काज नि करना; कऊँकि से प्राश्चित करने रा दिन ठराई राखेया जिदे तुसा रे परमेशर यहोवे रे सामणे तुसा रे पापो रिया तँईं प्राश्चित करेया जाणा। 29इजी री खातर जो माणूं तेस दिने बरत नि करोगा से आपणे लोका बीचा ते तेसी दिने निकयाल़ेया जाणा।#23:29 प्रेरित 3:23 30ओर जो माणूं तेस दिने कोई काम काज करोगा, से माणूं मां तेसरे लोका बीचा ते नाश करी देणा। 31तुसे कोई काम नि करना; ये तुसा री पीढ़िया-पीढ़िया रे तुसा रे कराने रे सदा री रवाज ठईरो। 32से दिन तुसा खे परम रामो रा ओ, तिदे तुसे बरत करना ओर तेस मीन्ने रे नऊए दिनो री साँजा ते लई की आगली साँजा तक आपणा रामो रा दिन मानेया करना।”
चूँगड़िया रा त्योआर
33फेर यहोवे मूसे खे बोलेया, 34“इस्राएलिया खे बोल कि तेसी सातुए मीन्ने रे पंद्रुए दिनो ते साता दिना तक यहोवे खे चूँगड़िया रा त्योआर मनाया जाओ।#23:34 यूह. 7:2 35पईले दिने पवित्र सभा ओ; तिदे मईणता रा कोई काम नि करना। 36सातो दिन यहोवे खे आगी रे नज्जो री बलि चढ़ाया करनी, तेबे आठुए दिने तुसा री पवित्र सभा ओ ओर तेस दिने तुसे यहोवे खे आगी रे नज्जो री बलि चढ़ाया करनी; से महासभा रा दिन ए, इजी खे तेस दिने मईणता रा कोई काम नि करना।”#23:36 यूह. 7:37
37यहोवे री महिमा खे ठराए रे यो ई त्योआर ए, इदे तुसे यहोवे खे आगी रे नज्जो री बलि चढ़ाणी; मतलब होमबलि, नज्जो री बलि, मेलबलि ओर अर्घ, हर एक आपणे-आपणे ठीक बखतो ते चढ़ाए जाओ ओर पवित्र सभा रा प्रचार करना। 38इना सबी ते जादा यहोवे रे रामो रे दिन मानणे ओर आपणी पेंटा ओर सब मान्नता ओर आपणी इच्छा रे मुताबिक बलिया जो यहोवे खे अर्पण करनिया, चढ़ाया करनिया।
39ये याद रओ कि सातुए मीन्ने रे पंद्रुए दिने, जेबे तुसे आपणी जमीना री फसल कट्ठी करी चुको, तेबे सात दिना तक यहोवे रा त्योआर मनाणा; पईले दिने रामो रा दिन ओ ओर आठुए दिने बी रामो रा दिन ओ। 40ओर पईले दिने तुसे अच्छे-अच्छे डाल़ा री फसल ओर खजूरी रे पत्ते, कअणे पत्तेया रे डाल़ा रिया डाल़िया ओर नाल़ो रे बियूँसो रे डाल़ो रिया डाल़िया लई की आपणे परमेशर यहोवे रे सामणे साता दिना तक खुशी मनाणी। 41हर साल साता दिना तक यहोवे री महिमा खे त्योआर मनाणा; ये तुसा री पीढ़िया-पीढ़िया तक सदा री रवाज ठईरो, कि सातुए मीन्ने रे ये त्योआर मनाया जाओ। 42साता दिना तक तुसे चूँगड़िया दे रया करना, मतलब जितणे इस्राएल देशो दे जन्मो ते ए सेयो सारे के सारे चूँगड़िया दे रओ, 43ताकि तुसा री पीढ़िया-पीढ़िया रे लोक जाणी लओ कि जेबे आँऊ यहोवा तुसा इस्राएलिया खे मिस्र प्रदेशो ते निकयाल़ी की ल्याऊणे लगी रा था, तेबे मैं सेयो चूँगड़िया रे राखे थे; आऊँ तुसा रा परमेशर यहोवा ए।
44ओर मूसे इस्राएलिया खे यहोवे री महिमा खे त्योआर मनाणे रा ठीक बखत तिना खे बोली की सुणाया।
Currently Selected:
लेवी बिधान 23: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
