लेवी बिधान 21
21
पुरोईता री पवित्रता
1यहोवे मूसे खे बोलेया, “हारूणो रे पाऊ जो पुरोईत ए तिना खे बोल कि तुसा रे लोका बीचे कोई बी मरो, तो तिना रिया बजअ ते तुसा बीचा ते कोई आपू खे अशुद्ध नि करो; 2आपणे नेड़े रे टब्बरो वाल़े, मतलब माये, बाओ, माठा, बेटी या तेरे पाईए खे, 3या आपणी जवान बईण जेसा रा ब्या नि ऊई रा ओ, जिना रा नेड़ो रा रिस्ता ए; तिना रिया तँईं से आपू खे अशुद्ध करी सकोआ। 4पर पुरोईत ऊणे रे नाते से आपणे लोका बीचे परदान ए, इजी री खातर से आपू खे एड़ा अशुद्ध नि करो कि अपवित्र ऊई जाओ। 5सेयो ना तो आपणे बाल़ कटवाओ, ना आपणी दाढ़ी बणाओ ओर ना ई आपणा शरीर चीरो। 6सेयो आपणे परमेशरो खे पवित्र बणे रे रओ ओर आपणे परमेशरो रा नाओं अपवित्र नि करो; कऊँकि सेयो परमेशर यहोवे खे आगी रे नज्जो री बलि चढ़ाया करोए; इजी बजअ ते सेयो पवित्र बणे रे रओ। 7पुरोईत वेश्या या प्रष्ट जवाणसा साथे ब्या नि करो; ओर ना ई छाडी रिया साथे ब्या करो; कऊँकि पुरोईत आपणे परमेशरो खे पवित्र ओआ।#21:7 यहेजकेल 44:22 8इजी री खातर तैं पुरोईत पवित्र जाणना, कऊँकि से तुसा रे परमेशरो री रोटी चढ़ाया करोआ; इजी री खातर से तेरी नजरा रे पवित्र ठईरो; कऊँकि आऊँ यहोवा पवित्र ए, जो तुसा खे पवित्र करोआ। 9ओर जे पुरोईतो री बेटी गल़त काम करी की आपणे आपू खे अपवित्र करो, तेबे से आपणे बाओ री बेज्जती करोई; इजी री खातर से आगी रे फूकी देणी चाईयो।”#21:9 प्रकाशित 17:16, प्रकाशित 18:8
10सबी पुरोईता बीचा ते बड़ा पुरोईत, जेसरे सिरो पाँदे अभिषेको रा जैतूनो रा तेल पाया रा ओ, ओर जो पवित्र टाल्ले पईनणे खे पवित्र करी राखेया ओ, से आपणे सिरो रे बाल़ बिखरने नि देओ, ओर ना ई आपणे टाल्ले फाड़ो। 11ओर ना से केसी लोथा गे जाओ ओर ना ई आपणे माया-बाओ रिया बजअ ते आपू खे अशुद्ध करो; 12ओर से पवित्र जगा ते बारे पनि निकल़ो, ओर ना ई आपणे परमेशरो री पवित्र जगा खे अपवित्र करो; कऊँकि तिने आपणे परमेशरो रे अभिषेको रा तेलरूपी मुकुट पईनी राखेया; आऊँ यहोवा ए। 13ओर से जेसा जवाणसा साथे ब्या करो से कुआँरी ऊणी चाईयो। 14जो बिदुआ, या छाडी री, या प्रष्ट या वेश्या ओ, एड़िया केसी साथे बी से ब्या नि करो, पर से आपणे ई लोका बीचा ते केसी कुआँरी बेटिया साथे ब्या करो। 15ताकि से आपणी ल्वादा खे आपणे लोका बीचे अपवित्र नि करो; कऊँकि आऊँ तेसरा पवित्र करने वाल़ा यहोवा ए।
शारीरिक दोष ओर पुरोईत
16यहोवे मूसे खे आगे ये बोलेया, 17“हारूणो खे बोल कि तेरे वंशो री पीढ़िया-पीढ़िया रे जेस केसी रे कोई बी शारीरिक दोष ओ से आपणे परमेशरो खे आगी रे बलि चढ़ाणे खे नेड़े नि आओ। 18जेसरे दोष ओ से नेड़े नि आओ, चाए से अन्दा ओ, चाए लंगड़ा, चाए चपटे नाको वाल़ा ओ, चाए तेसरे जादा अंग ओ,#21:18 लेवी. 22:19-25, लेवी. 22:23 19या तेसरा पैर या आथ टूटेया रा ओ, 20या से कुबड़ा या बाऊणा ओ, या तेसरी आखी रे दोष ओ, या तेस माणूंए रे सिमरनी या खाज ओ, या तेसरे अंड पिचके रे ओ; 21हारूण पुरोईतो रे वंशो रे जेस केसी रे कोई बी शरीरो रे दोष ओ, से यहोवे खे आगी रे बलि चढ़ाणे खे नेड़े नि आओ; से जेसरे दोष ए कदी बी आपणे परमेशरो री रोटी चढ़ाणे खे नेड़े नि आओ। 22से आपणे परमेशरो री पवित्र ओर परम पवित्र दुँईं प्रकारा री रोटी खाई सकोआ, 23पर तेसरे दोषो रिया बजअ ते से ना तो पवित्र जगा रे बीचले पड़दे रे पीतरे आओ ओर ना ई बेदिया रे नेड़े, जेते कि एड़ा नि ओ कि से मेरी पवित्र जगा खे अपवित्र करो; कऊँकि आऊँ तिना रा पवित्र करने वाल़ा यहोवा ए।”#21:23 लेवी. 16:2, लेवी. 21:12 24इजी खे मूसे हारूण ओर तेसरे पाऊआ खे ओर सबी इस्राएलिया खे यो गल्ला सुणाईयां।
Currently Selected:
लेवी बिधान 21: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
