लेवी बिधान 20
20
आज्ञा ना मानणे री सजा
1ओर यहोवे मूसे खे बोलेया, 2“इस्राएलिया खे बोल कि तिना बीचा ते, या तिना बीचे रणे वाल़े परदेशिया बीचा ते, चाए कोई कऊँ नि ओ, जो कोई आपणी ल्वाद मोलेक देवते खे बलिदान करो से पक्का मारेया जाणा; ओर लोक तेस पाँदे पात्थर बाओ। 3मां बी तेस माणूंए रे खलाफ ऊई की, से तेसरे लोका बीचा ते बाअरे निकयाल़ी देणा, कऊँकि तिने आपणी ल्वाद मोलेक देवते खे देई की मेरी पवित्र जगा अशुद्ध कित्ती, ओर मेरा पवित्र नाओं अपवित्र ठराया। 4ओर जे कोई माणूं आपणी ल्वाद मोलेक देवते खे बलिदान करोगा ओर लोक तिजी खे अणदेखा करो ओर तेसखे मारो नि, 5तेबे तो मां आपू ई तेस माणूंए रे ओर तेसरे कराने रे खलाफ ऊई की ओर जितणे तेस साथे ऊई की मोलेक देवते साथे व्याभिचार करोगे, सब मां तिना रे लोका बीचा ते निकयाल़ी देणे।”
6फेर जो माणूं डाऊआ या पितर जगाणे वाल़ेया रिया तरफा खे फिरोगा ओर तिना पीछे ऊई की व्याभिचारी बणोगा, तेबे मां तेस माणूंए रे खलाफ ऊई की से तेसरे लोका बीचा ते निकयाल़ी देणा। 7इजी री खातर तुसे आपणे आपू खे पवित्र करो ओर पवित्र बणे रे रओ; कऊँकि आऊँ तुसा रा परमेशर यहोवा पवित्र ए।#20:7 1 पत 1:16 8तुसे मेरी रवाजा खे मानेयो ओर तिना रा पालण करना; कऊँकि आऊँ तुसा रा पवित्र करने वाल़ा यहोवा ए।
परिवार ओर यौन पाप
9चाए कोई कऊँ नि ओ जो आपणे माया-बाओ खे स्राप देओगा, से जरूर मारेया जाणा; कऊँकि तिने आपणे माया-बाओ खे स्राप देई राखेया, इजी बजअ ते तेसरा खून तेसरे ई सिरो पाँदे पड़ना।#20:9 मत्ती 15:4, मरक 7:10
10तेबे जे कोई पराई जवाणसा साथे व्याभिचार करोगा, तो जिने केसी दूजे री जवाणसा साथे व्याभिचार करी राखेया ओ, तो से व्याभिचारी ओर से व्याभिचारिणी दोनो जरूर काये जाओ।#20:10 यूह. 8:5 11जो कोई आपणी सौतेली आम्मा साथे गल़त सम्बन्द बणाओगा, से आपणे बाओ री बेज्जती करने वाल़ा ऊणा, इजी री खातर सेयो दोनो काये जाओ, सेयो आपणे खूनो रे आपू जिम्मेबार ऊणे। 12जो कोई आपणी बऊआ साथे गल़त सम्बन्द बणाओगा, तो सेयो दोनो पक्का काये जाओ; कऊँकि सेयो उल्टा काम करने वाल़े ठईरने ओर सेयो आपणे खूनो रे आपू जिम्मेबार ऊणे। 13जो कोई मर्द दूजे मर्दो साथे गल़त सम्बन्द बणाओगा, तो सेयो दोनो नीच काम करने वाल़े ठईरने; इजी बजअ ते सेयो पक्का काये जाओ, सेयो आपणे खूनो रे आपू जिम्मेबार ऊणे।#20:13 रोमी 1:27 14जो कोई आपणी लाड़ी ओर आपणी सासु दुँईं खे राखोगा, तो ये महापाप ए; इजी री खातर से मर्द ओर सेयो जवाणसा तीनो आगी रे फूके जाओ, जेते की तुसा बीचे महापाप नि ओ। 15तेबे जे कोई मर्द डांगरा साथे गल़त सम्बन्द बणाओगा, तो मर्द ओर डांगर दोनो जरूर काये जाओ। 16जे कोई जवाणस डांगरो गे जाई की तेस साथे गल़त काम करो, तो तैं से जवाणस ओर डांगर दोनो काई देणे; सेयो पक्का काये जाओ, सेयो आपणे खूनो रे आपू जिम्मेबार ऊणे।
17जे कोई आपणी बईणी रा, चाए तेसरी सक्की बईण ओ, चाए सौतेली, तेसा रा नांगा तन देखोगा ओर तेसरी बईण बी तेसरा नांगा तन देखोगी तो से शरमा री गल्ल ए, सेयो दोनो आपणी जातिया रे लोका री आखी सामणे नाश कित्ते जाओ; कऊँकि जो आपणी बईणी रा तन क्वाड़ने वाल़ा ऊणा, इजी री खातर सेयो आपणे पापो रे जिम्मेबार आपू ई दोनो जणे ऊणे। 18फेर जे कोई मर्द केसी जवाणसा साथे जो छूणे बैठी री ओ, सम्बन्द बणाओगा, तो से मर्द तेसा रे खूनो री सूबल़ा रा क्वाड़ने वाल़ा ठईरना ओर से जवाणस आपणे खूनो री सूबल़ क्वाड़ने वाल़ी ठईरनी; इजी बजअ ते दोनो आपणे लोका बीचा ते नाश करी देणे। 19आपणी मासी या बुआ री इज्जत नि लुटणी, कऊँकि जो एड़ा करोगा से तिना री बेज्जती करोआ; इजी री खातर इना दुँईं खे आपणे पापो री सजा मिलणी। 20जे कोई माणूं आपणी चाचिया साथे गल़त सम्बन्द बणाओ, तो से आपणे चाचे री इज्जत लुटणे वाल़ा ठईरना, इजी री खातर सेयो दोनो आपणे पापो रा बोज चकी की बिना वंशो ते मरी जाणे। 21जे कोई माणूं आपणी पाबिया खे आपणी लाड़ी बणाओ, तो ये नीच काम समजणा ओर से आपणे पाईए री इज्जत लुटणे वाल़ा ठईरना, इजी बजअ ते सेयो दोनो बिना ल्वादी ते रणे।#20:21 मत्ती 14:3,4
22तुसे मेरी सब रवाजा खे ओर नियमा खे समजा साथे मानेओ; जेते कि एड़ा नि ओ कि जेते प्रदेशो रे आऊँ तुसा खे निणे लगी रा, से तुसा खे निकयाल़ी देओ। 23ओर जेते प्रदेशो री जातिया रे लोक मां तुसा रे आगे ते निकयाल़ने, तिना जेड़ी रवाजा रे मुताबिक नि चलणा; कऊँकि तिने लोके यो जो गल़त काम करी राखे, इजी बजअ ते माखे तिना ते नफरत ऊईगी री। 24पर आऊँ तुसा लोका खे बोलूँआ कि तुसे तो तिना री जमीना रे अक्कदार ऊणे ओर मां ये देश जो सच्चो खेई बऊत ई पजणे वाल़ा ए, तुसा रे कब्जे रे करी देणा; आऊँ तुसा रा परमेशर यहोवा ए जिने तुसे ओरी प्रदेशो रे लोका ते लग करी राखे। 25इजी बजअ ते तुसे शुद्ध ओर अशुद्ध डांगरा रे ओर शुद्ध ओर अशुद्ध पंछिया बीचे फर्क करना ओर कोई डांगर या पंछी या केड़ा बी जमीना पाँदे लूरने वाल़ा जीव जन्तु कऊँ नि ओ, जो मैं तुसा खे अशुद्ध ठराई की वर्जित करी राखेया, तिजी ते आपणे आपू खे अशुद्ध नि करना। 26तुसे मेरिया तँईं पवित्र बणे रे रओ, कऊँकि आऊँ यहोवा आपू पवित्र ए ओर मैं तुसे ओरी प्रदेशो रे लोका ते इजी खे लग कित्ते ताकि तुसे सदा मेरे ई बणे रे रओ।
27जे कोई मर्द या जवाणस पूत-प्रेता री सिद्धि करो, तो से पक्का काई देणा; एड़ेया खे पात्थरो साथे काई देओ, सेयो आपणे खूनो रे आपू जिम्मेबार ऊणे।
Currently Selected:
लेवी बिधान 20: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
