दानिय्येल 5
5
बेलशस्सर राजे री पाट्टिया
1कई साल बाद एक दिन बेबीलोनो रे राजा बेलशस्सरे आपणे 1,000 परदाना खे पाट्टिया कित्तिया ओर तिना सबी लोका सामणे शराब पिया। 2जेबे तिने बऊत शराब पी ली थी तेबे तिने आपणे कर्मचारिया खे आज्ञा दित्ती कि जाई की सूईने-चाँदिए रे तिना ग्लासा खे ली आओ। जो मेरे बाओए जो मांते पईले राजा था, नबूकदनेस्सरे यरूशलेमो रे मन्दरो ते लईगा था।#5:2 2 राजा 25:15 राजा बेलशस्सर, तेसरे खास दोस्त, तेसरी लाड़िया ओर तेसरी रखैला तिना दे शराब पीणा चाओईया। 3तेबे तेसरे कर्मचारिये जो सूईने रे ग्लास यरूशलेमो दे परमेशरो रे मन्दरो ते निकयाल़े थे, सेयो ल्याये ओर राजा परदान, राणिया ओर रखैला समेत तिना दे शराब पी। 4सेयो शराब पीणे ते बाद सूईने, चाँदी, पीतल़, लोए, लकड़ी ओर पात्थरो रे देवतेया री मूर्तिया री स्तुति करने लगे।#5:4 हब. 2:19, पज. 135:15-18 5अचाणक माणूंए रे आथो रिया गूठिया दिशणे लगिया। तिने राजमईलो रिया कांदा दे कुछ लिखेया। ये दिऊए गे ऊआ। राजे से आथ लिखदे ऊए देखेया, 6तिजी खे देखी की राजा बऊत डरीगा ओर से इतणा कबराईगा की तेसरे पैर कमजोर ऊईगे। ओर थूरनिया रे मारे तेसरे जानू एकी-दूजे साथे टकराणे लगे। 7फेर बाबेलो रे राजे तांत्रिक, तारेया खे समजणे वाल़े कसदी ओर भविष्य खे बताणे वाल़ेया खे बुलाणे खे जोरे की चिंगेया। तिने बोलेया, “मां तिना खे बऊत ईनाम देणा जो एस लिखे दे खे पढ़ी सकोआ ओर माखे बताई सकोआ कि एते लेखो रा क्या मतलब ए। मां तेसखे बैंगणी रंगो रे टाल्ले ओर तेसरे गल़े दे सूईने री माल़ा पन्याणी, कऊँकि आऊँ राजा ए। से मेरे राज्य दे बऊत ई खास परदान बणी जाणा; सिर्फ दो ई खास लोक ऊणे जो तेसते बड़े पदो पाँदे ऊणे।” 8तेबे राजे रे सारे पण्डत लोक पीतरे आए, पर तेस लिखे दे खे नि पढ़ी सके ओर ना राजे खे तेतेरा मतलब समजयाई सके। 9इजी ते बेलशस्सर राजा बिल्कुल कबराईगा ओर डरीगा ओर तेसरे परदान बी बऊत बेचैन ऊईगे। 10राजा ओर परदाना रे वचन सुणी की, राजे री माये पाट्टिया रे कअरे आई ओर बोलणे लगी, “ओ राजा, तूँ युगो-युगो तक जिऊँदा रये, तूँ ना तो कबरा ओर ना ई डर। 11तेरे राज्य दे दानिय्येल नाओं रा एक मर्द ए जेसरा नाओ तेरे बाओए बेलतशस्सर राखी राखेया, तेसरे पवित्र देवतेया री आत्मा तेसदे रओई ओर से बऊत ई समजदार ए, ओर तेसदे परविणता ओर परमेशरो जेड़ी बुद्धि ए। ओ नबूकदनेस्सर राजा, तेरा बाओ जो तांते पईले राजा था, तिने से ज्योतषी, तांत्रिक, कसदी ओर मरी री आत्मा साथे गल्ल करने वाल़ेया रा परदान ठराया था, 12कऊँकि दानिय्येलो दे खरी आत्मा, ज्ञान ओर परविणता ओर सुफने रा फल बताणे ओर पुजाणिया समजणे ओर शक दूर करने री सामर्थ ए। जेसरा नाओं तेरे बाओए राजे बेलतशस्सर राखी राखेया ए। इजी री खातर एबे दानिय्येलो खे बुलाओ ओर तेस ताखे बताणा कि एते रा क्या मतलब ए।”
कांदा दे लिखे दे अक्षरा रा मतलब बताणा
13तेबुई सिपाई दानिय्येलो खे राजे सामणे पीतरे लई की आए। राजा तेसते पूछणे लगेया, “क्या तूँ सेई दानिय्येल ए जो मेरे बाओए नबूकदनेस्सर राजे यहूदा प्रदेशो ते गुलाम बणाई की ल्याई राखेया? 14मैं तेरे बारे दे सुणी राखेया कि तांते परमेशरो री आत्मा रओई ओर तूँ समजदार बी ए, तांदे परविणता ओर खरी बुद्धि ए। 15देख, यबु पण्डत ओर तान्त्रिक लोक मां सामणे इजी खे ल्याये थे कि सेयो एस लिखे दे खे पढ़ो ओर इजी रा मतलब मांगे बताओ, पर सेयो इजी लिखे दे रा मतलब नि समजयाई सके। 16पर किने माखे दशी राखेया कि तूँ सुफनेया रा मतलब दशी सकेया ओर एड़ी गल्ला खे समजाई सकेया जिना खे समजणा बऊत कठण ए। जे तूँ इना लिखे दे अक्षरा खे पढ़ी की माखे इना रा मतलब बताई दे, तो मां ताखे बैंगणी रंगो रे टाल्ले ओर तेरे गल़े दे सूईने री माल़ा पन्याणी, कऊँकि आऊँ राजा ए। ओर तूँ मेरे राज्य दे बऊत ई खास परदान बणी जाणा; सिर्फ दो ई खास लोक ऊणे जो तांते बड़े पदो पाँदे ऊणे।” 17दानिय्येले राजे खे बोलेया, “माखे तेरे उपहार नि चाईयो; तिना खे आपू गे ई राखी दे ओर केसी ओरी खे देई दे। पर मां ये लिखी रिया गल्ला तेरिया तँईं पढ़ी की सुनाणियां ओर इजी रा मतलब बी तांगे समजयाणा। 18ओ राजा, परमेशरे तेरे बाओ नबूकदनेस्सरो खे जो पईले राजा था राज, तारीफ, प्रतिष्ठा ओर प्रताप दित्तेया, 19ओर तेसा तारीफा रिया बजा ते जो तिने तेसखे दित्ती थी, देश-देश, जाति-जाति ओर लग-लग पाषा बोलणे वाल़े तेस सामणे थरथराओ थे ओर डरो थे, जेसखे से चाओ था तेसखे काई देयो था ओर जेसखे से चाओ था तेसखे जिऊँदा राखो था, जेसखे से चाओ था ऊच्चा पद देई देयो था ओर जेसखे से चाओ था तेसखे पदो ते टाई बी देयो था। 20पर जेबे तेसरे मनो दे कमण्ड आया ओर तेसरी आत्मा जठर ऊई गी, एथो तक कि से कमण्ड करने लगेया, तेबे परमेशरे से तेसरे राज सिंहासनो ते उतारी ता ओर तेसरी इज्जती री जगा नि राखी।#नसी. 16:15 21से लोका बीचा ते बारे नठाईता ताकि से दूजे लोका रे नेड़े नि रई सको। परमेशरे तेसरा मन बणो रे जानवरा जेड़ा करिता। से जंगल़ी गह्देया बीचे रणे लगेया। से बल़दा जेड़ा काआ चरो था, ओर तेसरा शरीर सर्गो रे पाल़े साथे सीना ऊई जाओ था। से तदुए तक एड़ा ई रया जदुए तक तेसखे ये पता नि लगेया कि परमपरदान परमेशर ई एसा तरतिया पाँदे राज करोआ, ओर से ई तिना राज्या पाँदे राज करने खे जिना खे चाओ तिना खे राजा बणाई देयोआ। 22तेबे बी, ओ राजा बेलशस्सर, तूँ जो तेसरा उतराधिकारी ए ओर ये सब कुछ जाणेया जो तेरे बाओ साथे ऊआ था पर तेबे बी तैं आपणा मन नम्र नि कित्तेया। 23तैं सोचेया कि तूँ स्वर्गो रे परमेशरो ते बी महान ए। इजी री खातर तैं आपणे कर्मचारिया खे बोलेया कि परमेशरो रे मन्दरो रे कीमती ग्लास लई आओ। तूँ आपू, तेरी लाड़िया, तेरे खास दोस्त ओर तेरी रखैला तिना ग्लासा दे शराब पियो थे। तैं आपणे देवतेया री मूर्तिया री स्तुति कित्ती जो सूईने, चाँदी, पीतल़, लोआ, लकड़ी ओर पात्थरा रे बणी रे थे। सेयो मूर्तिया ए, जो ना देखी ओर ना सुणी सकोईया।#5:23 अय्यू. 12:10, पज. 115:4-8 24ये ई बजा ए कि परमेशरे से आथ इना अक्षरा खे कांदा दे लिखणे खे पेजेया। 25जो शब्द लिखी राखे सेयो यो ए: मने, मने, तकेल ओर ऊपर्सीन। 26इजी रा मतलब ए, मने#5:26 मने गिणेया दा , मतलब परमेशरे तेरे राजो रे दिन गिणी की एबे यो खत्म करीते। तेरे राज खत्म ऊईगा दा ए। 27तकेल, मतलब तोलेया दा, ये दखाओआ कि परमेशरे तूँ तोलेया। पर ताकड़ी दशोई कि तूँ बऊत अल़्का ए। 28पर्सेन, मतलब बांडेया दा, ये दखाओआ कि परमेशरे तेरा देश दो लग-लग इस्सेया दे करिता दा ए। तिने ये बांडी की मादिया खे ओर फारसी लोका खे देईता दा ए।” 29ये सुणने ते बाद बेलशस्सर राजे आज्ञा दित्ती कि दानिय्येलो खे बैंगणी रंगो रे टाल्ले ओर तेसरे गल़ो दे सूईने री माल़ा पन्याई जाओ, राजे री आज्ञा रे मुताबिक कित्तेया गया। तेबे प्रचार करने वाल़ेया तेसरे बारे दे बोलेया कि बाबेलो रे राज्य दे तीजा सबी ते बड़े पदो पाँदे दानिय्येल ई राज करने वाल़ा ऊणा।
बेलशस्सर राजे रा नाश
30तेसा ई राती बाबेलो रे कसदी राजा बेलशस्सरो री मौत ऊईगी। तेसरे दुश्मणे से काईता दा ए। 31तेबे मादे रा रणे वाल़ा एक माणूं जेसरा नाओं दारा था ओर तेसरी उम्र कोई बाठ साल थी, बेबीलोनो रे राज्य दे राजा बणेया।
Currently Selected:
दानिय्येल 5: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
