2 Makani 5

1Lino mwami Solomoni naakamanizya mulimo woonse waŋanda ya Leza, wakaleta zintu zyoonse Devedi wisi nzyaakapede ku Mwami Leza, nsiliva, ngolida azimwi.

Bbokesi lyacizuminano mbulyakaletwa kuŊanda ya Leza

(1 Bami 8.1-9)

2Lino mwami Solomoni wakaita bamisyobo ya Isilayeli abapati baziinga zyabo alimwi abapati bamikwasyi yabo kuti baboole ku Jelusalemu kuti bazoogwisye bbokesi lyacizuminano kuzwida ku Ziyoni, munzi wa Devedi, akulitola kuŋanda ya Leza.

3Nkabela boonse bakayoboloka ciindi capobwe lyamwezi waciloba. 4Lino bapati baba Isilayeli boonse nibakasika, bapaizi bakabweza bbokesi lyacizuminano ca Mwami Leza. 5Bakatola bbokesi eeli atente lyakuswaanganina azintu zyalyo zisalala zyoonse.

6Awalo mwami Solomoni antoomwe abantu boonse Baisilayeli bakabungana kumbele lyabbokesi lyacizuminano. Bakapaizya mbelele aŋombe zinji zitabaliki.

7Kumane bapaizi bakanjizya bbokesi lyacizuminano muŋanda ya Leza mubusena busalalisya munsi aamababa azibumbwa zyabakelebu. 8Mababa aazyo akavumbilide bbokesi lyacizuminano atukulisyo twalyo.

9Tukulisyo twalyo nkotuli asunu ntulamfu cakuti tulakonzya kubonwa amuntu wiimvwi kumbele lyabusena busalalisya, pele kutali kubusena busalala. 10Taakwe cakali mukati kabbokesi lyacizuminano pe ccita buyo mabwe obilo aapapalete aayo Mozesi ngaakabikka kucilundu ca Holebu ooko Mwami Leza nkwaakapangana cizuminano a Baisilayeli nibakazwa Muijipiti.

Bulemu bwa Mwami Leza

11Lino bapaizi bakazwa mubusena busalala. Bapaizi boonse bakali kooko bakalisalazya, kunyina makani naa bakali babulizi nzi. 12Balevi boonse bakali baimbi, Asafu, Hemani, Jedutuni antoomwe abana babo abasazinyina bakaimvwi kujwe lyacipaililo. Bakalisamide masani aandeketela kabalizya nsakalala, tuntimbwa atulumbu. Ciindi eeci nciconya bapaizi bali mwaanda amakumi obilo bakali kusiba myeembo. 13Basimyeembo abaimbi bakali kuvutukila antoomwe kabatembula akulumbaizya Mwami Leza. Bakali kusiba myeembo akulizya nsakalala azimwi zingwali-ngwali bakali kwiimbisya kabatembaula Mwami Leza kuti,

“Mwami Leza mmubotu,

nkaambo luyando lwakwe talumani.”

14Kumane ŋanda ya Mwami Leza yakazula kkumbi, aboobo bapaizi tiibakakonzya kubeleka muŋanda ya Leza akaambo kakkumbi eelyo, nkaambo bulemu bwa Mwami Leza bwakiizuzya.

Currently Selected:

2 Makani 5: Tonga96

Highlight

Copy

Compare