2 Makani 1
1
Mwami Solomoni mbwaakakumbila busongo
(1 Bami 3.1-15)
1Lino Solomoni mwanaa Devedi, wakayumya bulelo bwa Isilayeli nkaambo Mwami Leza wakwe wakalaawe, wakamusumpula.
2Mpawo Solomoni wakaambila Baisilayeli boonse, balailili babasilumamba bakali zyuulu amyaanda, babetesi, basololi ba Baisilayeli, abapati bamikwasyi. 3Wakabalailila kuti bainke ku Gibiyoni kuyookomba. Bakainka ooko nkaambo tente lya Mwami Leza nkulyakabede, tente Mozesi mubelesi wa Leza ndyaakapanga munkanda. 4Ciindi eeco bbokesi lyacizuminano lyakali mu Jelusalemu, lyakalibambidwe mutente mwami Devedi ndyaakaliyakilide ciindi naakaligwisya kuzwa ku Kiliyatijeyalimu. 5Cipaililo camukuba eeco Bezaleli mwana wa Uli, mwanaa Huu ncaakapangide acalo cakali mu Gibiyoni kumbele lyatente lya Mwami Leza. Lino Solomoni ambungano yoonse bakakomba Mwami Leza ooko. 6Solomoni wakainka kucipaililo eeco camukuba cakali kumbele lya Mwami Leza mutente lyakuswaanganina, akupa zipaizyo zyakutenta zili cuulu.
7Lino masiku aayo ngoonya Leza wakalibonya kuli Solomoni akumubuzya kuti, “Kumbila kufumbwa ncoyanda kuti ndikupe.”
8Solomoni wakaingula Leza kuti, “Wakatondezya luzyalo kuli Devedi taata akundicita kuti ndibe mwami mubusena bwakwe. 9Lino O Mwami Leza zuzikizya cisyomezyo ncookapa kuli Devedi taata nkaambo wandicita kuti ndibe mwami wabantu bako banji mbuli musenga. 10Aboobo undipe busongo aluzibo kutegwa njendelezye bantu aaba kabotu. Buyo-buyo inga ndakonzya buti kulela bantu aaba.”
11Leza wakaingula Solomoni akuti, “Nkaambo kakuti wayanda ceeci tookumbila buvubi naa lubono, naa kulemekwa, naa kuzunda sinkondonyoko, naa kuti woongole, pele wakumbila busongo aluzibo kuti ulele bantu aaba. 12Ono ndilakupa busongo aluzibo. Atala azeezi ndilakupa buvubi lubono abulemu oobo bwatakajisi bami boonse bakakusaangunina nibaba baabo bayooza musule lyako.”
Bwami anguzu zya Solomoni
(1 Bami 10.26-29)
13Lino kuzwa waawo Solomoni wakazwa kubusena bwakukombela buli ku Gibiyoni, ooko kwakali Tente lya Mwami Leza. Kuzwa kooko wakainka ku Jelusalemu kubusena bwakukombela ku Gibiyoni. 14Solomoni wakajisi nkalaki zyakali myaanda iili kkumi azine, amabbiza aali zyuulu zili kkumi azibili, zyakali muminzi mwakali kuyobwedwa nkalaki zimwi zyakali aanguwe mu Jelusalemu. 15Mumazuba aayo Solomoni naakali kulela, nsiliva angolida zyakali cintu buyo mu Jelusalemu, zyakali mbuli mabwe kuvula, mikamba yakali minji mbuli mikuyu mugundu. 16Mabbiza aakwe wakali kwajana mu Ijipiti aku Kuwe. Basambazi mbabakali kwaaula kuzwa ku Kuwe. 17Nkalaki zyaku Ijipiti bakali kuzyuula masyekeli aansiliva aali myaanda iili cisambomwe, bbiza lyakali kuulwa aali mwaanda amakumi osanwe. Basambazi ba Solomoni bakaauzya kubami ba Bahiti a Baalamu.
Currently Selected:
2 Makani 1: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
