1 Makani 29

Zipego zyaŋanda ya Leza

1Lino Devedi wakaambila bantu bakabungene kuti, “Solomoni mwanaangu ooyo Mwami Leza ngwaasala ucili muniini tanazibisya. Mulimo uuyandika kucitwa mmupati, nkaambo ŋanda eeyi tiili yabwami pele nja Mwami Leza. 2Ndasoleka mbuli mbwekonzya kujana zibelesyo zyakuyasya ŋanda ya Leza wangu, ngolida, nsiliva, mukuba, lubulo, masamu, mabwe aamakwalala mbuli cibize, amabwe meebesi aakusekka, amabwe aandene-andene, amabwe amwi meebesi alimwi amabwe mayandisi. Nzinji kapati. 3Kunze lyazeezi mebo lwangu kuzwa kulubono lwangu ndakapa kuŋanda ya Mwami Leza ngolida a nsiliva nkaambo ndiiyanda kapati ŋanda ya Leza. 4Ndakapa matalenta aangolida iini-ini aali zyuulu zyotatwe, matalenta aansiliva iini-ini zyuulu zili ciloba zyakuziluluzya bwaanda, 5akupanga zibelesyo zimwi basibuuya nzyobayoopanga. Ino nguni aumwi uulibambilide kupa amoyo womwe ku Mwami Leza?”

6Lino basololi bamikwasyi, bapati bamisyobo ya Isilayeli, balailili babasilumamba bali zyuulu naa myaanda, abaabo bakali kulanga zyamilimo yabwami bakapa amoyo omwe. 7Nzibakapa kumulimo wakuyasya ŋanda ya Leza nzeezi, bakapa matalenta aali zyuulu zyosanwe, zyuulu zili kkumi zyamadinali aangolida, zyuulu zili kkumi zyamatalenta aansiliva, zyuulu zili kkumi alusele zyamatalenta aamukuba, azyuulu zili mwaanda zyamatalenta aalubulo. 8Kufumbwa wakajisi mabwe meebesi wakaapa kuciyobwedo caŋanda ya Mwami Leza cakali kulangwa a Jahiyeli Mugesyoni. 9Bantu bakabotelwa kapati mukupa kwabasololi babo nkaambo bakapa cakuliyandila alimwi amoyo omwe ku Mwami Leza. Awalo lwakwe mwami Devedi mwini cakamubotela.

Devedi mbwaakalumbaizya Leza

10Mpoonya Devedi wakalumbaizya Mwami Leza kumbele lyambungano yoonse wakati,

“Ulumbaizigwe yebo O Mwami Leza,

O Leza wasikale wesu Isilayeli,

kuzwida kutamani kuyoosika kutamani.

11Yebo O Mwami Leza uli mupati, Singuzu,

bulemu, kuzunda abwami,

zyoonse zili kujulu aanyika nzizyako.

Bwami mbubwako O Mwami Leza.

Ulasumpulwa mbuli musololi wazyoonse.

12Buvubi abulemu zizwa kulinduwe,

nduwe weendelezya zyoonse.

Nduwe oojisi nguzu niziba buti.

Nduwe oosumpula akupa nguzu kuli zyoonse.

13Lino O Leza wesu twakulumba

tulatembaula zina lyako lyabulemu.

14“Ino ndimeni, alimwi abalo bantu bangu mbaani kuti tukonzye kupa boobu camoyo omwe? Zyoonse zizwida kulinduwe, nkaako swebo twakupa buyo eezyo zyali kale zyako. 15Kuli nduwe tuli mbuli basimutuntuli mbubonya mbuli bwakabede basikale besu. Buumi bwesu anyika buli mbuli cinziinzimwa, taakwe bulangizi. 16Akaka O Mwami Leza wesu, kwaamba bunji bwazeezyi nzitwapa kukuyasya ŋanda njonookombelwa zyazwida kulinduwe, alimwi zyoonse nzizyako. 17Ndizi O Leza wangu kuti ulasunka myoyo alimwi ukkomanina baluzi. Zintu eezi zyoonse ndazipa cakuliyandila amoyo omwe, Kwamana boobo ndalibonena cakubotelwa mbuli bantu bako aaba bali waano mbubapa cakuliyandila kuli nduwe. 18O Mwami Leza wabasikale besu ba Abulahamu, Izaka a Isilayeli, kopa kuti bantu bako kabakuyanda lyoonse, amyoyo yabo kiili buyo kulinduwe. 19Kocita kuti Solomoni mwanaangu alipe kulinduwe akubamba milawo amalailile aako, akuti akacite zyoonse mukuyaka ŋanda yako njindajanina zintu eezi.”

20Kuzwa waawo wakalailila mbungano yoonse kuti, “Amulumbaizye Mwami Leza wanu.” Aboobo boonse bakalumbaizya Mwami Leza wabasikale babo, bakavuntama mukulemeka Mwami Leza a Devedi.

21Nibwakaca bakatuuzya akupaizya ku Mwami Leza zintu eezi bapoho bali cuulu, bagutu bali cuulu, kubikkilizya azituuzyo zyazyakunywa, azituuzyo zimwi zinji zya Baisilayeli. 22Bakalya akunywa cakutangala kumbele lya Mwami Leza buzuba oobo. Buzuba mbubonya oobo bakaambilizya lwabili kuti Solomoni mwanaa Devedi ngomwami, bamunanika kuti abe muleli a Zadoki kuti abe mupaizi kumbele lya Mwami Leza. 23Aawo Solomoni wakakkala acuuno cabwami cakali cawisi Mwami Leza ncaakamupa. Wakaduma alimwi Baisilayeli boonse bakali kumuswiilila. 24Balupati-pati, basinguzu, akubikkilizya abana balombe ba Devedi wisi, bakamumvwida mwami Solomoni. 25Mwami Leza wakasumpula Solomoni Baisilayeli boonse kababwene akumupa nguzu nzyaatakapede kumwami naba omwe wakamusaangunina

Zyabulelo bwa Devedi

26Devedi mwanaa Jese wakalela Baisilayeli boonse. 27Wakalela Baisilayeli kwamyaka iili makumi one. Kali mu Hebuloni wakalela kwamyaka iili ciloba, mu Jelusalemu wakalela kwamyaka iili makumi otatwe aitatu. 28Wakafwa kali mudaala, wakoongola, wakalivubide akulemekwa. Solomoni mwanaakwe nguwakaba mwami mubusena bwakwe.

29Kwaamba zyakulela kwa Devedi kuzwida kumatalikilo kuyoosika kumamanino zililembedwe mumabbuku aa Samuyele, Natani a Gadi basinsimi. 30Mabbuku aaya alaamba zyambwaakali kulela, anguzu, azeezyo zyakamucitikila a Baisilayeli kubikkilizya amalelo aakamuzingulukide.

Currently Selected:

1 Makani 29: Tonga96

Highlight

Copy

Compare