1 Makani 28

Devedi mbwaakalailila zyaŋanda ya Leza

1Devedi wakaita balupati-pati ba Baisilayeli boonse kuti babungane ku Jelusalemu. Aaba mbasololi bamisyobo, balailili bankamu zyabasilumamba abalailili babali zyuulu, abalailili bamyaanda, abaabo bakali kulanga lubono azivubwa zyamwami abana bakwe, kubikkilizya abalupati-pati bakuŋanda yabwami, basinguzu, abasintanze.

2Mwami Devedi wakaimikila wati kulimbabo, “Amundiswiilile nobasicisima cakali kumoyo wangu kuti ndiyake ŋanda yacizuminano ca Mwami Leza iili mbuli cilyatilo ca Mwami Leza wesu. Ndakalilibambilide zyakuyasya ŋanda yakumulemekela. 3Pele wakandikasya, nkaambo ndisilumamba wakatila bulowa bunji. 4Mwami Leza wa Isilayeli wakandisala abalunyungu lwangu kulela Baisilayeli akutamani. Wakasala musyobo wa Juda kuti kuusolweda, kumusyobo ooyu nkwaakasala mukwasyi wangu. Kuzwa mumukwasyi woonse ooyu cakamubotela kuti andipe bwami bwa Isilayeli. 5Wakandipa bana balombe banji, kuzwa muli mbabo wakasala Solomoni kuti alele Baisilayeli, bali mbulelo bwakwe walo mwini.

6“Mwami wakandaambila kuti, ‘Mwanaako Solomoni nguuyooyaka ŋanda yangu. Ndamusala kuti abe mwanaangu, ambebo ndibe wisi. 7Njoocita kuti bwami bwakwe kabuliwo lyoonse, kufumbwa buyo kuti katobela milawo amalailile aangu mbuli mbwacita ono.’

8“Lino nkaako nobantu bangu kumbele lya Leza ambungano eeyi ya Isilayeli iili mbantu bakwe, ndamulailila muswiilile kabotu-kabotu eeco Mwami Leza wesu ncaatulailila. Ndendilyo nomunoocikkede munyika eeyi mbotu alimwi inga mwaakwiisiila mazyalani aaciboola akutamani.”

9Kuli Solomoni wakati, “Mwanaangu, ndakwaambilisya kuti uzibe Leza wauso. Konoomukomba amoyo omwe cakumaninina. Walo ulizi mizeezo amiyeeyo yesu. Naa wainka kulinguwe uyookutambula, pele kuti wamufutatila uyookukakila limwi. 10Uleelede kuziba kuti Mwami Leza wakusala kuti umuyakile ŋanda yakwe iisalala. Lino iyake, wiiyake cabulombwana.”

11Mwami Devedi wakapa Solomoni nzila njeelede kuyakila twaanda kuŋanda ya Leza, twakuyobweda alimwi atumwi, kubikkilizya abusena bwakukombelezezya zinyonyoono. 12Wakamulailila eezyo zyoonse zyambwaakeelede kubamba mabbuwa aaŋanda ya Leza atwaanda twaazingulukide kubikkilizya aziyobwedo zyazyakapegwa ku Mwami Leza. 13Wakamulailila mbwaakeelede kwaapaula malizi aabapaizi a Balevi mukubeleka kuŋanda ya Mwami Leza, akubamba zibelesyo zyoonse zyaŋanda eeyo. 14Wakamupa mweelwe wangolida ansiliva ngwaakeelede kubelesya mukupanga zibelesyo zyaŋanda ya Leza. 15Amweelwe wangolida yazikkazikilo zyamalambe awa nsiliva wacikkazikkilo comwe-comwe amalambe aaco, kweendelana abweelede kubelesegwa cikkazikilo comwe-comwe. 16Wakamupa amweelwe wangolida yatebule lyacinkwa cipegwa ku Mwami Leza, alimwi amweelwe wamatebule aansiliva. 17Amweelwe wangolida iini-ini yakupanzya mfoloko, mitiba yakusansaizya anongo, ayamitiba yangolida ansiliva. 18Wakamupa amweelwe wangolida iini-ini yacipaililo catununkilizyo. Wakamulailila ambwaakeelede kupanga cikwiliba cabakelibu bangolida aabo bakababamukide mababa kuvumbilila bbokesi lyacizuminano ca Mwami Leza. 19Eelyo mwami Devedi wakati, “Zyoonse eezi zililembedwe kweendelana amalailile aayo Mwami Leza ngaakati ngatobele.”

20Mwami Devedi wakaambila Solomoni mwanaakwe kuti, “Koyuma ube sicamba woonde mulimo. Utayoowi nikuba kutyompwa nkaambo Mwami Leza, Leza wangu ulaanduwe. Takooyookulekelezya nikuba kukusiya mumulimo ooyu. 21Bapaizi a Balevi balilibambilide mumalizi aabo kuzoobeleka kuŋanda ya Leza, kwamana kuli abamwi balisungwide kuzyookugwasya basibuuya mumilimo yamaanza. Balupati-pati abantu buyo bayooswiilila malailile aako.”

Currently Selected:

1 Makani 28: Tonga96

Highlight

Copy

Compare