DIUN MIMUN 2
2
1Dinok mitou mawar di hei ei Saron kin mitou bakung di jo-jo nyen ei mbang briep he.”
No di pinai mbrap
2“Mitou bakung di ya war tigot-tigau nghousi bindo tut no di ngwam kep da di dingon ngakei bibor di ningat rin ei sop gwam nitta pilei nya ikieti.”
No di sop mbrap
3“Biei apel di ya srig bieiti ei bigbehei bindo tut no di ngwam kep da di dingon ngakei bibor di ningat rin ei pinai pilei nya ikieti. Dijoi sut digwam nyahan ei biei dima nibehei bidiyem ningat di nyop kei.
4Noni buwak da ug ei ninsi di ibon pesta eisi leu api njei nide ningon ngakeisi bak dani nindig bibor.
5Ma aba ba anggur ngat di nyop kei biyai nisindemti bida. Aba apel ngat bikwek dinghuisi lewo dingut kanti pri kep na.
6Noni ba ninda prak bahati dibou lene ba ninda com binggriou da.
7Je di sop gwam nitta pilei ei minu ndig Yerusalem e, ma jipreu ei tug hon rusa nitu kin andai#2:7: Nipas kep rusa nitu kin andai: Ei nijam di ipas kep Gi Preu Nitimiei lene tungwatu nya ikan bipia mindhe cin dini bon nisindemti. Gima rino idimig ei nok mun di ibikuk yok bak. di igya iggum ndigsi nya inyeng bipia mijiwaisi nye au bibou niyem njita tut yam bingwig ug e.”
Diun Gi Nican
No di sop mbrap
8“Jimiap e, no di ngwam kep da di dingon ngakei bibor no ma kwei ba, pri gau nungug dip kin mbigdip nya!
9Noni dem kep andai nikre kin rusa nikre nitu. Jingat i! No ya ngug tig ninghim ma kwei biba niyai binggok-nggok nyen ser lene su niyai ei kendera mihyeti bitou kep kwei.
10Jimiap e, noni mbrap bit da.”
No di pinai mbrap
“Nisieng hwen de ug o, akwei! Nimbai hwen de ug o, akwei!
11Angat i! Nijam di hou cut njiriek tu. Nijam biget mbras kwei tunggwei su.
12Mitou miaisi nya kieng ei yam dip ba, nijam nindung mitousi kwei su.#2:12: Nipas kep nijam nindung mitousi kwei su cem kei lene nipas kep nijam nipai doia kwei su cem kei. Imiap hakimoi mbrei nihyet bong yam dip bidem ide minu dini tu.
13Biei ara sindi ngat ningat. Ba anggur nitou kieng tu ba, nuui tun kei. Ninjei hwen de ug o, akwei! Aso ubbu ngat de ug o, akwei!
14Ayo! Ditde hakimoi di bong tig nggreti anai bibor e, ma asindui sut ba, dingat aimaisi mbigom bidimiap ahyet gom ug e. Lewo aimaisi kei-kau lene ahyet mmau kei.
15Ma jikat mindhe rubah mien nya di itin ei mem ibindei kinei ditde miai ba anggur nghousi. Lewo miai ba anggur kioi sindi digek yo.”
No di sop mbrap
16“Ditde no di ningon ngakei da ngwam kep da ba, dani cem dingwam kep noni. Noni jem nide domba nya ei bakung tou nghousi,
17kikau bipek hou njap tekti cut bico kep mmun nidinditi bipren ug e. Na di dingon ngakei e, ma angkwei hanyen dem kep andai kin rusa nikre nitu di ya kikep ei nungug him Beter kwei.
