NEHEI LEUSI 21
21
Nicukti tut awak nya
(Ul. 15:12-18)
1Lene tuhan pai bak Musa “Ayai nicukti dini yok bak mben Israel. 2#Im. 25:39-46 Gino jigom ba mitiei biwim awak mben Israel gom lene awak dima yai midyai mem ari bingwam muhwindagom he. Ug ei ari bingwam gi nimuhwindacan lene jikes noni bimbut hak ug bigo gau nonti bi. 3Gino jiba mitiei biwim noni tirigi wak nitnem bigyo lene noni buwak nitnem tirigi noni kes hon midyai bimbut au. Ne gino noni wak nitnem nipou tirigi jiba mitiei biwim noni bigyo lene jisindui sut noni bibuwak nitnem tirigi noni kes hon midyai bimbut. 4Gino niceu gom ndo sop bak nide awak nok nitnem apino nitnem yai munggwom bak awak dima lene niceu ninyeng tak kep no dima nitnem kin nimunggwom bat nya tirigi awak dima kes hon midyai bimbut binongkom. 5Ne gino awak dima simbot dat bipia ningon ngakei nitnem kin nimunggwom bat nya kin niceu dima lene kou sut gima kes hon midyai bimbut lene, 6ma niceu buwak noni ug ei ide ig mbusyamei bikes noni biya kui dihim gom ei dimbou heisi. Lene niceu tu nitingou meng. Tug hon nibon midut dima lene awak dima miyai midyai mem niceu kikau ug bipek niyaijo ningwig honti kep.
7Gino tungwagom tri nipmisop sop Ibrani nok awak lene misop dima niceu kes noni bimbut leu midyai mem ari bingwam gi nimuhwindagom nohon keti au. Nicukti mem awak sop kin awak pinai ter leu yam. 8Gino awak sop dima bindei ba, niceu di ba mitiei biwim noni kou sut gima buwak noni nok nitnem lene niceu tri awak sop dima hanyen bak nicigya. Harin dima niceu tri noni bak ngkiai hi a. Lewo niceu ba ningon di sren buubon noni bi ba, yai mun bit leu nok gi noni preu ei mem sop dima cem bi. 9Gino jigom ba mitiei biwim awak sop gom ba, buwak noni bak nipmot nok nitnem lene no dima ubon awak sop dima noyam kin nonti nipmisop. 10Gino jigom wak nitnem ndrim lene noni bibon nitnem ndig nok gi kei biyai njita kin sinsun binoni ba, igyem njita tut yam bit leu nok igyai kepti nipou su. 11Gino noni bibon nitnem ndig nok gi igbit bi lene noni kes nitnem ndig dima hanyen bak nicig lo, nicig mingkwei mimbron hanyen bak no dima bi.”
Nicukti tut hukum di ikes ei tungwatu dip
12 #
Im. 24:17
“Tungwa tou rino bui yo di hiter bimai lene je di nindigsi jikes hukum nimai ei noni dip. 13#Bil. 35:10-34; Ul. 19:1-13; Yos. 20:1-9 Noro gino noni ba nibisinggre bi bibui lo, no dima mai su lene noni nang ug ei mpia ttou nsi gom di midindo bije leu binhyepo ningwes ngun ei sirima. 14Noro gino tungwagom mbuk tut hiter lene bisinggre bihwen noni leu api nang ug ei Ditde nimbar hum dok nikiou leu binhyepo ningwes ngun ei sirima lo, ma je di nindigsi jibrim noni leu nimbar hum ndok nikiou ba, jikes hukum nimai ei noni dip.
15Gino tungwagom bui nicig kin nipmem lene je di nindigsi jikes hukum nimai ei noni dip.
16 #
Ul. 24:7
Tungwa tou rino kat hiter bitri no dima hanyen nok awak ba, ubon noni nok awak cem lene je di nindigsi jikes hukum nimai ei noni dip.
17 #
Im. 20:9; Mat. 15:4; Mrk. 7:10 Tungwa tou rino sriman nicig nipmem nya lene je di nindigsi jikes hukum nimai ei noni dip.
18Gino ibou can iba imbuk bibui yam ba, hi yai tig bibui hi ba, tug hi noro bindei bimai bi lene jikes hukum ei no di bui dip au. Ne gino no di yai nibok dima kiju kan bi bibong nibongti hak, 19lo, kiju biba tom bitom no ei nidipti bu lene no di bui noni nyohou noni nok gi kei bibou kei hanyen ug e leu api yai mun di biluei nijam di noni cut ei ninghuisi weiti pima binoni.
20Gino tungwagom bui nide awak pinai hi awak sop hi bibindei awak dima mai hak ei niyati lene je di nindigsi jikes hukum ei no dima dip. 21Gino awak dima mai ei njap gom can bi lene jikes hukum ei niceu dip au. Lewo nijam di awak dima bok-ba ne yai midyai mem niceu kan bi ba, ba gima biluei hukum di jikes ei niceu dip.
22Gino tungwatu ibou poi ibui yam lo, tungwagom leu ikieti bui sop di nghop apino bindei ba, sop dima srek kinei drek dip lo, nggwen ba, yai nibok bi lene no di bui noni go nibuhup nimangti bit leu nok sop dima nijjep nicuk noti lene nikei nya cem ice tut nimangti dima. 23Ne gino sop dima nggwen ba, bon nibok drek dip gi po ibui noni pima lene iba nimai biluei nimai ba, 24#Im. 24:19-20; Ul. 19:21; Mat. 5:38 iba niyai njep biluei niyai njep ba, iba nikwai biluei nikwai ba, iba ninda biluei ninda ba, iba nimig biluei nimig ba, 25iba nibok biluei nibok ba, iba hum di tigut biluei hum di tigut ba, iba nibok di dwoi biluei nibok di dwoi cem.
26Tungwa tou rino bui nide awak bibindei ba, niyai tu lene noni kes awak dima bimbut hak ug. Tug hon nisinati dima niceu biluei niyai di tu. 27Tungwa tou rino bui nide awak bibindei ba, nikwai dahat lene noni kes awak dima bimbut hak ug. Tug hon nisinati dima niceu biluei nikwai di mbo.”
Nicukti tut yo di inyeng tut mindhe-ndhe nya
28“Gino jide sapi nikre ba nibou nggai bidat tungwagom bimai lene suar jiba tig bihwen sapi dima bimai lene jibam ninghui bijiyem au. Noro ma jikes hukum ei niceu dip au. 29Ne gino ningat ne sapi nikre dima ba nibou nggai bidat mun bit leu nok niyai kepti ba, jisok kep niceu tut nipou su noro noni u sapi dima bi leu api sapi dima ba nibou nggai bidat tungwagom biyai nimai bak lene jiba tig bihwen sapi dima bimai ba, jikes hukum nimai ei niceu dip cem. 30Ne gino jice tut lene niceu go nibuhup nimangti gau nonti bit leu nok jikos tut bak noni biluei niyaijoti. 31Gino sapi dima ba nibou nggai bidat munggwom nipinai hi munggwom nisop hi biyai nimai bak lene jibit leu nicukti pima nicuk jeti bu. 32Gino sapi dima ba nibou nggai bidat hiter de awak pinai hi awak sop hi lene sapi dima niceu ba perak nimangti nitig ningot ningai bigo nibuhup bak awak dima niceu lene jiba tig bihwen sapi dima bimai.
33Gino tungwagom kau minyei bousi di jut bibor nibeng leu e, he tig jui di jut bibor bikibou kep ser nuhui hanyen bi e, apino sapi nikre hi e, he keledai hi e, cut bisar eisi lene, 34ma noni go nibuhup bak mindhe dima niceu biluei lo, noni ma mindhe di mai su dima ningut nok mikwau. 35Gino tungwagom de sapi nikre ba nibou nggai bidat hiter de sapi nikre bimai lene itri gi hi di niyaijo bibipek mitiei lene ikwas mitiei dima tut yam. Nok gima lene ma ikwas sapi di mai pima ninghui tut yam. 36Noro gino ningat ne sapi nikre dima ba nibou nggai bidat mun bit leu nok niyai kepti lo, niceu u sapi dima bi lene noni ba sapi nikre di niyaijo biluei gi hi di mai su leu api noni rino ma mindhe di mai su dima ningut nok mikwau.”
Currently Selected:
NEHEI LEUSI 21: HAD
Highlight
Copy
Compare
Share
Want to have your highlights saved across all your devices? Sign up or sign in
