VAKORINZO 6
6
1Lwa khukhola mihinzilunga na Nyasaye khumusayanga numuyaanza munyi vamwanyola tsimbavasi tsia Nyasaye tsivuli khuva tsi shikhaya. 2Nyasaye avoolanga,
“Lwa inyinga yukhumumanyinya vulahi vwanje yatukha namuhulila;
Lwa litukhu liu khumuhonyinya liatukha namukhonya.”
Hulishitsi! Yiyi nayo isaa yukhumanyinywa vulahi vwanje;
nunundi nalio litukhu lienyu liu khuhonyinywa!
3Shikali khwikalilanga mundu injila, khu vutamanu vuvuli khunyolekhana mu muhinzilu kweru tawe. 4Nikhali, mu shia shindu shiosi shia khukholanga, khumanyinyanga ndi khuli varumishi va Nyasaye, lwa khutsilililanga khwikhutsila mu vutiinyu, mulinyakhana, nende muliminikha. 5Khwashiutwa, khwavohwa mucheela, khandi vandu nivakhukholela shileeche; khwahinzilitswa khuvira shichelo manukhuvula khukonakhu tsindolo inoho khuliakhu shiukhulia shiosi. 6Khwamanyinya khuli varumishi va Nyasaye shichila khuli vanihu, vacheli, vikhutsili, khandi khukholanga kali alahi khuvirila mu Roho Mutakatifu, khuvirila mu vuyaanzi vweru watoto, 7khuvirila khu likhuva lieru liatoto, khandi khuvirila mu tsingulu tsia Nyasaye. Khuli nu vulunji khuli shiuchi shieru, shia khunyala khukwanila nukhwishinga vene. 8Vandu valala vakhuheetsanga luyali na vandi vakhulekanyinya; vandu valala va khunyekanga na vandi va khwitsominya. Vakhuvukulanga khuli vavehi, navutswa khulomolomanga katoto; 9vakhuvukulanga khuli vakhukorwa, navutswa voosi vakhumanya. Vakhuvukulanga khuli khwakhutsa, navutswa khushili mwoyo, khuli mulolanga ni tsimoni tsienyu. Khali niiva khusalilitswangwa, shikali khukhutsanga tawe. 10Khali niiva vakhuvelelitsanga, khusangalanga shia khase khosi. Khulolekhanga khuli vamanani, navutswa khulombanga vandu vanyishi khuva vahinda. Khulolekhanga khuvulakhu shindu shiosi, navutswa katoto khuli ni vindu mu vunyishi.
11Valina veru vakhwayaanza vamenyanga mu litaala lia Korinzo! Khumulomolomele vuchila khumuvisa; nu khumumanyinya ndi khwamuyaanza. 12Shikali khutsi navo va khwambakhana khumuyaanza tawe; navutswa munyi navo vamwambakhana khukhuyaanza. 13Nomolomanga khu munyi nunundi manya khuli muli vaana vaanje: mukhumanyinyi liiva lilala liele lia khuli nalio khu munyi. Mukhumanyinyi khuli mwakhuyaanza!
Khuli Manya Litempeli lia Nyasaye Uli Mwoyo
14Muvuli khuchelitsakhu khukhola mihinzilu halala na vandu vakhasuuvila, shichila shikanyala khwikholekha kario tawe. Vulunji nende vutamanu shivinyala khusanga halala tawe. Toto, vulavu nende shisuundi vinyala khumenya halala? 15Kristo nende Ibilisi vanyala khuhulishitsana? Mundu wasuuvila anyala khuhulishitsana nu mundu wakhasuuvila? 16Lihulishitsana livulakhuho hakari hi Litempeli lia Nyasaye nende misambwa; shichila khutsi khuli manya Litempeli lia Nyasaye uli mwoyo! Khuli Nyasaye mwene avoolanga,
“Namenya hango hanje na vandu vaanje;
ninzi niitsa khumenya muvo;
niitsa khuva Nyasaye wavo,
navo valiitsa khuva vandu vaanje.”
17Khulwa yako, Mwami Nyasaye avoolanga,
“Lekhani navo,
mamwiyahule haluveka khurula muvo.
Muvuli khutiilakhu khu shindu shioneshe;
khu mwinjilitsi.”
18Mwami Nyasaye avoolanga,
“Niitsa khuva tata wenyu,
na munyi muliitsa khuva khuli vaana vaanje
vi shiyayi nende vi shikhana.”
Currently Selected:
VAKORINZO 6: LLLCATHOLIC
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
