LIVALITSWA 29
29
Vihanwa viu Mulukha Kukhuraanga khu Muhika
(Lev 23:23-25)
1Khulitukhu liu khuraanga liu mweli kwa saba, muliitsa khwakanila halala khusaala. Muvuli khukholakhu muhinzilu kwenyu kwa shia khosi. Nalio litukhu lienyu, lia muliitsa khukhuva visiliva. 2Muliitsa khuhaana shihanwa shiu khusambwa khu Mwami Nyasaye, mwayu kuhuunyanga nu kumuyaanzitsa: Shihunwa shilala, limiiko lilala, nende makondi masatsa saba, kali nu muhika mulala, koosi vuchila imbala yosi. 3Muliitsa khuhaana shihanwa shi imu shitushili shiu vusi, vwa tsukanyinywa na makura ku musayituni: tsikilo 3 tsiu vusi halala ni shihunwa, tsikilo 2 tsiu vusi halala ni limiiko, 4khandi ikilo indala yu vusi khu shia likondi. 5Muliitsa khuhaana khandi imbuli ikhole indala, khuli shihanwa shiu khurulitsaho vwoni, khandi mukhole mulukha ku khunihitsa vandu munjila yeneyo. 6Muliitsa khuhaana vihanwa yivi, khumeeta khu shihanwa shiu khusambwa shia khase khosi khulitukhu liu khuraanga khu mweli, halala ni shihanwa shi imu shiashio; khandi shihanwa shiu khusambwa shia khase khosi, halala ni shihanwa shi imu shiashio nende shihanwa shi idivai. Vihanwa vi shiukhulia yivi vihuunyanga mwayu ku khuyaanzitsa Mwami Nyasaye.
Vihanwa Vihanwangwa Khulitukhu liu Khusemehwa
(Lev 23:26-32)
7Muliitsa khwakanila halala khusaala khulitukhu li likhomi liu mweli kwa saba; muvuli khuliakhu shiukhulia shiosi, inoho khukholakhu muhinzilu kwosi. 8Muliitsa khuhaana shihanwa shiu khusambwa khu Mwami Nyasaye, nu kuli mwayu kuhuunyanga nu ku khumuyaanzitsa: Shihunwa shilala, limiiko lilala, nende makondi masatsa saba, kali nu muhika mulala, koosi vuchila imbala yosi. 9Muliitsa khuhaana shihanwa shi imu shitushili, shiu vusi shia tsukanywa na makura ku musayituni: tsikilo 3 tsiu vusi halala ni shihunwa, tsikilo 2 tsiu vusi halala ni limiiko, 10khandi ikilo indala yu vusi khu shia likondi. 11Muliitsa khuhaana khandi imbuli ikhole, khuli shihanwa shiu khurulitsaho vwoni, khumeeta khu imbuli ya mwahaana mu mulukha ku khunihitsa vandu, khandi halala ni shihanwa shiu khusambwa shia litukhu liosi, ni shihanwa shi imu shiashio nende shihanwa shi idivai.
Vihanwa Vihanwangwa mu Mulukha kwa Matiili
(Lev 23:33-44)
12Muliitsa khwakanila halala khusaala khulitukhu li likhomi na karanu liu mweli kwa saba. Muliitsa khwikhoyela mulukha yuku, khuha Mwami Nyasaye luyali khumatukhu saba; muvuli khukholakhu muhinzilu kwosi. 13Khulitukhu liu khuraanga lienelo, muliitsa khuhaana shihanwa shi shiukhulia khu Mwami Nyasaye, nishili shihanwa shihuunyanga mwayu mulahi ku khumuyaanzitsa: Vihunwa likhomi na vivaka, mamiiko kavili, nende makondi masatsa likhomi na kane, kali nu muhika mulala, viosi vuchila imbala yosi. 14Muliitsa khuhaana shihanwa shi imu shiu vusi, shitushili shiatsukanywa na makura ku musayituni: tsikilo 3 tsiu vusi khu shia shihunwa, tsikilo 2 tsiu vusi khu shia limiiko, 15khandi ikilo indala yu vusi khu shia likondi, halala ni shihanwa shi idivai. 16Muliitsa khuhaana khandi imbuli ikhole khuli shihanwa shiu khurulitsaho vwoni. Muliitsa khuhaana vihanwa yivi, khumeeta khu vihanwa viu khusambwa via shia khase khosi, halala ni shihanwa shi imu nende shihanwa shi idivai.
17Khulitukhu lia khavili, muliitsa khuhaana vihuunwa likhomi na vivili, mamiiko kavili, makondi masatsa likhomi na kane, viosi vuchila imbala yosi. 18Muliitsa khuhaana shihanwa shi imu nende shihanwa shi idivai, khuli kenyekhanga, halala ni vihuunwa, mamiiko nende makondi. 19Muliitsa khumeetakhu khandi imbuli ikhole indala, khuli shihanwa shiu khurulitsaho vwoni; khumeeta khu shihanwa shiu khusambwa shia khase khosi halala ni shihanwa shi idivai.
20Khulitukhu lia khavaka, muliitsa khuhaana vihuunwa likhomi na vavili, mamiiko kavili, nende makondi masatsa likhomi na kane, viosi vuchila imbala yosi. 21Muliitsa khuhaana vihanwa vi imu nende viu khung'wa, khulondokhana khuli kenyekhanga, halala ni vihuunwa, mamiiko nende makondi. 22Muliitsa khumeeta khu vienevo imbuli ikhole indala khuli shihanwa shiu khurulitsaho vwoni, khumeeta khu shihanwa shiu khusambwa shia khase khosi, halala ni shihanwa shi imu shiashio nende shihanwa shi idivai.
23Khulitukhu lia khane, muliitsa khuhaana vihuunwa likhomi, mamiiko kavili, nende makondi masatsa, kali nu muhika mulala likhomi na chine. 24Muliitsa khuhaana khu vihuunwa, mamiiko, nende makondi, vihanwa vi imu nende vihanwa viu khung'wa viavio, khuli kenyekhanga. 25Muliitsa khumeetakhu imbuli ikhole, khuli shihanwa shiu khurulitsaho vwoni, khu shihanwa shiu khusambwa shia khase khosi, halala ni shihanwa shi imu nende shihanwa shi idivai.
26Khulitukhu lia kharanu, muliitsa khuhaana vihuunwa tisa, mamiiko kavili, nende makondi masatsa kali nu muhika mulala likhomi na chine, koosi vuchila imbala yosi. 27Muliitsa khuhaana khu vihuunwa, mamiiko, nende makondi, vihanwa vi imu nende vihanwa viu khung'wa, khuli kenyekhanga. 28Muliitsa khumeetakhu imbuli ikhole, khuli shihanwa shiu khurulitsaho vwoni, khumeeta khu shihanwa shiu khusambwa shia khase khosi, ni shihanwa shi imu nende shihanwa shi idivai.
29Khulitukhu lia sita, muliitsa khuhaana vihuunwa munane, mamiiko kavili, nende makondi masatsa kali nu muhika mulala likhomi na chine, viosi vuchila imbala yosi. 30Muliitsa khuhaana khu vihuunwa, mamiiko, nende makondi, vihanwa vi imu nende vihanwa viu khung'wa, khuli kenyekhanga. 31Muliitsa khumeetakhu imbuli ikhole, khuli shihanwa shiu khurulitsaho vwoni, khumeeta khu shihanwa shiu khusambwa shia khase khosi, halala ni shihanwa shi imu nende shihanwa shi idivai.
32Khulitukhu lia saba, muliitsa khuhaana vihuunwa saba, mamiiko kavili, nende makondi masatsa likhomi na kane, kali nu muhika mulala, viosi vuchila imbala yosi. 33Muliitsa khuhaana khu vihuunwa, mamiiko, nende makondi, vihanwa vi imu nende vihanwa viu khung'wa khuli kenyekhanga. 34Muliitsa khumeetakhu imbuli ikhole, khuli shihanwa shiu khurulitsaho vwoni, khumeeta khu shihanwa shiu khusambwa shia khase khosi, halala ni shihanwa shi imu nende shihanwa shi idivai.
35Khulitukhu lia munane, muliitsa khwakanila halala khusaala khandi; muvuli khukholakhu muhinzilu kwosi. 36Muliitsa khuhaana shihanwa shiu khusambwa khuli shihanwa shi shiukhulia khu Mwami Nyasaye, shihuunyanga mwayu ku khumuyaanzitsa: Shihunwa shilala, limiiko lilala, nende makondi masatsa, kali nu muhika mulala likhomi na chine, vuchila imbala yosi. 37Muliitsa khuhaana khu vihuunwa, mamiiko nende makondi, vihanwa vi imu nende vihanwa viu khung'wa viavio, khuli kenyekhanga. 38Muliitsa khumeetakhu imbuli ikhole, khuli shihanwa shiu khurulitsaho vwoni, khumeeta khu shihanwa shiu khusambwa shia khase khosi, halala ni shihanwa shi imu nende shihanwa shi idivai.
39Nako mivaalo khulondokhana khu vihanwa viu khusambwa, vihanwa vi imu, vihanwa vi idivai, nende vihanwa viu khulera milembe, via muliitsa khuhaana khu Mwami Nyasaye, mumatukhu ka mukholanga milukha chienyu. Yivi viliitsa khumeeta khu vihanwa via muhaananga nu mwoyo kwosi khurweshitsa lilaaka inoho khuli vihanwa viu khwirulitsa khuhaana.
40Musa yavoolela Vaisraeli shia shindu shiosi, shiu Mwami Nyasaye yali namuvoolele akhole.
Currently Selected:
LIVALITSWA 29: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
