LIVALITSWA 28
28
Vihanwa via shia Litukhu
(Khur 29:38-46)
1Mwami Nyasaye yavoolela Musa, 2“Uhe Vaisraeli lilako yili, uvavoolele, muchelitsi khulola ndi muhaananga vihanwa vi shiukhulia khwinzi mumatukhu katushili, vihanwa viu mwayu kuhuunyanga nu kunyanzitsa.
3“Yivi navio vihanwa vi viukhulia vitushili khuhaanwa khu Mwami Nyasaye: makondi masatsa kavili, vuchila imbala yosi nu muhika mulala, khuli vihanwa viu khusambwa shia litukhu. 4Muliitsa khuhaana likondi liu khuraanga mu mavwevwe, na likondi lia khavili lindi halukolovo, 5shia likondi ni shihanwa shi imu ikilo indala yu vusi, ya tsukanywamu ilita indala ya makura malahi ku musayituni. 6Yishi nashio shihanwa shia khase khosi shisambwangwa khukwa likooshe, shiraanjitswa khuhaanwa ha Shikulu shia Sinai khuli shihanwa shi shiukhulia, mwayu kuhuunyanga nu kuyaanzitsa Mwami Nyasaye. 7Muliitsa khusuundula ilita indala yi idivai khu vwaali, khuli shihanwa shi idivai khu likondi liu khuraanga. 8Muliitsa khuhaana shimeme shi likondi shia khavili halukolovo, khuli mukholi lwa muhaani shihanwa shiu mu mavwevwe, halala ni shihanwa shi idivai yashio. Ni shihanwa shi shiukhulia khandi, shihuunyanga mwayu ku khuyaanzitsa Mwami Nyasaye.
Shihanwa shiu Khulitukhu li Lisabato
9“Khulitukhu li Lisabato, muliitsa khuhaana vimeme vi likondi vivili, vili nu muhika mulala vuchila imbala yosi; nende tsikilo tsiu vusi vwa tsukanywamu makura ku musayituni, khuli shihanwa shi imu, nende shihanwa shi idivai. 10Shihanwa shiu khusambwa shienesho, shilitsa khuhaanwa khu shia litukhu li Lisabato, khumeeta khu shihanwa shia khase khosi, halala ni shihanwa shi idivai yashio.
Shihanwa shiu Khulitukhu Liukhuraanga khu Mweli
11“Muliitsa khuhaana shihanwa shiu khusambwa khu Mwami Nyasaye, shia litukhu liu khuraanga khu shia mweli: Vimoli vivili vihuunwa, limiiko lilala, mamiiko saba, kali nu muhika mulala, koosi vuchila imbala yosi. 12Muliitsa khuhaana vusi vwa tsukanywamu makura ku musayituni, khuli shihanwa shi imu: halala ni tsikilo 3 tsiu vusi, khu shia shihunwa; tsikilo 2, khu shia limiiko; 13khandi ikilo indala khu shia likondi. Vihanwa viu khusambwa yivi, ni vihanwa vi viukhulia, vihuunyanga mwayu kuyaanzitsanga Mwami Nyasaye. 14Shihanwa shi idivai shitushili khuhaanwa, shiliitsa khuva tsilita 2 tsi idivai khu shia shihunwa, ilita indala ninusu khu shia limiiko, nende ilita indala khu shia likondi. Yili nalio lilako li shihanwa shiu khusambwa, khulitukhu liu khuraanga khu shia mweli khumuhika kwosi. 15Khumeeta khu shihanwa shiu khusambwa shia khase khosi nende shihanwa shi idivai yashio, muliitsa khuhaana imbuli ikhole indala, khuli shihanwa shiu khurulitsaho vwoni.
Vihanwa viu Mulukha kwi Mikati Chialombwa Vuchila Mamela
(Lev 23:5-14)
16“Mulukha kwa Pasaka ku khuha Mwami Nyasaye luyali, kuliitsa khwikholekha khulitukhu li likhomi na khane liu khuraanga khu mweli. 17Khulitukhu lia kharanu liu mweli kwenoko, khuliitsa khukhola mulukha. Muliitsa khulia khumatukhu saba mikati chialombwa vuchila mamela. 18Khulitukhu liu khuraanga liu mulukha kwenoko, muliitsa khwakanila halala khusaala. Muvuli khukholakhu muhinzilu kwosi. 19Muliitsa khuhaana shihanwa shiu khusambwa, khuli shihanwa shi shiukhulia khu Mwami Nyasaye: vihuunwa vivili, limiiko lilala, nende makondi mamiiko saba, kali nu muhika mulala, koosi vuchila imbala. 20Muliitsa khuhaana shihanwa shi imu shitushili khuhaanwa shiu vusi nu vwa tsukanywamu makura ku musayituni: tsikilo 3 khu shia shihunwa, tsikilo 2 khu limiiko; 21khandi ikilo indala khu shia likondi. 22Muliitsa khuhaana khandi imbuli ikhole, khuli shihanwa shiu khurulitsaho vwoni, ma mukhole mulukha ku khunihitsa vandu munjila yeneyo. 23Muliitsa khuhaana vihanwa yivi, khumeeta khu vihanwa viu khusambwa, via muhaananga mu mavwevwe. 24Muliitsa khuhaana khumatukhu saba khu Mwami Nyasaye, shihanwa shi shiukhulia; mwayu kuhuunyanga nu kumuyaanzitsa. Muliitsa khuhaana vihanwa yivi, khumeeta khu shihanwa shia khase khosi nende shihanwa shi idivai. 25Muliitsa khwakanila halala khulitukhu lia saba khusaala. Muvuli khukholakhu muhinzilu kwosi.
Vihanwa Vihanwangwa mu Mulukha kwi Lichesa
(Lev 23:15-22)
26“Khulitukhu liu khuraanga liu Mulukha kwi Lichesa, lwa muliitsa khuhaana shihanwa shi imu yu khuraanga khuchesa khu Mwami Nyasaye, muliitsa khwakanila halala khusaala. Muvuli khukholakhu muhinzilu kwosi. 27Navutswa muliitsa khuhaana shihanwa shiu khusambwa, nu kuli mwayu kuhuunyanga nu kuyaanzitsa Mwami Nyasaye: vihuunwa vivili, limiiko lilala, nende tsikhole saba tsiu muhika mulala, koosi vuchila imbala. 28Muliitsa khuhaana shihanwa shi imu, shiu vusi shitushili khuhaanwa shia tsukanywamu makura ku musayituni: tsikilo 3 khu shia shihunwa, tsikilo 2 khu shia limiiko, 29nende ikilo indala khu shia likondi. 30Muliitsa khuhaana khandi imbuli ikhole indala, khuli shihanwa shiu khurulitsaho vwoni, ma mukhole mulukha ku khunihitsa vandu munjila yeneyo. 31Muliitsa khuhaana vihanwa yivi nende shihanwa shi idivai, khumeeta khu shihanwa shiu khusambwa shia khase khosi nende shihanwa shi imu. Muheenzeshitsi mulole ndi muvula imbala yosi.”
Currently Selected:
LIVALITSWA 28: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
