LIVALITSWA 25
25
Vandu Vakhali Vamoabu Vavoolitsa Vasatsa Vaisraeli
1Lwa Vaisraeli vali nivamenyanga mu maheemo mu Luhoongo lwi Minyenye, vandu vasatsa varaanga khukhola vulaaya na vakhali Vamoabu iweneyo. 2Vakhali venavo, vavinjilitsa mu milukha chiavo chi misango khu vanyasaye. Vandu valia shiukhulia, khali nivasaala khu vanyasaye venavo. 3Khulwa yako, Vaisraeli vamanya nivasaala khu Baali wi litaala lia Pehori. Mwami Nyasaye yavalolela vurima. 4Mwami Nyasaye yavoolela Musa, “Vukula vimilili voosi va Vaisraeli, nu khuvasunga havulavu mu mbasu kwi liuva, nikanyalikha Mwami Nyasaye khuvula khulolela vurima vululu Vaisraeli.” 5Nalwo lwa Musa yavoolela vakhalachi va Vaisraeli, “Shia mulala khu munyi aliitsa khwiira shia mundu wosi, urulanga mu vandu vuluhia lwelwe wasikama nasaala khu Baali wi litaala lia Pehori.”
6Mulala khu Vaisraeli yahila mukhali Mumidiani, namwinjilitsa mu liheemo lielie imbeli wa Musa, khandi imbeli wa Vaisraeli voosi, lwa vali nivikhulanga mu vwinjililu vwi Liheemo Litakatifu. 7Lwa Finiasi, mwana wa Eliazari, mwana wu musalisi Haruni, yalola kenako, yasinjila, narula mu shituma shia Vaisraeli. Yavukula lirimu lielie, 8nalonda mundu mwenoyo, halala nu mukhali mwenoyo mu liheemo, navalivira voosi vavili ni lirimu. Nindi o vulwale vwali nivunyashitsanga Vaisraeli vwakalishitswa; 9navutswa vwali vwayiira khale vandu tsiheelefu makhomi kavili na kane.
10Mwami Nyasaye yavoolela Musa, 11“Mbulakhu vurima na Vaisraeli, shichila makhuva ka Finiasi, uli mwana wa Eliazari akholi. Yambakhana khusaala khu nyasaye wundi, nakhali inzi; nashio shivune shiachila nimbula khuvamulula, shichila vurima vwanje. 12Khulwa yako, muvoolele ndi nzitsanga khukhola naye lilakano lianje li milembe. 13Ye nende vitsukhulu veve, valiitsa khuva vasalisi khumatukhu koosi, shichila yambakhana khuyaanza vandu vali nivashendeshele; khandi yachila Vaisraeli nivasemehwa khurula mu vwoni vwavo.”
14Mundu Muisraeli wiirwa nu mukhali Mumidiani, yali Zimuri mwana wa Saulu; yali mwimilili wi inzu indala, ya vandu vuluhia lwa Simioni. 15Mukhali Mumidiani mwenoyo yalaangwangwa Kozubi. Tata wewe yalaangwangwa Zuri; yali mwamihi wi tsinzu tsia Vamidiani.
16Mwami Nyasaye yavoolela Musa, 17“Kwana Vamidiani nu khuvativitsa, 18shichila vindu vitamanu via vakhukholela, lwa vakhukaatila nuli mu litaala lia Pehori; khandi shichila Kozubi, wiirwa mumatukhu kali ku vulwale mu litaala lia Pehori.”
Currently Selected:
LIVALITSWA 25: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
