LIVALITSWA 23
23
1Balamu yavoolela Balaka, “Nzumbashila vwaali saba hanu, underele vihuunwa saba nende mamiiko saba.”
2Balaka yakhola khuli yali navoolelwi, ma ye nende Balamu nivahaana shihunwa nende limiiko khu shia vwaali. 3Balamu yavoolela Balaka, “Sinjila hanu, himbi khu shihanwa shioshio shiu khusambwa, nishitsia khulola, niiva Mwami Nyasaye aliitsa khumbukanila inoho alavula khumbukanila. Niitsa khukhuvoolela shia shindu shiosi, shialiitsa khuva nambolele.” Nalwo lwa Balamu yasimukha wonyene, natsia khunina khu shikulu, 4ma Nyasaye namwakanila. Balamu yavoolela Nyasaye, “Mali khumbakha vwaali saba nu khuhaana shihanwa shi shihunwa nende shi likondi limiiko, khu shia vwaali vwosi.”
5Mwami Nyasaye yavoolela Balamu makhuva kamuvoolela, namuruma khutsia khuvoolela Balaka makhuva kenako. 6Balamu yakalukhaho, nanyola Balaka nashisinjile ha shihanwa shieshie shiu khusambwa, halala na vimilili voosi va Vamoabu.
7Balamu yalomoloma vuprofeti vwevwe, navoola,
“Mwami Balaka wa Moabu neye underi,
khurula mu shivala shia Siria,
khurula mu vikulu khuluveka luli ivukwi.
Yavoola, ‘Hamba unomolomele havukono hanje.
Laama Vaisraeli.’
8Nyala khulaama munjila shina, shia Nyasaye yavula khulaama?
Nyala khutivitsa ndina vandu vu Mwami Nyasaye yavula khukhalachila khutiva?
9Valolelanga mu vikulu viaraambiha;
nyala khuvaheenzela mu vikulu, nu luhia lumenyanga lwonyene;
vamanyi ndi vakasitswa khuvira vandu vi tsimbia tsindi tsiosi.
10Vitsukhulu va Vaisraeli vali khuli lukuushi --
Ni vanyishi khali vakhanyala khuvalitswa tawe.
Leshi mbe nikhutsanga khuli mulala khu vandu va Nyasaye;
leshi mbe nikhutsilanga mu milembe khuli mundu wi likhola liu vulunji.”
11Balaka yavoolela Balamu, “Ni shina shiukholele? Khulaanji hanu khulaama vatsiku vaanje, navutswa shindu shivulakhuho shiukholi; navutswa umali khuvakasitsa!”
12Balamu yamuvoolela, “Mbolanga vutswa ku Mwami Nyasaye avetsanga nambolele mbole.”
Vuprofeti vwa Balamu vwa Khavili
13Balaka yavoolela Balamu, “Hamba khutsi nivi havundu handi, unyala khulolela vutswa valala khu Vaisraeli. Uliitsa khunaamila vandu venavo, nuli havundu henaho.” 14Balaka yamuvukula, namuhila mu mulimi kuli havundu halaangwangwa Zofimu, ikulu wi Shikulu shia Pisiga. Yumbakhaho vwaali saba, khali nasinzila khu shia vwaali vwenovo, shihunwa nende likondi limiiko.
15Balamu yavoolela Balaka, “Sinjila hanu, himbi khu shihanwa shioshio shiu khusambwa, nishitsia khwakana nu Mwami Nyasaye yeyo.”
16Mwami Nyasaye yakana na Balamu, namuvoolela makhuva ku khuvoola, namuvoolela akalushi khu Balaka khumuvoolela makhuva keke. 17Balamu yakalukhaho nanyola Balaka nashisinjile himbi khu shihanwa shieshie shiu khusambwa, halala na vimilili va Vamoabu. Balaka yareeva amanye, ku Mwami Nyasaye yali navooli, 18ma Balamu nalomoloma vuprofeti vwevwe,
“Balaka mwana wa Zipori, sinjila uhulishitsi;
umbulishitsi ka nyenyanga khuvoola.
19Nyasaye shiali khuli mundu, witsula vuvehi;
Inoho khuli mwana wu mundu, unyala khukalukhanyinya ka yenyanga khukhola tawe.
Namali khulaaka khukhola, akholanga;
namali khulomoloma, kikholekhanga.
20Nyoli lilako liu khukasitsa;
ukasitsi, mbulakhu lianyala khukalukhanyinya.
21Mwami Nyasaye ashili khulola vutamanu vwosi mu vandu va Yakobo;
ashili khulola vutiinyu mu Israeli.
Mwami Nyasaye, uli Nyasaye wavo ali navo,
neye mwami wa vitsominyanga nivalaanjilila.
22Nyasaye neye wa varulitsa mu shivala shia Misri;
avakwanilanga khuli ihili indulu.
23Makhumu kavulakhuho kanyala khwikalila vandu va Yakobo,
inoho vuloochi khwikalila Vaisraeli.
Vandu valiitsa khuvoola shichila Israeli, ‘Lolikhu ka Nyasaye yakhola.’
24Lolikhu! Vaisraeli vichinguli khuli isimba ikhali, vasinjile khuli isimba;
ivulakhu khuli inyala khuhulukha nishili khwiira inyama yayenyi,
nu khung'wa masahi kayo.”
25Nalwo lwa Balaka yavoolela Balamu, “Lekha khuvalaama inoho khuvakasitsa, khali hatititi hene.” 26Navutswa Balamu yavoolela Balaka, “Shimbele nikhuvoolele khale ndi nakhola shia shindu shiosi, shiu Mwami Nyasaye aliitsa khumbolela khole?”
Vuprofeti vwa Khavaka vwa Balamu
27Balaka yavoolela Balamu, “Hamba, nyenyanga khukhuhila havundu handi. Haundi, kalayaanzitsa Nyasaye, ahuchilile unaamile vandu venavo, nuli havundu henaho.” 28Balaka yahila Balamu ikulu khu Shikulu shia Pehori, shili khuluveka lundi lu mu shiangalangwi. 29Balamu yamuvoolela, “Nzumbashila vwaali saba hanu, khandi underele vihuunwa saba nende mamiiko saba.” 30Balaka yakhola khuli Balamu, yali namuvoolele akhole, nasinzila khu shia vwaali shihunwa nende likondi limiiko.
Currently Selected:
LIVALITSWA 23: LLLPRO
Highlight
Copy
Compare
Share
Want to have your highlights saved across all your devices? Sign up or sign in
© The Bible Society of Kenya, 2013
