Pa Amotume 11

Pa gigiri anya na anyakorakpa

(Pa Rug. 14:3-21)

1Yekova ki ya fu Mose na fu Arona, 2“Oni yá fu awiri aYisaraere, Agi anya re oni ka niri ra dagba agu anya dunduko du ri kpotosende. 3Oni nirí agu anya du na kparakakparaka sukutura, du na kpandura yo ni sarisari he a, nafuga riahe afuga. 4Ono agi ra re ka oni nirí nga ra ya, nga agu ra nafuga riahe, watadu kparaka sukutura: Nga kameri, bambiko u nafuga riahe ono kparaka nga sukuturu te, u du ni nyakorokpa fu roni. 5Na gu nya du wa ndakuta a bambiko u nafuga riahe ono kina kpatabenya du ti ru, sukutu ti ru te, u du ni nyakorokpa fu roni. 6Na bakere ndakuta a, bambiko u nafuga riahe ono kina kpatabenya du ti ru, sukutu ti ru te, u ki du ni nyakorokpa fu roni. 7Na mukuru, bambiko wa kparaka sukuturu, kpanduru yo ki du ni sarisari he a, ono u afuga nga riahe te. U du ni nyakorokpa fu roni. 8Ka oni nirí nga pasio agi ra re wa sa ya, ka oni nizádi nga kangbara a ya. Ami du ni anyakorokpa fu roni.

9“Agi ra re oni ka niri ra dagba agu atĩo du ime yo dunduko. Agu atĩo dunduko du rogo aime du na kiwe ti ngongora na ire ti ra, watadu rogo baime tikpo na ku rogo adi a, agi ra re oni ka niri ra. 10Ono agu ra adu nga na kiwe ti ngongora na ire ti ra a ya, du baime tikpo yo watadu rogo adi a, na agu agbiro nawo awo tii ime yo, na gu unga anya dunduko du abaime yo, ami du ni anyakorokpa fu roni. 11Ami adú ni anyakorokpa fu roni kindi; ka oni niri nga pasiora ya, kangbara ki du bangironi ni kere gbegberẽ he. 12Agu ra dunduko du abaime yo adu nga na kiwe ti ngongora na ire ti ra ya, ami adú ni anyakorokpa fu roni.

13“Agi ra re adú ni anyakorokpa fu roni dagba azire yo, ka oni nirí nga ra wa sa ya. Ami du ni kere gbegberẽ ra: nga aingimo, na nguku, na ngbadabare, 14na sosorofuge, na kpiakpia na ngbatungara, 15na angbatunga azire akua dunduko, 16na surutio na gbõo, na azire ime, na bakiki na ngbatungara, 17na gbuku, na ngoroni, na bazizi a, 18na gbiiwi, na perekani, na kubu, 19na gõyo, na naaranaara, na gu ru du wa ndaasi, na fura a.

20“Agu agbiro dunduko du na apupo ti ra nagbe tira ngba ndura biama; ami adú ni anyakorokpa fu roni. 21Ono oni aréngba na ri agu agbiro du na apupora ti ra, nagbe tira ngba ndura biama, du na merendura na kpetendura, ami agu na ni ri kpotosende. 22Agi ra re oni ka niri ra: ayere na ngbatungara, na anzede na ngbatungara, na titakperende na ngbatungara, na age na ngbatungara. 23Ono gu kura agbiro dunduko du na apupora na andura biama nagbe tira ami du ni kere gbegberẽ he fu roni.

24“Agi ra re nikanibirikosi roni; gu boro nikanizadi kangbara ni adú ni birikosibirikosi ni ki da ku nyemu, 25gu ni nikanitindi bete gu pa kangbara ni anizundu gani aroko, ki du ni birikosibirikosi ni ki da ku nyemu. 26Agu anya dunduko du na kparakakparaka sukutura, ono asara nga kpendura ya, afuga nga riahe a ya, ami du ni anyakorokpa fu roni; agu aboro dunduko nikanizadi ra i adú ni birikosibirikosi yo. 27Agu ra nga anyakpatabe nandu ngba ndura biama, ami dunduko du ni anyakorokpa fu roni. Gu ni nikanizadi kangbara ni anidu ni birikosibirikosi ni ki da ku nyemu. 28Gu ni nikanitindi kangbara ni anizundu gani aroko ki du ni birikosibirikosi ni ki da ku nyemu; ami du ni anyakorokpa fu roni.

29“Agi ra re du ni anyakorokpa fu roni dagba agu awiri anya nandu ri sende: nga mbiri, na kuri, na kare na ngbatungara, 30na garamurã, na kokoso, na bambuara, na gara, na nvua a. 31Agi ra re du ni anyakorokpa fu roni dagba agu ra nandu ri sende; gu boro nikanizadi kangbara, ni anidu ni birikosibirikosi ni ki da ku nyemu. 32Ka kangba gu ru ti ku auru gini ngbatunga he, gu he re ki du ni birikosibirikosi he, watadu si nga gu he du wa ngua, na kpoto, na mangu, watadu gu he nga ũsunge; i animogo ho kina ku ime yo, si adú ni birikosibirikosi he ki da ku nyemu, fuo gure si ki giri. 33Ka kangba gu ru ti ku akoro yo, agu ahe dunduko du rogo ho anidu ni birikosibirikosi he, oni ki niimi akoro a. 34Gu riahe ka du rogo ho nga gu ka i niri, ka ime vura du ri he vurũ, si adú ni birikosibirikosi he; gu mbirimbiri he dunduko ka i nimbiri he ti ngba ngbatunga gu ũsunge re, si anidu ni birikosibirikosi he a. 35Gu he dunduko ka bete pa kangbara ti ku auru he; si anidu ni birikosibirikosi he; watadu vuru gbigiwi yo na baiga apere yo, i anifutuka ha rukutu; si du ni birikosibirikosi he, si anidu ni birikosibirikosi he fu roni. 36Ono gugaabi watadu babanda ime anidu gigiri; ono gu he nikanida ti kangbara, si anidu ni birikosibirikosi he. 37Ka bete pa kangbara ti ku ri tunga du tipa rí he, si du ni kina gigiri he; 38ono ka ime uka ku ri tunga, bete pa kangbara ki ti ku ri he, si du ni birikosibirikosi he fu roni.

39“Ka gu nya kpi dagba ngbatunga agu ra oni nari ra, gu boro nikanizadi kangbaru ni anidu ni birikosibirikosi ni ki da ku nyemu. 40Gu ni nikaniri pasioru ni anizundu gani aroko, ki du ni birikosibirikosi ni ki da Ku nyemu.

41“Agu agbiro dunduko nagbe tira sande ami anidu ni kere gbegberẽ he fu roni; ka oni niri nga ra wa sa ya. 42Gu ru nagbe tiru ni kpotovuru na gu ru nandu ngba nduru biama, watadu gu ru du na dungu nduru, agu agbiro dunduko nagbe tira sande, ka oni nirí nga ra wa sa ya; bambiko ami du ni kere gbegberẽ he. 43Ka oni nigbárasi nga tironi ni kere gbegberẽ he na agu agbiro nagbe tira sande ya; ka oni nibírikosi nga tironi na ami a ya, oni ka du bibiriko. 44Bambiko mi nga Yekova nga gaoni Mbori; oni kpára tironi tie, ki du ni kparakpara roni ziazia bambiko mi ni kparakpara re ziazia. Ka oni nigbárasi nga tironi na ngbatunga agu agbiro nagbe tira ki nita ri sende wa sa ya. 45Bambiko mi nga Yekova naakusi roni ringara Ezipeta yo, ka du ni gaoni Mbori; si oni ka du ti ni ni kparakpara roni ziazia a wa du mi ni kparakpara re ziazia.”

46Gere nga gu rugute du tipa anya, na tipa azire, na tipa agu anya nawo awo tii ime yo, na tipa agu agbiro nagbe tira sande; 47ka kparaka dagba anyakorokpa na gigiri ra, dagba agu anya oni ka ri ra, na agu anya oni ka ari nga ra wa sa ya.

Currently Selected:

Pa Amotume 11: ZB1978

Highlight

Copy