Daniere 12

Pa digida rago

1“Ti gu rago re Mikaere agúari a, nga gu bakere bazogo naruga pa gamo aboro. Ono rago fuda nikadu, ngbatunga ha adu nga mbata wa gu te re, tona wa rikaaboro aenge ki da ti gu rago re. Ono ti gu rago re i abátasa gamo aboro, nga agu yo i ka bi rimoyo ni ba sa sa ni kekehe rogo kitabu. 2Dungu agu yo naakpiki ku nvutu sende yo azínga berewe, agu yo sa nyenye unga, agu yo sa nyenye wasiro. 3Agu yo nga airatatamana akĩ imaima wa vuro ngbangbaturũ; agu yo nisa dungu yo sa rurupai, i akĩ wa akerekuru nye anye kindi. 4Ono mo, Daniere, mo kísi agu apai re ki dika he ti gu kitabu re, dati digidaragoho. Dungu aboro nikaora koyo na kono, inahe amáa pai.”

5Si du mi nga Daniere angere, ki bi aboro ue narundu, gu ni ti ngba gango ime kono, gu kura ni ti ngba gango ime koyo. 6Mi ki ya fu gu kumba naukadi roko ni tutu giri nzibi, nga gu ko nadu ku ri aime wiridi, “Rago aima waĩ dati digida gi banaru apai re?” 7Gu kumba naukadi roko ni tutu giri nzibi, nga gu ko nadu ku ri aime wiridi atumba kumbabeko na garebeko a ku ngbangbaturũ yo; mi ki gi pa ko ko nizunga he ti rimo gu ko nye anye kindi, ya si adú tipa rago sa, na rago wa bara ue, na bebere rago a. Ho i ka nyasa kua gu tandu ni nga ga kparakpara ziazia aboro, agi apai dunduko re ki du ni mangimangi he. 8Mi agi pa ha ono mi aruga nga tire na ni te. Si du mi ki ya, “Ako gi gbia, gini pai nikadu ti digida agi apai re?” 9Ko ki ya, “Mo ndú ngba ga gene, Daniere, bambiko i kisi agu apai re du ki dika ha ki da ho digidaragoho ka da ni. 10Dungu aboro akpúruka tiyo, ki girisi tiyo, ki mbakadi tiyo; ono gbegberẽ yo amánga pai ni gbegberẽ he. A nga gu ni sa dagba gbegberẽ yo yo nikaruga tini na pai te; ono agu yo du ni airatatamana inikaruga tiyo na ni. 11Tona ti gu rago i ka roga gu zozo motumo ku sa yo i naatumo na ni na uru, na ho i ka maa gu kere gbegberẽhe ni namanga gbarasahe, arame wa 1,290. 12Boro maku nga gu ni sungu ki da ti ye gu arame du wa 1,335. 13Ono mo ndú ngba ga gene daho digidaha ka da ni. Mo aóngoda, ti digida agu arame re mo ki ru rogo kina gu ga ba i aringbisi he foro.”

Currently Selected:

Daniere 12: ZB1978

Highlight

Copy