Tshimuangi 23

Nsombelu muakane wa bantu

1“Kanuikadi ne biakulakula, kanubuelakanyi ne bena buenzayi bua kubajadikila bualu bua dishima.#23.1 Tangila 20.16; Lev 19.11-12; Diel 5.20. 2Kanulondi bibidilu bia bena buenzayi, nansha bobu ba bungi. Kanuitabi meyi a bantu badi bajadika bualu bua dishima, nansha bobu ba bungi. 3Kanubingishi mupele#23.3 Tangila Lev 19.15; Diel 16.19. mu dikosa dia tshilumbu, padiye kayi wamba bulelela.

4“Nuenu bamone ngombe nansha mpunde wa muena lukuna nenu mujimine, numupingaje kudi mfumuende. 5Nuenu basangane mpunde wa muena lukuna nenu mudishinde ne bujitu, kanupitshi to. Numujule pamue ne muena lukuna, nuakaje bujitu.#23.5 Tun. 4-5: tangila Diel 22.1-4.

6“Kanupishi muntu nansha yeye muena dikenga#23.6 nansha yeye muena dikenga: badi mua kuandamuna kabidi ne: bua wewe kukengesha muena dikenga. ku dikosa dia tshilumbu kumpala kua bandumbulula padiye wamba bulelela. 7Kanuteleji muena biakulakula. Kanushipi udi kayi ne bualu nansha muntu muakane, bualu meme nempishe bena buenzayi bua nanku. 8Kanuangatshi tshintu tshia mabuejila, bualu tshintu tshia nanku tshidi tshipangisha mulumbuluishi mua kuambaye bulelela.#23.8 Tun. 6-8: tangila Lev 19.15; Diel 16.19. Bualu neabingishe muntu uvua mupile.

9“Kanukengeshi muenyi, bualu nudi bamanye dikenga diende, bu munuvua penu benyi mu ditunga dia Ejipitu.#23.9 Tangila 22.20-21; Lev 19.33-34; Diel 24.17-18; 27.19.

Tshidimu tshia Dikisha ne dituku dia Dikisha

10“Bidimu bilondangane bisambombu, nukune biakudia, nubinowe kabidi. 11Kadi, tshidimu tshia muanda mutekete, kanudimi to. Bidi bishale pa madimi nebabiangate kudi bapele banudi nabu, bikuabu nebabidie kudi nyama ya mu mpata. Nuenze nanku kabidi bua mitshi yenu inudi nukuna ya maluvu ne ya tumuma tua olive.#23.11 Tun. 10-11: tangila Lev 25.1-7.

12“Nuenze midimu yenu matuku asambombu. Kadi nuikishe dituku dia muanda mutekete, bua bapika benu ne benyi benu badi banukuatshila mudimu bamone mua kuikisha, kabidi bua nyama yenu ya mpunde ne ya ngombe imone mua kuikisha payi.#23.12 Tangila 16.23-30; 20.8-11; 31.12-17; 34.21; 35.2; Lev23.3; Diel 5.13-14.

13“Nulame malu andi meme Maweja-Nangila munuambile aa. Kanutendeledi mvidie ya bisamba bikuabu. Kanuyitedi mukana muenu.

Bibilu binudi ne bua kuenza mu Izrayele

(Fuanyikija ne 34.18-26; Diel 16.1-17)

14“Nuikale nungenzela bibilu bisatu ku tshidimu tshionsu. 15Tshibilu tshia kumpala tshikale tshia mampa adi kaayi mela buanga. Nutshienze mu ngondu wa Abibe#23.15 Tshibilu tshia mampa kaayi mela buanga, ne bibilu bidi mu kan. 16 ne ngondu wa Abibe: tangila diumvuija dia bibilu ne ngondu. matuku malondangane muanda mutekete. Nudie mampa awu, anu mushindu umvua munuambile. Bualu ngondu awu ke unuvua bapatuke mu Ejipitu. Kanufiki kundi kanuyi ne milambu to.

16“Tshibilu tshibidi tshikala tshia kunowa bintu bia kumpala bia mu madimi enu.#23.16 Bilondeshile mukanda wa matuku a ngondu wa bena Izrayele, tshidimu tshitua tshijika pankatshi pa ngondu wa tshitema. — Tun. 15-16: tangila 12.14-20; 34.18; Lev 23.6-8, 15-21, 39-43; Dib 28.17-31; 29.12; Diel 16.1-17.

“Tshibilu tshisatu nuikala nutshienza ku ndekelu kua tshidimu, pajika dinowa dia bintu bia mu madimi enu.

17Nanku bantu balume bonsu nebikale bamueneka kumpala kua Maweja-Nangila misangu isatu ku tshidimu mu bibilu abi.

18“Kanuena mua kundambula milambu ya mashi a nyama pamue ne mampa adi mela buanga. Kabidi, mu bibilu abi, kanushiyi mafuta a nyama inudi nundambula bua kulalawu ne mu dinda to.#23.18 Mafuta a nyama bavua ne bua kuosha amu dituku adi.

19“Bintu bia kumpala binudi nunowa mu madimi enu, nufike nabi mu nzubu wanyi, bualu ndi Maweja-Nangila Mvidi Mukulu wenu.

“Panudi nulamba munyinyi wa muana wa mbuji, kanuedimu mabele a mamuende to.#23.19 Biakudia bia tshianyi: tangila Diel 26.2, — nulamba munyinyi wa muana wa mbuji: tangila 34.26; Diel 14.21: ke tshibidilu tshivua bena Kenaane natshi.

Bidi Mvidi Mukulu mubalaye kumpala kua luendu

20“Mutumibue wanyi neafike kunudi bua kunulama mu njila ne kunufikisha ku muaba undi munulongoluela. 21Kadi, nudimuke! Pafika mutumibue wanyi, nuitabe bionsu bidiye unuambila. Kanumufikishi munda, kanumutombokedi. Bualu kena mua kunufuila luse ku bubi buonsu bunudi nuenza. Bionsu bidiye wenza, udi ubienza mu dina dianyi. 22Kadi, nuenu bitabe diyi diende, bakumbaje bionsu bindi ngamba, meme Maweja-Nangila nenduishe bantu bonsu badi banuelela meji mabi.

23“Kabidi mutumibue wanyi awu, neende kumpala kuenu bua kunufikisha mu ditunga dia bena Amore, bena Iti, bena Perizi, bena Kenaane, bena Ivi ne bena Yebusa. Nembutule bena bisamba ebi bionsu. 24Nanku, kanuena mua kunemeka mvidie idibu batendelela. Kanuena mua kuyikukuila nansha kulonda bibidilu bia bisamba abi. Kadi, nuzaze mpingu ya mvidie ayi. Nushimbule makunji abu a mabue. 25Nuntendelele anu meme Maweja-Nangila Mvidi Mukulu wenu. Nanku nennuele lupemba, nenupete bia kudia ne mayi a kunua. Nennumbushile masama adi mua kunutatshisha. 26Mu ditunga dienu kamuakuikala bakaji batula mafu. Meme Maweja-Nangila nennushiye ne muoyi pa buloba matuku a bungi.

27“Kadi bonsu badi basue kunuluisha, meme nembakuatshishe bowa, banutshine, bapange mua kunuluisha, banunyeme. 28Nentume tshipupu tshia tuishi bua kunyemesha bena Ivi, bena Kenaane ne bena Iti kanuyi banji kufika.#23.28 Kanungu aka badi mua kukandamuna kabidi ne: Kanuyi banji kufika, nengenze muanyi muonsu bua bena Ivi, bena Kenaane, ne bena Iti batekete mu maboku, banyema. 29Kadi tshiakuipata bantu bonsu anu tshidimu tshimue to. Bualu nyama ya mu mpata idi mua kuvulangana, ditunga didi mua kunyanguka. 30Nembipate ku kakese ku kakese too ne panuavulangana bua nuenu kupiana ditunga. 31Nanku, ditunga dienu nedikale dialabale, dituadijile ku Mayi manene makunze too ne ku mayi a bena Peleshete.#23.31 Mayi manene a bena Peleshete ke Mayi manene a pankatshi pa matunga. Nedikale dituadijile kabidi ku tshipela tshia Sinayi too ne ku musulu wa Perate. Meme nennupeshe bukole bua kuipata bena matunga onsu aa. 32Kanumvuanganyi ne bena matunga abu. Kanutendeledi mvidie idibu batendelela. 33Kanusombi nabu ditunga dimue, bualu badi mua kunulongesha bua nuenu kuntombokela, kutendelela mvidie yabu.”

Currently Selected:

Tshimuangi 23: TSH96

Highlight

Copy

Compare