Tshimuangi 20

Mikenji dikumi

(Diel 5.6-21)

1Mvidi Mukulu kuakula, wamba ne:

2— Meme ndi Maweja-Nangila, Mvidi Mukulu webe, uvua mukupatule mu ditunga dia Ejipitu, muvuabu bakukuate ku bupika.

3“Kutendeledi mvidie mikuabu to, anu meme. 4“Kusongi mpingu ya mvidie. Kuenji tshimfuanyi tshia tshintu nansha tshimue, nansha tshidi mulu mu mavuba, nansha tshidi panshi pa buloba, nansha tshidi mu mayi adi muinshi mua buloba. 5Kukukuidi mpingu ya nanku. Kuyitendeledi,#20.5 Tun. 4-5: tangila 34.17; Lev 19.4; 26.1; Diel 4.15-18; 27.15. bualu meme ndi Maweja-Nangila Mvidi Mukulu webe. Ndi musue kuikala Mvidi Mukulu webe, meme nkayanyi. Nennyoke bantu bonsu badi bankina too ne ku ndelanganyi yabu ya musangu muisatu nansha muinayi. 6Kadi bantu badi bannange, batumikile mikenji yanyi, nembanange, mbenzele bimpe too ne ku ndelanganyi tshinunu.#20.6 ndelanganyi tshinunu…: nansha: bantu binunu ne binunu. — Tun. 5-6: tangila 34.6-7; Dib 14.18; Diel 7.9-10.

7“Kutedi dina dianyi meme, Maweja-Nangila Mvidi Mukulu webe, tshitelatela, bualu meme nengangate muntu yonsu udi kayi unemeka dina dianyi bu muena tshibawu.#20.7 Tangila Lev 19.12.

8“Uwluke dituku dia Dikisha, udinemeke, bualu ndia tshijila. 9Wenze midimu yebe yonsu matuku asambombu. 10Dituku dia muanda mutekete ndia Dikisha, dia kunnemeka anu meme Maweja-Nangila. Kuenji mudimu dituku adi, nansha wewe, nansha bana bebe ba balume nansha ba bakaji, too ne bapika ne benyi badi basombe mu ditunga dienu. Kabidi bimuna bienu kabienji mudimu to. 11Bualu meme Maweja-Nangila ndi mufuke diulu, mayi manene ne bionsu bidimu, anu mu matuku asambombu. Meme kuikisha dituku dia muanda mutekete, kudijidila,#20.11 Tun. 8-11: tangila 16.23-30; 23.12; 31.12-17; 34.21; 35.2; Tshib 2.1-3; Lev 23.3. bua dikale dituku dia Dikisha.

12“Nemeka tatuebe ne mamuebe, nanku neulale bidimu bia bungi pa buloba bundi meme Maweja-Nangila Mvidi Mukulu webe mukupeshe.#20.12 Tangila Diel 27.16; Mat 15.4; 19.19; Mar 7.10; 10.19; Luk 18.20; Ef 6.2-3.

13“Kushipi muntu.#20.13 Tangila Tshib 9.6; Lev 24.17; Mat 5.21; 19.18; Mar 10.19; Luk 18.20; Rom 13.9; Yak 2.11.

14“Kuendi tshiendenda.#20.14 Tangila Lev 20.10; Mat 5.27; 19.18; Mar 10.19; Luk 18.20; Rom 13.9; Yak 2.11.

15“Kuibi.#20.15 Kuibi: nansha: kuibi muntu: diba adi mukenji ewu udi upita kutangila bantu badi bapangishe muntu mua kuenzaye nuwuaye musue, mmumue ne: kukuatshisha bantu ku bupika (tangila 21.16). Tangila kabidi Lev 19.11; Mat 19.18; Mar 10.19; Luk 18.20; Rom 13.9.

16“Kushiminyinyi mukuenu bualu.#20.16 Tangila 23.1; Mat 19.18; Mar 10.19; Luk 18.20. 17“Kualakanyi tshintu nansha tshimue tshia mukuenu: nansha nzubu wende, mukajende, mupika wende, ngombe wende, mpunde wende.#20.17 Tangila Rom 7.7; 13.9.”

18Bantu bonsu bumvue makubakuba ne miadi ya mpungi, bamone kabidi miela ya mvula ne muinshi ufuima ku mukuna, kutshinabu, kuzakalabu, kuimanyinabu pa bule. 19Bavua bambila Moshe ne:

— Wewe nkayebe utuambile malu onsu, netuteleje. Kadi Mvidi Mukulu kakudi netu nansha. Patupu netufue.#20.19 Tun. 18-19: tangila Ebr 12.18-19.

20Moshe kubandamuna ne:

— Kanutshinyi to. Mvidi Mukulu mmufike bua kunuteta, bua numutshine, nulekele buenzayi.

21Bantu bonsu bavua bimanyine pa bule. Anu Moshe nkayende ke uvua musemene pabuipi ne divuba difike, muaba uvua Mvidi Mukulu.#20.21 divuba nansha dikunji dia muinshi: tangila 13.21 ne diumvuija.

Mikenji idi itangila tshilambuilu tshia milambu

22Nanku, Maweja-Nangila kutuma Moshe kabidi bua kuambila bena Izrayele ne:

— Nuadimuenyi nkayenu mundi nyukila nenu, meme muikale mulu. 23Kanuenji mpingu ya mvidie, mifula ne biamu bitoke bia mushinga mukole nansha ne mpawungi. Kanuenji mvidie inudi nutendelela pamue nanyi! 24Kadi nungenzele tshilambuilu tshibaka ne buloba. Pa mutu patshi nundambuilepu milambu ya kuosha ne ya ditua ndondu, nusungula munkatshi mua ngombe, mbuji ne mikoku yenu. Miaba yonsu indi mumuambile bua nuenu kuntendelela, nengikale munkatshi muenu bua kunuela lupemba. 25Nanku, panuasua kungashila tshilambuilu tshia mabue, mabue awu ikale anu majima. Kanuena mua kuasonga ne biamu to. Bualu panudi nualenga ne biamu bienu bia bantu, kaena andengelela kabidi to.#20.25 Tangila Diel 27.5-6; Yosh 8.31. — Padi muntu wenza mudimu ne tshiamu, udi mua kusonga mabue mudiye musue. Kadi mabue majima, muvua Mvidi Mukulu muafuke, ke adibu mua kuibaka nawu bintu bia tshijila bia Mvidi Mukulu (fuanyikija ne Diel 21.3-4). 26Pashishe, tshilambuilu katshikadi ne bibandilu to, bualu butaka bua udi ubanda bua kundambula milambu budi mua kumueneka.#20.26 Ku ntuadijilu, mutuangaji wa bena Izrayele uvua anu ne dipupila mu tshimonu pavuaye wenza mudimu ku tshilambuilu.

Currently Selected:

Tshimuangi 20: TSH96

Highlight

Copy

Compare