Olelo 23
23
1“Tongozake bonkindo wa bampulu toamanake lʼantʼobe wae oyaleme témoin ea bampulu. 2Tokimanake lʼetukuluku eʼanto wete okelʼobe; tiezake joi nda likambo akimana we lʼetukuluku eʼanto wae olokotanya ete nelo eʼakambo: 3ko tosambelake bonto owa boola lʼikondo nda likambo liatʼende.
4“Ngʼotana ngombo ea wini oke, nkina mpunda ekae eyunge mboka, uteyʼeko ele bomongo. 5Nga wena mpunda eʼonto, okina we jino, eokwa ndʼase ba bolito bokiʼndʼotombaka, tofezake lokambya, wʼokambya wae asojwa bolito.
6“Tolokotanyake ete nelo ea likambo jʼontʼoke owa boola nda eloko eatʼende. 7We yalemʼesi lima likambo ja bampulu; ko toomake ende otakelakʼobe ko lʼowa liongi: elʼemi mpaoyengola bontʼobe boyengo. 8Ko tambake nyongo; ele nyongo eomaka baiso bʼanto bandena, ko ungyaka baoyi ba ba-liongi.
9“Ko totukake bofaya lotuko: elʼinyo lolea botema wʼofaya, ekʼinyo bafaya ndʼese ea Ejipeto.
10“Onaka biofo nda lisala like mbula botoa, ko takanya efuza ea liko. 11Lolonde nda mbula ea nsambo, omya lisala, liko licikale nko njoona; wae bantʼake bʼeola bale: ko nyama yʼokonda ileke toma tocikʼiyo. Kela nkʼelengʼeko la lisala like ja vina, ko la lisala ja bilaya.
12“Bembile botoa sala besala beke, ko nda mbile ea nsambo oma: wete ngombo eke la mpunda eke bome jomo, ko bona owa jende owʼokwala oke owʼomoto, ko lʼofaya, basalangane. 13Lofonga baoyi bakiʼmʼosangelakiʼinyo bauma; ko taloandake jina ja nzakomba imo, talolangake liko jokana ndʼomwaʼokinyo.
Bilambo bisato biʼenene
(Ol 34.18-26; B. biʼaf 16.1-17)
14“Ompongelʼemi elambo nda mbula emoko befonga besato. 15Fonga elambo ea mampa esamba nyango; leka mampa esamba nyango bembile nsambo, ngokiʼmʼokosisaka, ndʼekeke endezama nda nsanza ea Abiba, eki wʼolaka limʼEjipeto nda nsanza eko. Ko nkʼonto ondenya nda joso likama lʼakata mpampa. 16Ko fonga elambo ea emukelo, bamuka ba joso ba belemo beke, beki wʼonaka nda lisala; ko lʼelambo ea etakanyelo, nda nsukela ea mbula, atakanya we belemo beke lima lisala. 17Wengi mbula baende bake bauma benya nda joso ja Nkolo Nzakomba, bienya besato.
18“Tolekyake balongo ba mbeka ekami la mampa ele la nyango; ko bauta ba elambo ekami bafaocikala botsʼotso elaka nko nkesa.
19‘Yefa iango ya bamuka bake ba joso ba lisala like ndʼilombe ya Yawe Nzakomba eke. Tokatsake bona owa nta ndʼaele ba nyango.
20“Bala, ntomʼekima nda joso like wete akofonge nda mboka, ko akoyele nda wiji bokiʼmʼezaka. 21Fonga loalʼende ko lokoza lolaka lokande; taloseyakʼende: ncina wete ende afaotungolʼinyo limʼoseketanʼokinyo; ele lina likami elʼende.
22“Lolonde nga wokoza lolaka lokae nsosolo, ko okela baoyi batefelʼemi bauma; emi njifoyalema wini ele bainiʼake.
23“Ele ekima ekami ifocwa nda joso like, ko ifokotsweya eka Bo-Amola, la Bo-Ete, la Bo-Peliza, la Bo-Kanana, la Bo-Iwa, la Bo-Yebusa: ko emi njifofitʼako o nye. 24Totataanelake nzakomba ikiyo, tokambelakʼiyo belemo, ko tokelake elengʼele beketo bekiyo: lolonde wʼaumbe o njuumba, ko bola baidola bakiyo. 25Inyo losaela Yawe Nzakomba ekinyo, ko ende ifokosakeela mampa ike, ko lʼasiʼake, bokako wa swa; ko emi njifimola nkangi lima ntoku eke. 26Nkʼondongolʼona ndʼese eke, nkʼentole otaotaka: njifofuza boanji wa bembileʼeke wae befule. 27Emi njifotoma boomaʼokami nda joso like, ko mpanzolʼanto bae wʼokendela bauma, ko njifoututaza baini bake wae bakokaya bekongo bekiyo. 28Ko njifotoma loto nda joso like ko loko lifitanya Bo-Iwa la Bo-Kanana, la Bo-Ete lima joso likawe. 29Mpaitanya bako nda joso like nda mbula emoko; nyango bokili bofoyala lʼolalengo, ko nyango nyama yʼokonda ifofunzola ele we. 30Njifaitanya lima joso like isisi isisi, elaka nko ofule ko osangole bokili. 31Ko njifeza boleloʼoke lima lieke jʼokwa ja Ngola o nda lieke jʼokwa ja Ba-Pelesete, ko lima ete keleke o nda Pelata: elʼemi njifolekya basi ese eko nda likata like; ko we wifaitanya lima joso like. 32Tolembake bokolo lʼiyo, ko la nzakomba ikiyo ngoko. 33Iyo batayalake ndʼese eke, nyango bafosongozʼinyo wae lonkeelʼemi bobe: nkina osaela nzakomba ikiyo, joi liko lifoyalema elʼinyo ngʼilonga!”
Currently Selected:
Olelo 23: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
