Olelo 22
22
Bisekyelo bimo bia toma lʼekambelo
1“Nga bonto aoliya ngombo nkina mpate, ko aomʼeko, ko atekya; ende ifofuta ngombo itano ndʼeloko ea ngombo eko, ko la mpate inei ndʼeloko ea mpate eko.
2“Nga wiyi aotanema wae ayoolʼilombe, ko aokundama lʼoambo wae aowa, nkʼonto olekya nyongo ndʼeloko ekande. 3Nga jefa jolokyela, bonto ondoomaki ifoata likambo, ifolekya nyongo ndʼeloko ekande. Wiyi ifofuta ko nkina afoate yomba nye, kelʼende atekyame ndʼewela ea yiya ikiʼnde. 4Nga ngombo, nkina mpunda, nkina mpate ekiʼndʼiyaka eotanemʼelʼende eyoike; ende ifofuta nga befuta befe.
5“Nga bonto afita lisala, nkina lisala ja vina, wae atungole ngombo ekae ekende, ko ecwʼoleka toma nda lisala jʼontʼomo; ende ifofuta o la toma tolekolʼolotsi lima lisala likae mongo, nkina lima lisala likae ja vina.
6“Nga tsa toambwa, ko totumba baeke, ko biimba bia biofo, nkina biofo biyomele, nkina lisala mongo jolika nye; ende oambolaki tsa toko ifofuta ndʼewelʼeko o nsosolo.
7“Nga bonto acikela bonto osingitana lʼende bosolo la baumba wete aombe bako, ko banto baoliya baumba bako limʼilombe yʼontʼoko; nga wiyo oko aotanema, ende ifofuta nga befuta befe. 8Nga wiyi oko afotanema, bomongʼilombe ifotutama ele Nzakomba, wae bea nkinʼende akitaki baumba bʼonto osingitana lʼende lʼakataʼakande, nkina nye.
9“Lʼakambo bauma ba beseketano, nkina likambo ndʼewela ea ngombo la mpunda, la mpate, lʼenkoto, lʼolemo nko loswele bocwei, ko bonto akela, Bokʼone, likambo ja bantʼako bakʼafe lifoya nda joso ja Nzakomba; ko ende oe Nzakomba umba, ifofuta osingitana lʼende nga befuta befe.
10“Nga bonto acikelʼonto osingitana lʼende mpunda, nkina ngombo, nkina mpate, nkina nyamʼemo wete aombe; ko eko eowa, nkina eolotala, nkina bitanyʼeko, nkʼontʼondena; 11kelʼantʼakʼafe basimbelana nsimbi la Yawe, wae ende ntakitʼolemo wʼonto osingitana lʼende la likata likae; ko bomongʼolemoʼoko imeza ngoko, ende afaofuta. 12Lolonde nga boiyela bolemʼoko yiya, ende ifofuta bomongo oko. 13Nga nyamʼeko eokanjwa nkakanjwa, kelʼende ayele wete bene; ende afaofuta ndʼewela ea nyama ekanjwaki.
14“Nga bonto asomba nsombi limʼelʼonto osingitana lʼende, ko eolotala, nga eowa, bomongo ntaki eko, ende ifofuta nsosolo. 15Lolo nga bomongo aki eko, afaofuta; nkina asombaki wae esale ndʼewela ea bofuto, eko eyaki ndʼewela ea bofuto.
16“Nga jende ongʼomoto otaata bome jongo, ko etama lʼende, ende ifolekyʼaumba ndʼewelʼekande wae ayale waji okae. 17Nga ise eʼomoto aolofekeza bomoto oko nye, kelʼendʼalekya baumba elengʼele baumba balekyama ndʼeloko eʼamato bafa lʼaome.
18“Toikyake bomoto owʼakunda.
19“Bonto nko loswele oalana la nyama ifoomama nsosolo.
20“Bonto olekya mbeka ele nzakomba emo, afʼele Yawe kika, ende ifofitana o mpitana mongo.
21“Totumolake bofaya, ko totukakʼende; ekʼinyo bafaya ndʼese ea Ejipeto. 22Teneyake bomoto oweiʼome, ko la bona owei ise elo. 23Nga olaeneya elo nko loswele, ko iyo bambondʼemi, njifoka lilelo likiyo nsosolo; 24ko nkele ekami ifongala, ko njifoomʼinyo lʼifaka yʼetumba; ko baajiʼakinyo bayale bamato baweiʼaome, ko bana bakinyo bawei baise.
25“Nga osombyʼontʼomo owa bantoʼakami balʼele we la boola, nsombi ea baumba, toyalemake elʼende ngole bokembi; tetake limʼelʼende baumba ba bokembi nye. 26Ngʼokola bonkoto wa bonto osingitana la we botungya, uteyʼoko elʼende atafa jefa ile: 27ele boko bole ekukelo ekande, bole bonkoto bo ende oyaombʼomongo; ende etama la na? Ko a endʼombondʼemi, njifoka; elʼemi lʼoya.
28“Totangake Nzakomba lotango, ko totolake roi ea bantʼakawe.
29“Tomongake lolekya efuza eʼamukaʼake lʼea vin eke. Ko onkaya nsomi ya banaʼake. 30Koko kela elengʼeko la ngombo ike ko la mpate ikawe: bona ayale la nyango bembile nsambo; nda mbile ea mwambi, wʼonkaya oko.
31“Ko inyo, loyaleme banto bʼoeko elʼemi; ndʼewelʼeko, taloleke nyama ekanjwa la nyama emo ndʼokonda; lusa nyama eko ele mbwa.
Currently Selected:
Olelo 22: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
