Olelo 21
21
Bisekyelo bimo bitongana lʼekambelo eʼonto
(B. biʼaf 15.12-21)
1“Bine wae bitenelo biʼakambo bie wʼakaya. 2Nga osomba bokwala, Bo-Ebele, ende akosaela mbula botoa ko nda mbula ea nsambo atungwa, akende o mpampa. 3Nkinʼende otswaki nda likwala nkʼomongo, ifola nkʼomongo; nkinʼende otswaki la waji, ifola ende la waji. 4Nga nkolo ekae aolokaya waji, ko bomoto oko aolootela bana, lʼaende lʼamato; waji oko la bana bakae bayale ba nkolo ekande, ko ende ifola nkʼende kika. 5Lolonde nkina bokwala oko akela, Emi ndanga nkolo ekami, la waji okami, lʼana bakami; mpaola lima likwala nye; 6kela nkolo ekae oyele ele Nzakomba, ko ayelʼende nda wiso, nkina nda likonji ja wiso, ko nkolo ekae atue litoi lʼitua; ko bokwala oko ifosaela nkolo bikeke biuma.
7“Nga bonto atekya bonʼokande owʼomoto wae ayale bokwala, ende afole lima likwala elenge endola bakwala bʼaende. 8Nga nkolo ekae ntenʼolotsi elʼende, kelʼende okaya elekelo wae asikwa; ende atatekyake bomoto oko elʼanto bʼafaya, ekiʼndʼokakatanyakʼende. 9Nkina olekya ele bonʼokae, waji, ifokeelʼende elengʼele bonʼowʼomoto. 10Ko nkina bona oko akola waji omo, afaokokola toma ta ndala, lenkoto, la mpifo ea liala limʼele waji oki bokwala. 11Nkinʼafokeelʼende baoyi bane basato, kela bomotʼoko ole lima likwala o mpampa, nko baumba ba nsiko.
12“Ende okundʼontʼomo ko aowa, ondokundaki ifoomama. 13Lolo ngʼende ntocwʼelʼende ifoso, lolo Nzakomba aokweya nda likata likande lʼefoma, kela nkosisela itenela i endʼolota. 14Koko nkinʼonto ayʼelʼonto osingitana lʼende la ndokoza wae oomʼende la jongo, wifokolʼende o lima nkinda ekami ea mbeka, ekiʼndʼolotaka, wae awe.
15“Bontʼokundʼise ekae, nkina nyango ekae, ifoomama.
16“Ende ondiya bonto, ko aolotekya nda likwala, nkinʼataneme nda likata likae, ende ifoomama
17“Ende otolʼise ekae, nkina nyango ekande, ifoomama.,
18“Nga baendʼamo baouna, ko omo akundʼonkina lʼekenje, nkina lʼemponda, lolo afowe, ayale nda ntange o nkalema, 19ngʼende aetswa lenkina ko alande ndanza lʼonkando, ondokundakʼende aolimana lima likambo; ifolofuta bofuto wa bembile bekiʼnde ntasala, ko ifofuta elaka nko aikyame nye.
20“Nga bonto akundʼokwalaʼokae owa jende, nkina owʼomoto, la nganza, ko aowa lʼoambo boko; ende ifoata likaiinbo ja nsisoza. 21Lolonde ngʼamonga mbilʼemoko nkina bembile befe, endeafaata likambo ja nsisoza; elʼende baumba bakae.
22“Nga baende bauna, ko bafukya bomoto ole la jemi, wae ongolʼona, lolo afoke nkangi ndʼafeka; bontʼoko ondokyakʼende eefe, ifofuta nyongo, elenge esisa bome owʼomoto; ko ende ifolekya baumba elenge ete na juges likambo liko. 23Lolo nga limo joi jiela ndʼafeka, wifumanya iwa lʼiwa, 24liso ndʼeloko ea liso, lino ndʼeloko ea lino, likata ndʼeloko ea likata, likaka ndʼeloko ea likaka, 25ndongola ea tsa ndʼeloko ea ndongola ea tsa, mpota ndʼeloko ea mpota, la lififa ndʼeloko ea lififa.
26“Nga bonto akunda bokwala okae owa jende, nkina owʼomoto, nda liso, ko aooma liko; nkolo ifolotungola lima likwala o la ncina ea liso liko likande. 27Ko nga atena lino jʼokwala okae owa jende nkina owʼomoto, ifolotungola lima likwala o la ncina ea lino liko likande.
28“Nga ngombo ea jende eoka bonto lʼeongo, la jende lʼomoto, wae awe, ngombo eko ifoomama la bikenje njoonya, ko nyama eko efaoleama; lolo bomongo ngombo aosiza joi o ngoko. 29Lolonde ngombo eko eokakʼanto lʼeongo ndʼekeke eki joso, ko basangelaki bomongo, ko ende ntesanyaki ngombo, lolo eko eomʼonto, la jende lʼomoto; ngombo eko ifoomama la bikenje njoonya, ko bomongo ngombo aomame ngoko. 30Nga banto baoleza botunya wa baumba ba nsiko, ende ifolekya baumba bako bandosisʼiyo ndʼewela ea nsiko ea loiko lokande. 31Nkina ngombo eko eokaki bonʼowa jende, nkina bonʼowʼomoto bifokeelʼende elengʼele ete nelo ene ea likambo. 32Nga ngombo eko eoka bokwala owa jende nkina owʼomoto, bomongo ifokaya nkolo ea bokwala oko basekele ba argent ntuku isato, ko ngombo eomame la bikenje njoonya.
33“Ko nga bonto akukola lifoku, nkina acime lifoku ko afokuke liko, ko ngombo nkina mpunda ekwela liko, 34bomongo lifoku ifolekya nyongo; akaya bomongo nyama baumba, ko nyama ewaki eyale ekande. 35“Ko nga ngombo eʼonto ea jende eoka ngombo eʼonto omo la beongo, ko eko eowa; kelʼiyo batekya ngombo eyoike ko bakafe baumba ba wiko. Ko bakafe ngombo eomamaki o ngoko. 36Ko nga joi jeanaki wete ngombo eko eokaka lʼeongo ndʼekekʼeki joso, ko nkolo ntesanyaki eko, ende ifolekya nyongo, emo ngombo esulungana ngombo eko, ko nyama eomamaki eyale ekae.
Currently Selected:
Olelo 21: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
