Olelo 20
20
Beleka jom
(B. biʼaf 5.1-33)
1Ko Nzakomba atefelaki baoyiʼane bauma, akela,
2“Emi wae Yawe Nzakomba eke okoyelaki limʼese ea Ejipeto, ko limʼilombe y a likwala.
3“Toatake nzakomba inkina imola nkʼemi.
4“Toyasengelake efoya lʼesonganya ea bolemo bole nda loola ndʼaliko, ko bole ndʼokili ndʼase, la bole ndʼasi ndʼase ba bokili: 5tokusamelake iko ko tokambelakʼiyo belemo: ncina wete emi Yawe Nzakomba eke, nde Nzakomba endoka jua, ndongwanya bana likambo jʼobe boki baise, elaka nko boloi wa bonkana nkina boloi wa nkanooli, wae elʼiyo banjinʼemi jino, 6lolo ndeneya banto bandokʼemi eefe ko bafonga besise bekami isei, elaka nko biotswelo nkoto.
7“Toandake lina ja Yawe Nzakomba eke liandaanda; ele Yawe afaoyengola bonto oanda lina likae liandaanda boyengo.
8“Ofwa mbile ea sabata wae oekyʼeko boeko. 9Bembile botoa okambʼelemo, ko sala besala beke beuma; 10lolo mbile ea nsambo wete mbile ea sabata ele Yawe Nzakomba eke: nda mbilʼeko, tosalake nye, we lʼona oke owa jende lʼowʼomoto, la bosali oke owa jende lʼowʼomoto, la nyama ike, ko lʼofaya oke ole ndʼetei eke: 11eki Yawe emaka loola lʼokili, la basi ba lieke jʼokwa, la toma touma tole ndʼako ndʼembile botoa ko aoloma nda mbile ea nsambo: ndʼewelʼeko, Yawe aosakela mbile ea sabata bokako wa swa, ko aoekya mbilʼeko boeko.
12“Fika ise eke la nyango eke; wete bembile beke befule ndʼokili boki Yawe Nzakomba eke okokaaka.
13“Toomake bonto.
14“Tokelake jibi.
15“Tawiyake yiya.
16“Toyalemake témoin ea bampulu ele bonto osingitana la we.
17“Tokombolake ilombe yʼonto osingitana fa we, ko tokombolake waji owʼonto osingitana la we, ko lʼosali okande owa jende, lʼowʼomoto, ko la ngombo ekae, ko la mpunda ekae, ko lʼolemʼokae nko loswele.”
18Bantʼauma benaki bakalili la ngongo eyozʼolinga, ko bokaki bakungola la lofoso ja bolola: ko aki banto enaka, baolenga lolengi ko baolemala ndʼesi. 19Ko baokela Mose, “We tefefa lʼiso, ko tokoza: lolo Nzakomba atatefelake lʼiso nyango tofowa.” 20Mose aokelʼanto, “Taloangake; Nzakomba ayomekʼinyo, ko aoya wae boangi bokae boyale nda joso likinyo, nyango lofokelʼobe.”
21Ko bantʼako baolemala ndʼesi ko Mose aotutama ele Nzakomba nda limpoci ja wilima. 22Yawe aokela Mose, “Sangela bana ba Yisalaele ngone, Inyo mongo lolena wae njotefela lʼinyo lima loola. 23Talotulelakʼinyo mongo nzakomba imo wae loamanyʼiko lʼemi wete nzakomba ya argent, la nzakomba ya wolo. 24Onkeelʼemi nkinda ea mbeka eʼamoci, ko lekya mbeka ike ya ntatumba, la mbeka ike ya eamanyelo, la mpate ike, la ngombo ikawe eko: nda wengi itenela icikʼemi lina likami, njifoyʼele we, ko njifokosakela we bokako wa swa. 25Ko nga otonga nkinda ea mbeka ea bikenje, totongake la bikenje bia nsasenga: nkinʼokita bikenje biko lʼefeko eke, olila biko linyamo. 26Ko toundake nda nkinda ea mbeka ekami lʼeundelo, nyango botaka boke bofenya eko.”
Currently Selected:
Olelo 20: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
