Olelo 19
19
Etekeleke la ngongo ea Sinai
1Ko nda nsanza ea isato limʼaki bana ba Yisalaele olaka limʼese ea Ejipeto, nda mbilʼeko, baoya ndʼete keleke ea Sinai. 2Akiʼyʼimanaka Lepidima, ko baoya ndʼete keleke ea Sinai, bezaki lilako ndʼete keleke; wae bezaki etakanelo ekiyo nda joso ja ngongo. 3Ko Mose aounda ele Nzakomba, ko Yawe aoloeta lima ngongo, akela, “Tefela la booci wa Yakoba, ko sangela bana ba Yisalaele elengʼene: 4inyo lolena baoyi bakiʼmʼokeelaka Ba-Ejipeto, la ngokiʼmʼotombakʼinyo ngole ndʼafafu ba mpongo, ko njelakʼinyo elʼemi mongo. 5Limʼaeyoko, nkina limeza lofoso lokami nsosolo, ko lofonga elembelo ekami eʼokolo, kela loyaleme bantoʼakami mongo bʼoeko lima ntoku eʼanto bauma; ele bokili bouma bokami: 6ko inyo lifoyalema elʼemi likulaka ja nkanga, la booci wʼoeko. Bane wete baoyi bae wʼotefeela bana ba Yisalaele.”
7Koko Mose aoya ko aoleta bingambi biʼanto, ko aolaeanya baoyiʼane bauma baki Yawe osisakʼende. 8Ko bantʼauma baolambʼolongo, bakela, “Tifokela baoyi baki Yawe otefelaka bauma.” Ko Mose aosangela Yawe baoyi baki banto. 9Koko Yawe aokela Mose, “Bala, njoyʼele we nda litute jʼete te, wae a emʼotefela la we, bantʼako boke, bakimeza we bikeke biuma.” Ko Mose aosangela Yawe baoyi baki banto. 10Koko Yawe aokela Mose, “Kendʼele bantʼako, wʼauzʼiyo ndʼoeko mbilʼene la lobi, ko kela basolʼenkotoʼekiyo, 11ko belame elaka nko mbile ea isato: ko nda mbile ea isato Yawe ifokitela ndʼaiso ba banto bauma nda ngongo ea Sinai. 12Ko wifotenʼolelo ntutama la ngongo kio samanyu, wʼakele, Lofonga loala wae lofounde nda ngongo, ko lofofomwa bompempe wa ngongo; osʼofomwa ngongo ifoomama ci: 13nkʼonto ondokitʼende la likata lolo ifoomama la bikenje njoonya, nkina la mbaoka lʼefeko o nsosolo; la nyama lʼonto, afaoika: ae bolola wulama wula wʼotale, bifoya nda ngongo.” 14Ko Mose aokitela lima ngongo elʼanto, aolauza ndʼoeko, ko baosolʼenkoto bekiyo. 15Ko aokelʼanto, “Inyo lelama nda mbile ea isato; talotutamelake bomoto.”
16Nda mbile ea isato, aki nkesa okya, bakungola bokana la bakalili benya, ko la litute jʼete te liki nda ngongo, ko la lofoso ja bolola ja lonene jokana; ko bantʼauma baki ndʼetakanelo baolenga lolengi. 17Mose aoyela bantʼako limʼetakanelo ekiyo wae bakumane la Nzakomba; ko iyo baolemala ndʼase ba ngongo. 18Ngongo ea Sinai eokelʼolinga eko euma, eki Yawe okitelaka eko nda tsa: bolinga wʼeko wulelaki nga bolinga wa mbilo eʼenene, ko ngongo euma eolenga lolengi mongo. 19Aki bolola wulaka la lofoso jʼonene, ko loko lokaka o nkakaka, Mose aotefela, ko Nzakomba aoloamba la lolaka. 20Yawe aokitela nda ngongo ea Sinai, nda nsonge ea ngongo: ko aoleta Mose nda nsonge ea ngongo; ko Mose aounda eko. 21Yawe aokela Mose, “Kitela, sisa bantʼane bosise, nyango bafotuwana ele Yawe wae batalʼetalo ko boukeʼokiyo bafowa. 22Koko kela nkanga batutamele Yawe bauzʼiyo mongo ndʼoeko, nyango Yawe afola elʼiyo.” 23Ko Mose aokela Yawe, “Bantʼako bafoundeya Sinai; eki wʼotosisaka, okela, Tenʼolelo ntutama la ngongo kio samanyu, ko bekyʼeko boeko.” 24Yawe akela, “Kenda, kitela; ko we bunda we lʼAlona: lolonde tolangake nkanga la bantʼako batuwane wete baundʼele Yawe, nyangʼende afola elʼiyo.” 25Ko aokitela ele bantʼako ko aolasangela.
Currently Selected:
Olelo 19: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
