Olelo 18
18
Yitelo aobiza Mose
1Yitelo, nkanga ea Midiana, bokilo owa Mose, aoloka belemo beuma beki Nzakomba okeelaka Mose, ko la Ba-Yisalaele bantoʼakande, ngokiʼndʼayelaka limʼEjipeto. 2Ko Yitelo, bokilo owa Mose, aokola Sipola, waji owa Mose, okiʼndʼuteyaka, 3ko lʼanaʼakande bafe, lina ja bonʼomo wae Ngelusoma (ekiʼndʼokelaka, “Emi nki bofaya ndʼese ea lifaya”), 4ko lina jʼomo wete Eliezele (ekiʼndʼokelaka, “Nzakomba ea ise ekami aki bokambyi okami, ko aombikya limʼifaka yʼetumba ya Falo.”) 5Ko Yitelo, bokilo owa Mose, aoya la bana bakae ko la waji okae ele Mose ndʼete keleke, ekiʼndʼezaka lilako jʼetakanelo nda ngongo ea Nzakomba: 6ko aokela Mose, “Emi Yitelo bokilo oke, njoyʼele we la waji oke, ko bana bakae bafe bale lʼende,” 7ko Mose aocwa okumana lʼokilo okae, aoloosamela, ko aolosambela la baiser, ko baoluwana nkina bakema: ko baoya ndʼilombe ya bito. 8Ko Mose aosangela bokilo okae baoyiʼauma baki Yawe okeelaka Falo la Ba-Ejipeto ndʼeloko ea Ba-Yisalaele, ko lʼelo euma ekiʼyʼenaka nda mboka, ko lʼelengʼeki Yawe oaikyaka. 9Ko Yitelo asalanganaki ndʼewela ea liota liki Yawe okelaka ba-Yisalaele, wete aikyakʼiyo limʼakata ba Ba-Ejipeto.
10Ko Yitelo akela, “Imemya ele Yawe oikyakʼinyo limʼakata ba Ba-Ejipeto, ko limʼakata ba Falo. 11Aeyoko ndea wae Yawe aolekola nzakomba iuma; ko aikyaki bantʼako lima lotuko ja Ba-Ejipeto, okambelakʼiyo lʼelenge ea eloloko.” 12Ko Yitelo, bokilo owa Mose, aokola mbeka ea ntatumba la mbeka imo wete alekya iko ele Nzakomba; ko Alona aoya, ende la bingambi bia Yisalaele biuma, wae bale toma la bokilo owa Mose nda joso ja Nzakomba.
Esonelo ea bateni bʼakambo
(B. biʼaf 1.9-18)
13Ko nda mbile ea lobi, Mose aokitʼase wae asambe bakambo bʼanto, ko banto baolemala ndengama la Mose lima nkesa elaka nkʼokolo. 14Aki bokilo owa Mose ene baoyiʼauma bakiʼndʼokeelaka banto, akela, “joi line lie wʼokeela banto lile na? Okitʼase nko we mongo kika, ko bantʼauma bemala ndengama la we lima nkesa o lʼokolo, ncina ea na?” 15Mose aokela bokilo okande, “A! ndʼewela wae banto bayʼelʼemi wae buole Nzakomba: 16aatʼiyo likambo, baoyʼelʼemi; ko ntena likambo ndatsa bonto lʼosingitana lʼende, ko ndalaka bisekyelo bia Nzakomba la besise bekae.” 17Bokilo owa Mose aolokela, “Joi likela we lifʼolotsi. 18Oteka nkako, we lʼantʼane balʼele we: ele bolemo bone bokamba we bokolekola lʼolito; ofokambeya nko we kika. 19Okoza lofoso lokami, nkangele wango, ko Nzakomba ayale la we: we yalema ndatsʼanto la Nzakomba ko otomba bakambo ele Nzakomba: 20ko wʼalake besise la bisekyelo, ko wʼacumya mboka e iyʼokenda, lʼosala bo iyʼosala. 21Koko sona limʼelʼanto baendeʼamo bandekela, wae bayoange Nzakomba, banto ba nsosolo, batona nyongo; ko wʼailʼiyo nda mpifo ea baesanyi bʼanto nkoto, bamo baesanyi bʼanto bonkama, bamo baesanyi bʼanto ntuku itano, ko lʼankina baesanyi bʼanto jom jom. 22Kelʼiyo batenʼakambo nda bikeke biuma; koko wengi likambo ja linene bayelʼele we, lolo bakambo ba tosisi, batenʼako iyo mongo, elengʼeko bakokokoza we bolitoʼomo, ko iyo bakokambya ndʼolemo. 23Nga okela ngoko, ko Nzakomba akosisa ngoko, wifokuseya lomonga, ko bantʼane bauma bifocwa nda totenela tokiyo la kuci.”
24Elengʼeko Mose aolokoza lofoso ja bokilo okae, ko aokela baoyi bakiʼnde bauma. 25Koko Mose aosona baende bandeji limʼele Ba-Yisalaele bauma, ko aolaila nda mpifo ea baesanyi elʼantʼako, baesanyi bʼanto nkoto, la bonkama, lʼanto ntuku itano, ko la bʼanto jom jom. 26Ko iyo batenaki bakambo bʼanto nda bikeke biuma: bakambo ba bolo bayelaki ele Mose; lolo bako ba tosisi, basambaki iyo mongo. 27Ko Mose aosisʼokilo okande, ko aoluta ndʼese ekae mongo.
Currently Selected:
Olelo 18: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
