Olelo 17
17
Bememesano nda Lepidima. Ekenje ea Olebe
(Bea 20.1-13)
1Koko etakanelo euma ea bana ba Yisalaele bakendaki lima ete keleke ea Sina, la nkendo ikiyo, elengʼele bosise wa Yawe, ko baoleza lilako jʼetakanelo ekiyo nda Lepidima: ko eko nko basi ba mmamela. 2Ndʼewelʼeko bantʼako baseki lisa la Mose, bakela, “Otokaya basi tomele.” Ko Mose aolakela, “Lompangwelʼemi ncina na? Ko lomeka Yawe lae?” 3Ko bantʼako bokaki mposa eʼasi eko; ko bamemesanelaki Mose, bakela, “Otoyelaki lima Ejipeto, wae otoome la mposa eʼasi, iso la banaʼakiso la nyama ikiso, likambo na?” 4Ko Mose aoonda Yawe, akela, “Joi li emʼokeela bantʼane na? Acikʼisisi ko bifonjoonya bikenje.” 5Ko Yawe aokela Mose, akela, “Kenda nda joso jʼanto, ko tomba la we bingambi bia Yisalaele ko la bondandoʼoke bokiʼwʼokundaka ntando, ko kenda. 6Bala, emi njemala nda joso like nkʼeko ndʼekenje ea Olebe; ko we wifokundʼekenje, ko basi bifola, wete banto bamele.” Mose akelaki ngoko nda joso ja baiso ba bingambi bia Yisalaele. 7Ko aotanga lina ja wijʼoko Masa ko la Meliba; eki bana ba Yisalaele oseka la Mose, la ndʼewelʼekiʼyʼomekaka Yawe, bakelaki, “La, ale lʼiso, nkina nye?”
Ba-Yisalaele baolonga Amaleke
8Limʼako Ba-Amaleke baoyʼouna la Ba-Yisalaele nda Lepidima. 9Ko Mose aokela Yoswa, “Otosonele baende, ko kenda youne la Amaleke; lobi njifemala ndʼilongo ya ngongo la bonkando wa Nzakomba nda likata likami.” 10Yoswa aokela ngoki Mose osisakʼende, ko aouna la Amaleke: ko Mose la Alona la Ulu baounda ndʼilongo ya ngongo. 11Aki Mose osangyaka likata likae, Yisalaele aolonga: ko akiʼndʼokitezaka likata likande, Amaleke aolonga. 12Lolo bakata ba Mose baolokʼolito, ko baokolʼekenje, ko baolila eko ndʼase bakande, ko aokitʼase ndʼeko; ko Alona la Ulu baosukota bakata bakande, omo wiji omo wiji; ko bakata bakae baosilama sila, elaka nkʼilelo ea jefa. 13Ko Yoswa aolitanya Amaleke lʼantoʼakae lʼifaka yʼetumba.
14Koko Yawe aokela Mose, “Kota joi line ndʼonkanda nga jofwa, ko banda liko ndʼatoi ba Yoswa: wae emi njifofofya jofwa ja Amaleke limʼase ba loola.” 15Ko Mose aotonga nkinda ea mbeka, ko aotanga lina jʼeko Yawe-Nisi: 16ko aokela, “Yawe aosimba nsimbi: Yawe ifounʼetumba la Amaleke limʼeotswelo o lʼeotswelo emo.”
Currently Selected:
Olelo 17: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
