Olelo 16
16
Bememesano bia Ba-Yisalaele ndʼete keleke ea Sina
1Koko baocwa nda lokendo lokiyo lima Elima, ko etakano euma ea bana ba Yisalaele baoya ndʼete keleke ea Sina, ele ndatsa Elima la Sinai, nda mbile ea jom lʼitano ea nsanza ea ife limʼekʼiyʼolaka limʼese ea Ejipeto. 2Ko etakano euma ea bana ba Yisalaele baomemesanela Mose la Alona ndʼete keleke; 3ko bana ba Yisalaele baolakela, “Siki towaki la likata ja Yawe ndʼese ea Ejipeto, akiʼsʼokitʼase la mpoke ya nyama, akiʼsʼokindaka mbimbi la mampa: elʼinyo lotoyela ndʼete keleke ene wete loome banto bʼetakano ene euma la nzala.”
Mana
4Limʼako Yawe akela Mose, “Bala, njifojweya mampa lima loola elʼinyo; banto bifotakanya cu mbile cu liondo lindeji la mbilʼemoko, wae ndameke, nkina bifokenda nda bisekyelo bikami nkina nye. 5Ko nda mbile eʼotoa, bifezʼiko iyelʼiyo ko iko ifoyalema nga baondo bafe ba bembile befe.” 6Koko Mose la Alona baokela bana ba Yisalaele bauma, “Lʼokolo, lifea wete Yawe aoloyelʼinyo limʼese ea Ejipeto: 7ko la nkesa lifena jilangi ja Yawe; elʼende aoloka bememesano bekiʼny’ omemesanelaka Yawe: ko iso tole na, wae lotomemesanelʼiso?” 8Ko Mose akela, “Ae Yawe okayʼinyo nyama lʼokolo wete lole ndala, ko la nkesa mampa o mbimbi, ele Yawe aoloka bememesano be inyʼomemesanelakʼende, ko iso tole na? Inyo lofotomemesanelʼsio, lolo lomemesanela Yawe.” 9Ko Mose aokela Alona, “Sangela etakanelo euma ea bana ba Yisalaele, Lotutama nda joso ja Yawe: elʼende aoloka bememesano bekinyo.” 10Ko nkʼatefela Alona lʼetakanelo euma ea bana ba Yisalale, baolenda nda wiji wʼete keleke, ko bala, jilangi ja Yawe jolenya nda litute. 11Ko Yawe aotefela la Mose akela, 12“Emi njoloka bememesano bia bana ba Yisalaele: tefela lʼiyo, wʼakele, Lifola nyama lʼokolo, ko lifokinda mbimbi ea mampa la nkesa: ko inyo lifea wetʼemi nde Yawe Nzakomba ekinyo.”
13Ko lʼokolo tofulu ngole benjemba tokukʼitenela ya lilako likiyo; ko la nkesa eongi eolambema nda lilako jʼetakanono kio samanyu. 14Ko aki eongi endambemaki oetolaka, bala, baimaka ba tosisi nga mpumbu ya mboko bambi ndʼamoci, ko baokukʼokili wʼete keleke. 15Aki bana ba Yisalaele enaka, bakelana, “Bako bale na?” elʼiyo ntabea toma toko. Ko Mose aolakela, “Bako bale mampa iki Yawe okaakʼinyo wete loleke. 16Joi line wete liki Yawe osisaka, Wengiʼonto atakanya elengʼele elelo ekande, wengiʼonto wengi jeza ja omela elengʼele boanji wʼanto bakinyo; wengiʼonto akole ndʼeloko ekiyo bale ndʼilombe ikande ya bito.” 17Ko bana ba Yisalaele bakelaki ngoko, ko baotakanya, bamo bauke, bamo nkʼisisi. 18Akiʼyʼezaka la jeza ja omela, ende otakanyaki bauke ntaki lʼelela, ko ende otakanyaki isisi ntakutswa, wengiʼonto atakanyaki elengʼele elelo ekande. 19Ko Mose akela, “Nkʼonto ocika bamo elaka nko nkesa.” 20Lolonde iyo ntabokozaki Mose; bamʼakiyo baocika bamo elaka nko nkesa, ko bako baoota nkiso ko baoloza jei: ko Mose aolalemwa la nkele. 21Koto batakanyaki bako benkesa lʼenkesa, wengiʼonto elengʼele elelo ekande; ko aki jefa oalangana la wane mongo, bako baolangwa.
22Koko nda mbile eʼotoa baotakanya mampa iko nga betakanya befe, wengiʼonto baomela bafe; ko bingambi bia etakano baoyʼosangela Mose:
Sabata eʼoeko
23Ko ende aolakela, “Line wete joi liki Yawe okelaka, Lobi wete jomo jʼoeko, sabata ea boeko ele Yawe: lotumba ba inyʼotumba, ko lokatsa bako ba inyʼokatsa: ko bakʼauma baciki loomba bako elaka nko nkesa.” 24Ko baoomba elaka nko nkesa ngoki Mose osisaka; ko bako ntaboza jei, ko ntabaota nkiso nye. 25Ko Mose akela, “Loleka bako mbilʼene; ele mbilʼene wae sabata ele Yawe: lofaotanʼako ndʼokili mbilʼene. 26Lotakanyʼako nda bembile botoa; lolonde nda mbile ea nsambo wae sabata, lofaotana nda mbilʼeko.” 27Ko nda mbile ea nsambo, bantʼamo baolola otakanya bako, lolo ntabatana bako nye. 28Ko Yawe akela Mose, “Inyo lotendola besise bekami ko la bisekyelo bikami elingi na? 29Bala! Yawe akaakʼinyo mbile ea sabata, ndʼewelʼeko, ayokayʼinyo toma ta bembile befe nda mbile eʼotoa; loyala wengiʼonto ndʼitenela ikae mongo, nkʼonto ondola limʼitenela ikae mongo nda mbile ea nsambo.” 30Elengʼeko bantʼako baoloma nda mbile eansambo.
31Banto ba ilongo ya Yisalaele baotanga lina ja toma toko mana: tokosongi la biofo bia coriandre, o fe, ko lotela ja toko loki ngole bekate besangana la mpako. 32Ko Mose akela, “Joi line wete joi liki Yawe osisaka. Lila mana nda jeza ja omela to ko bako bafongame ele biotswelo bikinyo; wae iyo bene mampa ikiʼmʼoleyakʼinyo ndʼete keleke, akiʼmʼoyelakʼinyo lima ese ea Ejipeto.” 33Ko Mose aokela Alona, “Kela ijwa, ko ila mana eko, jeza ja omela emoko to; ko ambyʼeko nda joso ja Yawe wae eombame ele biotswelo bikinyo.” 34Elengʼeki Yawe osisaka Mose, elengʼeko Alona aolambyʼeko nda joso ja Nsango wete eombame eko. 35Bana ba Yisalaele baleki mana elaka nko baoya ndʼese efetsʼanto: baleki mana elaka nko baoya nda belelo bia ese ea Kanana. 36Jeza ja omelo lile wae liondo limoko ja baondo jom ba efa.
Currently Selected:
Olelo 16: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
